Kọ Ozighi Ọkparesuọ O ti Kuhọ Ẹdẹ Jọ?

Nọ ahwo a te ru ozighi nọ a je kpe ahwo, o rẹ sae lẹliẹ owhẹ nọ inọ: ‘Kọ Ọghẹnẹ ọ be ginẹ daezọ mai? Fikieme eware e be rọ via enẹ? Kọ ozighi ọkparesuọa o ti kuhọ ẹdẹ jọ? Eme o rẹ sai fiobọhọ kẹ omẹ evaọ ozọ nọ u bi mu omẹ na?’ Whọ rẹ sae jọ Ebaibol na ruẹ emamọ iyo rọkẹ enọ nana.

Ẹvẹ Ọghẹnẹ o rri ozighi ọkparesuọ?

Ọghẹnẹ o mukpahe oghẹrẹ ozighi kpobi. (Olezi 11:5; Itẹ 6:16, 17) Yọ Jesu nọ Ọghẹnẹ o vi ze otọakpọ na ọ whọku ilele riẹ evaọ okenọ a ru ozighi. (Matiu 26:50-52) Dede nọ ahwo jọ nọ a re ru ozighi na a rẹ ta nọ a bi ru ei fiki Ọghẹnẹ, Ọghẹnẹ o vi rai vievie he. Yọ ọ rẹ tubẹ gaviezọ kẹ elẹ ahwo otiọye na dede he.—Aizaya 1:15.

Ọghẹnẹ ọ be daezọ ahwo kpobi nọ a be ruẹ uye, te enọ ozighi ekpehre ahwo o wha uye se no. (Olezi 31:7; 1 Pita 5:7) Ebaibol na o te je dhesẹ nọ Ọghẹnẹ o ti si oghẹrẹ ozighi kpobi notọ kẹle na.—Aizaya 60:18.

Oware nọ o be hae lẹliẹ ahwo ru ozighi ọkparesuọ

Ebaibol na o dhesẹ oware nọ o be hae lẹliẹ ahwo ru ozighi ọkparesuọ. O ta nọ: “Ohwo o . . . su ọrivẹ riẹ ruọ uye.” (Ọtausiuwoma Na 8:9) Notọ avọ otọ ze, ahwo nọ a rrọ esuo a be hai ru ozighi je kienyẹ ahwo. Okienyẹ nana o tẹ be lẹliẹ ahwo ru ozighi jẹ gwọlọ họrọ ae zihe.—Ọtausiuwoma Na 7:7.

Ozighi ọkparesuọ o ti kuhọ

Ọghẹnẹ ọ ya eyaa nọ o ti si ozọ gbe ozighi notọ, o ve ti ru udhedhẹ jọ otọakpọ na.—Aizaya 32:18; Maeka 4:3, 4.

Ọghẹnẹ o ti si ahwo nọ a be wha ozighi ọkparesuọ ze na no. Ọ te rehọ egọmeti riẹ nọ o ti su akpọ na soso ro nwene esuo ohwo-akpọ. Ohwo nọ ọ te jọ Osu egọmeti riẹ na họ Jesu Kristi. Yọ o ti kienyẹ ahwo vievie he, ukpoye, o ti si oghẹrẹ okienyẹ gbe ozighi kpobi notọ. (Olezi 72:2, 14) Evaọ oke yena, ohwo ọvo o gbe ti ru ozighi ọkparesuọ họ. Ukpoye ahwo kpobi nọ a te jariẹ, “eva e te were ae gaga fiki udhedhẹ nọ o dafia.”—Olezi 37:10, 11.
Ọghẹnẹ o ti si uye nọ ozighi ọkparesuọ o wha ze kpobi no. Ọghẹnẹ o ti ru re edada gbe uye nọ ozighi ọkparesuọ o wha se ahwo no i no ahwo oma riẹriẹriẹ. (Aizaya 65:17; Eviavia 21:3, 4) Ọ tubẹ ya eyaa dede nọ ọ te kpare ahwo nọ a whu no ze, a vẹ te rria akpọ nọ ọ rrọ dhedhẹ.—Jọn 5:28, 29.

Eware buobu e rrọ Ebaibol na nọ e rẹ sae lẹliẹ omai rọwo nọ Ọghẹnẹ o ti ru epanọ ọ ta na kẹle. Rekọ ẹsejọhọ who bi roro nọ, ‘Fikieme Ọghẹnẹ o gbe ri si ozighi ọkparesuọ notọ họ?’ Re whọ riẹ uyo onọ na, rri ividio nọ uzoẹme riẹ o ta nọ, Fikieme Ọghẹnẹ Ọ jẹ Kuvẹ Kẹ Uye-Oruẹ?

a Ẹsibuobu a rẹ rehọ ẹme na “ozighi ọkparesuọ” rọ ta ẹme kpahe ohọre nọ a rẹ họre ahwo gheghe nọ a rrọ esuo ho. A re ru onana rọ wha ozọ họ ahwo ẹro, je ru re a nwene eware evaọ esuo, egagọ, hayo oghẹrẹ nọ eware e be nya evaọ ẹwho. Rekọ ahwo jọ a rẹ rọwo ho inọ ozighi jọ nọ a ru yọ orọ ọkparesuọ.

Ebaibol na o bi fiobọhọ kẹ ahwo thihakọ

Eware ivẹ jọ e riẹ nọ Ebaibol na ọ ta nọ whọ rẹ sai ru nọ i re fiobọhọ kẹ owhẹ, eye họ:

Hae lẹ se Ọghẹnẹ.—Ahwo Filipai 4:6, 7.
Hai roro kpahe eme Ebaibol nọ e rẹ kẹ ẹruore na.—Ahwo Hibru 6:19.

Re who gbe se kpahe eme nọ Ebaibol na ọ ta nọ i re fiobọhọ kẹ owhẹ, rri uzoẹme na, “Eware nọ Who re Ru re Who Gbe Roro Iroro Ga Hrọ Họ.”

Nọ ozighi ọkparesuọ u kpomahọ Isẹri Jihova jọ, Isẹri Jihova ibe rai i fiobọhọ kẹ ae. Joma ruẹ iriruo ivẹ jọ:

Natalya avọ ọmọzae riẹ nọ ọ rrọ ikpe izii nọ a re se Aslan, a jọ isukulu jọ evaọ Beslan nọ ọ rrọ Russia evaọ okenọ ahwo ugbarugba nọ a wha iwhunu a vẹruọ oria na, a te mu ahwo nọ a bu vrẹ odu ọvo (1,000) rehọ. O kẹ uye gaga nọ ahwo udhusoi buobu a whu, yọ emaha e mae jarai whu. Dede nọ Natalya avọ Aslan a zọ, iguegue na i je no ai oma ha. Joma ruẹ oware nọ u fiobọhọ kẹ ae.
Ọmọzae Pablo avọ Sophie o whu evaọ okenọ ahwo ugbarugba a dhẹ ipleni duhọ iwou nọ a re se Twin Towers nọ e rrọ New York. Rri ividio nana re whọ ruẹ oware nọ u fiobọhọ kẹ ae gbe amọfa nọ okpẹtu na o te.