Eme Ebaibol na Ọ Ta Kpahe Okpẹtu nọ A rọ Obọ So Ho?

Uyo nọ Ebaibol na ọ kẹ

Orọnikọ Ọghẹnẹ họ ọnọ ọ be wha okpẹtu nọ a rọ obọ so ho ze he, rekọ o rẹ kẹe uye nọ ahwo a tẹ be ruẹ uye fiki eware okpẹtu nọ e be via. Uvie Ọghẹnẹ u ti si okpẹtu gbe eware efa kpobi nọ e be wha uye-oruẹ ze notọ. Rekọ taure oke yena o te ti te, Ọghẹnẹ ọ rẹ rọ idhere sa-sa kẹ ahwo nọ eware okpẹtu e via kẹ omosasọ.​—2 Ahwo Kọrint 1:3.

• Ẹvẹ o sai ro mu omai ẹro nọ Ọghẹnẹ ọ be rọ eware okpẹtu kẹ ahwo-akpọ uye he?

• Kọ eware okpẹtu i dhesẹ nọ edẹ urere na ma rrọ na?

• Oghẹrẹ vẹ Ọghẹnẹ o re ro fiobọhọ kẹ ahwo nọ eware okpẹtu e via kẹ?

• Kọ ehrẹ Ebaibol na e sai fiobọhọ kẹ ohwo ruẹrẹ oma kpahe kẹ eware okpẹtu?

• Eria Ebaibol nọ e rẹ kẹ ahwo nọ eware okpẹtu e via kẹ omosasọ

Ẹvẹ o sai ro mu omai ẹro nọ Ọghẹnẹ ọ be rọ eware okpẹtu kẹ ahwo-akpọ uye he?

Ma rẹ jọ Ebaibol na ruẹ nọ Ọghẹnẹ ọ rehọ ame, erae, gbe eware itieye na efa rọ raha ahwo oyoma evaọ oke anwae. Rekọ oghẹrẹ nọ Ọghẹnẹ ọ rẹ rehọ eware nana ruiruo u wo ohẹriẹ.

• Okpẹtu nọ a rọ obọ so ho o re kpe ahwo jẹ raha eware odode. Nọ Ọghẹnẹ ọ tẹ be rehọ eware wọhọ ame hayo erae rọ raha ahwo oyoma, ọ rẹ raha ahwo owoma kugbe he. Wọhọ oriruo, nọ Ọghẹnẹ ọ raha Sọdọm avọ Gomora evaọ oke anwae, o siwi Lọt avọ emetẹ ivẹ riẹ. (Emuhọ 19:29, 30) Fikinọ Ọghẹnẹ ọ ruẹ oware nọ ọ jọ udu ahwo nọ a jẹ rria evaọ oke yena, ọ raha ahwo kpobi nọ o rri nọ a rrọ yoyoma.​—Emuhọ 18:23-32; 1 Samuẹle 16:7.

• Eware okpẹtu nọ a rọ obọ so ho e rẹ via idudhe. Rekọ oghẹrẹ nọ Ọghẹnẹ ọ rẹ rehọ eware nana ruiruo u wo ohẹriẹ. Taure ọ tẹ te rehọ ame hayo eware itieye na efa rọ raha ahwo omuomu evaọ okenọ u kpemu, ọ jẹ hae vẹvẹ ae unu tao. O re siwi uzuazọ ahwo nọ a gaviezọ kẹ unuovẹvẹ riẹ.​—Emuhọ 7:1-5; Matiu 24:38, 39.

• Evaọ ẹsibuobu, eware nọ ahwo-akpọ a bi ru e rẹ wha okpẹtu ze. Evaọ oghẹrẹ vẹ? Ahwo-akpọ a be hae rehọ eware nọ a bi ru rọ raha eware nọ Ọghẹnẹ ọ ma fihọ otọakpọ na. A be hae bọ iwou fihọ eria nọ a riẹ nọ ame o re ku, eria nọ etọ e rẹ jọ nuhu, gbe eria nọ eware okpẹtu itieye na efa e rẹ jọ via. (Eviavia 11:18) Ma rẹ sae fo Ọghẹnẹ rọkẹ oghẹrẹ iroro nana nọ ahwo-akpọ a be jẹ na ha.​—Itẹ 19:3.

Kọ eware okpẹtu i dhesẹ nọ edẹ urere na ma rrọ na?

Ee. Ebaibol na o dhesẹ nọ eware okpẹtu e te via evaọ “oke urere uyero-akpọ na” hayo “evaọ edẹ urere na.” (Matiu 24:3; 2 Timoti 3:1) Wọhọ oriruo, Jesu ọ ta kpahe okenọ ma be rria na nọ: “No oria ruọ oria ohọo u ti mu, etọ i ti nuhu.” (Matiu 24:7) Kẹle na, Ọghẹnẹ o ti si okpẹtu gbe eware efa kpobi nọ e be wha edada gbe uye-oruẹ ze notọ.​—Eviavia 21:3, 4.

Oghẹrẹ vẹ Ọghẹnẹ o re ro fiobọhọ kẹ ahwo nọ eware okpẹtu e via kẹ?

• Ọghẹnẹ ọ rẹ rehọ Ebaibol na kẹ ahwo nọ eware okpẹtu e via kẹ omosasọ. Ebaibol na ọ kẹ omai imuẹro nọ Ọghẹnẹ ọ be daezọ mai yọ o rẹ kẹe uye nọ ma tẹ be ruẹ uye. (Aizaya 63:9; 1 Pita 5:6, 7) Ebaibol na ọ tẹ jẹ ta nọ Ọghẹnẹ ọ ya eyaa nọ eware okpẹtu nọ a rọ obọ so ho i ti notọ kẹle.​—Rri “Eria Ebaibol nọ e rẹ kẹ ahwo nọ eware okpẹtu e via kẹ omosasọ.”

• Ọghẹnẹ ọ rẹ rehọ ahwo nọ a be gọe fiobọhọ kẹ enọ eware okpẹtu e via kẹ. Ọghẹnẹ ọ rẹ rehọ ahwo nọ a be gọe ru oware nọ Jesu o ru evaọ okenọ ọ jọ otọakpọ. A jọ Ebaibol na ruẹaro kpahe Jesu inọ ọ te sasa “enọ e rrọ ọkora” gbe “enọ e rrọ uweri kpobi” oma. (Aizaya 61:1, 2) Ahwo nọ a be gọ Ọghẹnẹ a be daoma ru epọvo na re nẹnẹ.​—Jọn 13:15.

  Ọghẹnẹ ọ rẹ jẹ rehọ idibo riẹ ro fiobọhọ kẹ ahwo nọ eware okpẹtu e via kẹ.​—Iruẹru Ikọ 11:28-30; Ahwo Galesha 6:10.

Kọ ehrẹ Ebaibol na e sai fiobọhọ kẹ ohwo ruẹrẹ oma kpahe kẹ eware okpẹtu?

Ee. Dede nọ Ebaibol na yọ obe nọ a kere kpahe epanọ ohwo ọ rẹ rọ ruẹrẹ oma kpahe kẹ okpẹtu hu, ehrẹ nọ e rrọ eva riẹ e rẹ sai fiobọhọ kẹ ohwo. Wọhọ oriruo:

• Ruẹrẹ oma kpahe taure oware okpẹtu o tẹ te via. Ebaibol na ọ ta nọ: “Ohwo nọ o wo areghẹ ọ rẹ ruẹ oware enwoma, o ve siomano.” (Itẹ 22:3) O rrọ oware areghẹ re ma omaa oware nọ ma ti ru kpahotọ taure oware okpẹtu o tẹ te via. Onana o gwọlọ nọ ma re wo ẹmẹkpa nọ ma re fi eware họ kpahe no nọ ma sae wọ dhẹ, ma ve je lele ahwo uviuwou mai ta ẹme kpahe oware nọ ma re ru gbe oria nọ ma re kokohọ nọ oware okpẹtu o tẹ via idudhe.

• Kaki siwi uzuazọ ra taure whọ tẹ te dhogbo ekwakwa ra. Ebaibol na ọ ta nọ: “Ma wha oware ovo ziọ akpọ na ha, yọ ma sae wha oware ovo noi gbe he.” (1 Timoti 6:7, 8) O gwọlọ nọ ma rẹ nyasiọ uwou gbe ekwakwa mai ba re ma sae zọ evaọ etoke okpẹtu. U fo nọ ma rẹ kareghẹhọ nọ uzuazọ mai o roja vi ekwakwa nọ ma wo.​—Matiu 6:25.