Kọ Ebaibol na Ọ Sai Fiobọhọ kẹ Owhẹ Thihakọ Evaọ Oke Okpẹtu?
Kọ whọ rrọ usu ima ahwo buobu nọ e be rria eria nọ eware okpẹtu e be jọ via? Eware okpẹtu nọ a rọ obọ so ho e rẹ wha ọraha ze evaọ idhere sa-sa. Ofou ọwhibo gbe iso egaga, gbe eware itienana efa e rẹ wha ẹvo ze jẹ lẹliẹ owhe ku, yọ ifou egaga e rẹ raha eware. Iso egaga e rẹ lẹliẹ ẹkpẹ bru no igbehru ze, yọ egbrara nọ e rẹ va evaọ etoke okposo e rẹ wha erae ze nọ e rẹ raha eware. Nọ oso ọ gbẹ rrọ evaọ oke lelehie he, yọ ẹroro ọgaga ọ rrọ, eware e rẹ raha. Ofariẹ, ekpalekpa ame nọ i re kie ruru oria kpobi no e rẹ raha eware re.
Evaọ eria buobu, eware okpẹtu wọhọ ifou egaga gbe ikpiso e be romavia vi epaọ ọsosuọ, yọ e be ga vi epanọ e jọ vẹre. Ukoko jọ nọ a re se International Federation of Red Cross and Red Crescent Societies o niyẹrẹ nọ: “Ahwo nọ eware okpẹtu e be via kẹ a bi dhe ebuebu, keme iwhe ilogbo i bi ku gaga, ikpiso e be rrọ gaga, yọ evaọ eria jọ, iso e be rrọ vievie he. Eware nana e be wha uwhu ze jẹ raha eware, yọ kukpe kukpe ahwo a rẹ kwa no ẹwho rai fiki eware nana.”
Fiki eware nana nọ e be via na, uye o be bẹ ahwo yọ a be ruawa gaga. Yọ ẹsejọhọ a bi roro iroro egaga keme eware rai e raha no, uwou rai u kporo no, hayo ohwo uviuwou rai jọ o whu no.
Otẹrọnọ eware wọhọ ifou egaga hayo ikpiso e wha okpẹtu se owhẹ no, Ebaibol na ọ sai fiobọhọ kẹ owhẹ thihakọ. Ebaibol na ọ rẹ sasa ohwo oma, jẹ kẹ ohwo ẹruore gbe emamọ ohrẹ. Yọ eware nana i fiobọhọ kẹ ahwo buobu nọ eware wọhọ ifou egaga hayo ikpiso e wha okpẹtu se no. (Ahwo Rom 15:4) Ebaibol na ọ tẹ jẹ kuyo onọ jọ nọ u wuzou gaga nọ ahwo buobu a rẹ nọ: Fikieme Ọghẹnẹ ọ rọ kuvẹ re oware nana o via kẹ omẹ—kọ ọ be rehọ iẹe kẹ omẹ uye?
Orọnikọ Ọghẹnẹ ọ be rọ eware okpẹtu kẹ ahwo-akpọ uye nẹnẹ hẹ
Ebaibol na o wuhrẹ nọ orọnikọ obọ Ọghẹnẹ uye nọ ahwo a be ruẹ nẹnẹ na u no ze he. Ebaibol na ọ ta nọ “a sae rọ eware imuomu rọ dawo Ọghẹnẹ hẹ, yọ ọyomariẹ ọ rẹ rehọ eware itieye dawo ohwo ọvo ho.” (Jemis 1:13) Onana u dhesẹ nọ orọnikọ obọ Ọghẹnẹ eware wọhọ ifou egaga hayo ikpiso nọ e be wha okpẹtu ze na i bi no ze he.
Ghele na, a jọ Ebaibol na ta kpahe oke jọ nọ Ọghẹnẹ ọ rọ rehọ eware wọhọ ame gbe oso-itho rọ raha ahwo omuomu. Rekọ oghẹrẹ nọ e rọ via i wo ohẹriẹ no oghẹrẹ nọ eware nana e be rọ raha eware enẹna. Nẹnẹ na, eware nana e rẹ via ababọ unuovẹvẹ, yọ e rẹ via kẹ ahwo oyoma gbe ahwo owoma. Rekọ Ebaibol na o dhesẹ nọ Ọghẹnẹ ọ tẹ be rehọ eware nana raha ahwo omuomu, ọ rẹ thọ ahwo owoma, kake vẹvẹ ahwo unu, jẹ ta ẹjiroro nọ o bi ro ru oware na. Wọhọ oriruo, Ọghẹnẹ ọ ta ẹjiroro nọ ọ rọ gwọlọ rehọ Owhe ologbo raha ahwo omuomu evaọ oke Noa, ọ kake kẹ unuovẹvẹ, yọ ọ thọ Noa avọ ahwo uviuwou riẹ.—Emuhọ 6:13; 2 Pita 2:5.
Re who gbe wuhrẹ kpahe epanọ ma rọ riẹ nọ orọnikọ obọ Ọghẹnẹ eware okpẹtu nọ e be via nẹnẹ na i bi no ze he, se uzoẹme na “Eme Ebaibol na Ọ Ta Kpahe Okpẹtu nọ A rọ Obọ So Ho?”
Ọghẹnẹ ọ be daezọ ahwo nọ eware okpẹtu e be via kẹ
Ebaibol na o dhesẹ nọ Jihovaa o wo ọdawẹ yọ ọ be re-ohrọ mai. Iviena muẹrohọ eria ikere nọ e rrọ obotọ na.
Aizaya 63:9: “Evaọ etoke uye rai kpobi, o jẹ [kẹ Ọghẹnẹ] uye re.”
Onana u dhesẹ nọ: O rẹ kẹ Jihova uye gaga nọ ahwo a tẹ be ruẹ uye.
1 Pita 5:7: “Ọ be daezọ rai.”
Onana u dhesẹ nọ: Jihova ọ be daezọ ra gbe epanọ eware e rrọ kẹ owhẹ.
Fikinọ Jihova ọ be daezọ mai, o ti ru oware jọ kpahe eware okpẹtu nọ e be via na. Ọ be rọ Ẹme riẹ Ebaibol na sasa omai oma jẹ kẹ omai emamọ ehrẹ, yọ ọ jọ Ebaibol na ya eyaa nọ evaọ obaro, eware okpẹtu e te gbẹ via ha.—2 Ahwo Kọrint 1:3, 4.
Oke nọ eware okpẹtu e gbẹ te via ha
Jihova ọ ya eyaa evaọ Ebaibol na nọ o ti “ru eware woma kẹ [omai] evaọ obaro, [ma] ve je wo ẹruore.” (Jerimaya 29:11) Ọ gwọlọ nọ otọakpọ na o re zihe ruọ aparadase nọ ahwo a rẹ rria avọ evawere, orọnikọ oria nọ ahwo a rẹ rria avọ ozọ họ fiki eware okpẹtu.—Emuhọ 1:28; 2:15; Aizaya 32:18.
Ọghẹnẹ ọ te rọ Uvie riẹ ru otọakpọ na zihe ruọ aparadase. Uvie Ọghẹnẹ yọ egọmeti nọ Ọghẹnẹ o ro mu evaọ obọ odhiwu, nọ Jesu ọ rrọ ovie riẹ. (Matiu 6:10) Jesu o wo areghẹ gbe ogaga nọ ọ sae rọ whaha eware nọ e rẹ wha okpẹtu ze. Nọ Jesu ọ jọ otọakpọ, o dhesẹ nọ ọ rẹ sae kpọ ofou gbe ame. (Mak 4:37-41) O ti su avọ areghẹ gbe otoriẹ, je wuhrẹ ahwo-akpọ epanọ a sae rọ rẹrote otọakpọ na, viukpenọ a rẹ raha eware nọ Ọghẹnẹ ọ ma. (Aizaya 11:2) Evaọ otọ esuo Jesu, eware wọhọ okpofou hayo ame e te wha ọraha ze he.
Whọ sae nọ inọ, ‘Oke vẹ Jesu ọ te rọ rehọ ogaga riẹ kpọ eware wọhọ ofou gbe ame?’ Re whọ riẹ uyo onọ na, se uzoẹme na “Oke Vẹ Uvie Ọghẹnẹ U ti ro Su Akpọ Na?”
Epanọ whọ sai ro thihakọ eware okpẹtu enẹna
Ehrẹ Ebaibol na e sai fiobọhọ kẹ owhẹ taure eware wọhọ okpofou hayo owhe e tẹ te romavia, oke nọ e tẹ be via, gbe oke nọ e tẹ via vrẹ no.
Taure e tẹ te via: Ruẹrẹ oma kpahe re whọ jowọ kpata kpata.
Ebaibol na ọ ta nọ: “Ohwo nọ o wo areghẹ ọ rẹ ruẹ oware enwoma, o ve siomano, rekọ ogbori ọ rẹ nyaruọ ẹe, ọ vẹ reoja oware nọ u re noi ze.”—Itẹ 22:3.
Oware nọ onana u dhesẹ: Daoma riẹ eware okpẹtu nọ e rẹ sae via evaọ okegbe rai, re whọ sae jowọ kpata kpata jẹ thọ ahwo uviuwou ra nọ e tẹ via.
Oware nọ o via: “Ẹdẹ jọ nọ erae e to ruọ okegbe mai, ma sae dhẹ vabọ keme ma ruẹrẹ oma kpahe. Ma ruẹrẹ ekpa mai fihọ no vẹre, yọ ma fi imu nọ ma be hae lọ gbe iwu jọ fihọ eva rai no. Rekọ ahwo nọ a kẹle omai a jẹ dhẹ reghe reghe ọvo keme a riẹ oware nọ a re ru hu. Eva e were omẹ gaga nọ ma ruẹrẹ oma kpahe!”—Tamara, California, U.S.A.
Evaọ etoke okpẹtu: Tẹrovi eware nọ e mae roja.
Ebaibol na ọ ta nọ: “Ohwo ọ tẹ maki wo eware buobu, eware na e rẹ kẹe uzuazọ họ.”—Luk 12:15.
Oware nọ onana u dhesẹ: Uzuazọ o ghare vi eware nọ ohwo o wo.
Oware nọ o via: “Nọ ofou ọwhibo nọ a se Typhoon Lawinb ọ raha uwou mai, iroro e bẹ omẹ ẹjẹ keme me reghe no. Rekọ oware jọ nọ me ru họ, mẹ lẹ se Jihova. Mẹ tẹ te ruẹ nọ, dede nọ eware mai e raha, ma gbẹ rrọ uzuazọ.”—Leslie, Philippines.
Nọ okpẹtu ọ tẹ via vrẹ no: Roro kpahe okpẹdoke na, who du ruawa kpahe odẹnotha ha.
Ebaibol na ọ ta nọ: “Wha ruawa odẹnotha vievie he, keme odẹnotha o ti wo ẹkẹ ebẹbẹ riẹ.”—Matiu 6:34.
Oware nọ onana u dhesẹ: Who du ruawa ga hrọ kpahe eware nọ e rẹ sae via evaọ obaro ho.
Oware nọ o via: “Nọ ame o ku uwou mai fiki okposo avọ ofou ọgaga jọ nọ a se Hurricane Irma, o tẹ gwọlọ nọ mẹ rẹ jiroro kpahe eware buobu, rekọ o lọhọ kẹ omẹ hẹ. Mẹ daoma ru lele ohrẹ Ebaibol nọ o ta nọ ma ruawa kpahe odẹnotha ha na. Mẹ ruẹ nọ Jihova o fiobọhọ kẹ omẹ sai thihakọ ebẹbẹ nọ me roro nọ mẹ sai thihakọ rai vẹre he.”—Sally, Florida, U.S.A.
Whọ tẹ gwọlọ riẹ eware efa nọ who re ru, se uzoẹme na “When Disaster Strikes—Steps That Can Save Lives” (Eware nọ Ohwo O re Ru re Ọ Sai Siwi Uzuazọ Riẹ Evaọ Oke Okpẹtu).
a Jihova họ odẹ Ọghẹnẹ.—Olezi 83:18.
b A re je sei Typhoon Haima.