Kọ Ebaibol na Ọ Sai Fiobọhọ kẹ Owhẹ Siọ Imu Egaga Ba?

Kukpe kukpe, ahwo nọ a bi whu fiki imu egaga nọ a be rehọ a bu wo umuo ho. Yọ ejọ rai fiki ore emu egaga nọ e da okegbe rai fia. Nọ okpẹyao COVID-19 na o du lahwe, ẹbẹbẹ nana ọ tẹ ga vi epaọ anwẹdẹ. O make rrọ ere na, ehrẹ Ebaibol i fiobọhọ kẹ ahwo buobu siọ imu egaga ba no. Otẹrọnọ who wo ẹbẹbẹ nana, ehrẹ nana e sai fiobọhọ kẹ owhẹ re.a

Ma te jọ uzoẹme nana ta kpahe eware nana

• Fikieme ma jẹ jọ Ebaibol gwọlọ ehrẹ nọ i re fiobọhọ kẹ omai whaha imu egaga erehọ?

• Eware ene jọ nọ Ebaibol ọ ta nọ whọ rẹ sai ru rọ whaha imu egaga nọ whọ rehọ reria no

• Eria Ebaibol nọ e rẹ sai fiobọhọ kẹ owhẹ whaha imu egaga nọ whọ rehọ reria no

• Iku ahwo nọ Ebaibol na o fiobọhọ kẹ whaha ekpehre uruemu nọ o reria e rai obọ no

• Kọ Ebaibol ọ ta nọ o thọ re a rehọ imu nọ e rẹ sai fiobọhọ kẹ ohwo nọ ọ rehọ imu egaga reria no siwi ei?

• Kọ Ebaibol ọ ta nọ o thọ re a rehọ imu siwi ohwo?

Fikieme ma jẹ jọ Ebaibol gwọlọ ehrẹ nọ i re fiobọhọ kẹ omai whaha imu egaga erehọ?

Ekiotọ jọ a ta nọ ahwo a rẹ mae rehọ imu egaga nọ a tẹ be ruawa, nọ a tẹ rrọ goli, a tẹ rrọ ọkọkora hayo nọ oma o tẹ rrọ ae no fiki oware jọ. Rekọ who te bi se Ebaibol na, u ti fiobọhọ kẹ owhẹ fievahọ Jihova jẹ whaha oware kpobi nọ o te lẹliẹ owhẹ rehọ imu egaga. Ebaibol na ọ ta kpahe eware nọ whọ rẹ sai ru re usu ra avọ Ọghẹnẹ ọ kpekpe ziezi. (Olezi 25:14) Jihova o ti fiobọhọ kẹ owhẹ thihakọ ebẹbẹ nọ who roro nọ e ga vi owhẹ.—Mak 11:22-24.

Eware ene jọ nọ Ebaibol ọ ta nọ whọ rẹ sai ru rọ whaha imu egaga nọ whọ rehọ reria no

1. 1. Daoma riẹ Jihova Ọghẹnẹ ziezi.b (Jọn 17:3) Ọghẹnẹ ọ ma eware kpobi, yọ ogaga riẹ u wo umuo ho. U te no ere no, Ọsẹ obọ odhiwu ra ọ rrọ, o you whẹ gaga. Ọ gwọlọ nọ whọ jọ ogbẹnyusu riẹ, ọ tẹ jẹ gwọlọ nọ ọ rẹ rọ ogaga riẹ fiobọhọ kẹ owhẹ. (Aizaya 40:29-31; Jemis 4:8) Ọ gwọlọ nọ eware i woma kẹ owhẹ evaọ obaro. Rekọ re o sae jọ ere kẹ owhẹ, who re fi ẹrọwọ họ iẹe je ru oware nọ ọ ta.—Jerimaya 29:11; Jọn 3:16.

2. 2. Lẹ sei re o fiobọhọ kẹ owhẹ. Lẹ se Jihova re o fiobọhọ kẹ owhẹ siọ imu egaga ba, re whọ sae jọ “ọrẹri [hayo fuafo, ọnọ] Ọghẹnẹ ọ rẹ jẹrehọ.” (Ahwo Rom 12:1) Jihova ọ te rọ ẹzi ọfuafo riẹ fiobọhọ kẹ owhẹ wo “ogaga nọ u vi ogaga.” (2 Ahwo Kọrint 4:7; Luk 11:13) Ogaga nana u ti fiobọhọ kẹ owhẹ whaha oghẹrẹ imu egaga kpobi. Ere ọvo ho, u ti je fiobọhọ kẹ owhẹ whẹ “uruemu okpokpọ na họ oma,” whọ vẹ te hai ru oware nọ o rẹ were Jihova.—Ahwo Kọlọsi 3:9, 10.

3. 3. Hai roro kpahe eware nọ e rẹ were Ọghẹnẹ. (Aizaya 55:9) Jihova o ti fiobọhọ kẹ owhẹ ru “iroro [ra] kpokpọ,” whọ vẹ te hai roro kpahe eware nọ i fo. Onana u ve ti fiobọhọ kẹ owhẹ siobọno imu egaga. (Ahwo Ẹfisọs 4:23) Eware nọ e rẹ were Ọghẹnẹ e da Ebaibol na fia, u ti woma gaga nọ whọ tẹ be hai sei ẹsikpobi. (Olezi 1:1-3) U wo ahwo buobu nọ a gwọlọ riẹ oware nọ o rrọ Ebaibol na, nọ a nọ mi amọfa. Yọ ere nọ a ru na u gine fiobọhọ kẹ ae. (Iruẹru Ikọ 8:30, 31) Isẹri Jihova a re wuhrẹ Ebaibol kugbe ahwo ọvọvẹ. Ma bi zizie owhẹ nọ hai lele omai kpohọ ewuhrẹ. Ma rẹ jọ iwuhrẹ mai wuhrẹ oware nọ Ebaibol ọ ta gbe epanọ ma sai ro ru lele iei.

4. 4. Hai kuomagbe ahwo nọ a wo emamọ uruemu. Who te bi lele ahwo nọ a wo emamọ uruemu, o sai fiobọhọ kẹ owhẹ whaha ikpehre iruemu nọ e reria owhẹ obọ no. (Itẹ 13:20) Whọ rẹ jọ ukoko na ruẹ emamọ ahwo nọ who re mu usu kugbe, yọ Jihova ọ gwọlọ nọ ahwo otiọna a jọ egbẹnyusu ra re a fiobọhọ kẹ owhẹ. (Olezi 119:63; Ahwo Rom 1:12) Who du rri ikpehre ifimu hayo gaviezọ kẹ ikpehre ile he, nọ orọnọ ma rẹ gwọlọ rọ aro kele ahwo nọ ma rẹ gaviezọ kẹ, se kpahe hayo rri ughe rai na. Whaha oware kpobi nọ u re ru ei bẹbẹ kẹ owhẹ re who ru oware nọ u fo.—Olezi 101:3; Emọs 5:14.

Eria Ebaibol nọ e rẹ sai fiobọhọ kẹ owhẹ whaha imu egaga nọ whọ rehọ reria no

Ahwo Filipai 4:13: “Evaọ eware kpobi, me bi wo ẹgba ẹkwoma ọnọ ọ be kẹ omẹ ogaga.”

“Mẹ riẹ nọ mẹ ọvo sae rọ ẹgba obọmẹ siọ imu egaga ba ha. Fikiere, mẹ tẹ lẹ se Jihova re o fiobọhọ kẹ omẹ. Yọ ẹzi ofuafo riẹ ọ kẹ omẹ ẹgba nọ mẹ sae rọ siọ imu egaga ba.”—Patrizia, nọ ọ rrọ obọ Italy.

Iku ahwo nọ Ebaibol na o fiobọhọ kẹ whaha ekpehre uruemu nọ o reria e rai obọ no

Joseph Ehrenbogen ọ whẹro evaọ ẹwho jọ nọ a jẹ jọ ru ozighi gaga. Ọ jẹ hae da idi egaga, se utaba, vovo ige gbe ikokeni. Ẹsibuobu, o je ti whu no fikinọ ọ jẹ rehọ ae vrẹ oma. Rekọ nọ o se oria Ebaibol jọ, u te mu ei ẹro nọ ọ sai nwene. Whọ sai se iku riẹ evaọ uzoẹme na, “Me Wuhrẹ Epanọ A re Bru Ọghọ họ Eyae Oma jẹ rọ Adhẹẹ Kẹ Omamẹ.”

Dmitry Korshunov ọ jọ ọgba-idi, yọ o jọ bẹbẹ kẹe gaga re o siobọno uruemu na. Eme o fiobọhọ kẹ ọzae nana nọ ọ sae rọ siọ udi ba? Rri ividio na, ‘Uzuazọ Mẹ O tẹ Vẹso Omẹ.’

Kọ Ebaibol ọ ta nọ o thọ re a rehọ imu nọ e rẹ sai fiobọhọ kẹ ohwo nọ ọ rehọ imu egaga reria no siwi ei?

Ijo. Ebaibol ọ tubẹ ta nọ: “Ahwo nọ oma rai o ga a gwọlọ ọbo-imu hu, rekọ enọ e be mọ e gwọlọ ọbo-imu.” (Matiu 9:12) Ukoko obọ America jọ nọ a re se National Institute on Drug Abuse nọ o rẹ kiẹ kpahe imu egaga erehọ gbe epanọ a sai ro fiobọhọ kẹ ahwo nọ a wo ẹbẹbẹ otiọye o ta nọ: “Imu egaga nọ ohwo ọ rẹ rehọ reria yọ ẹyao nọ ọ rẹ bẹ esiwi. Ohwo ọ tẹ make gwọlọ siobọno uruemu na jẹ gbaemu nọ o re ru ere, o rẹ lọhọ kẹe ghele he.” Ma riẹ nọ Jihova ọ sai fiobọhọ kẹ ohwo siobọno ekpehre uruemu utiona. O make rrọ ere na, ahwo nọ ehrẹ Ebaibol i fiobọhọ kẹ siọ imu egaga ba no a kpohọ ẹsipito yọ edọktọ i fiobọhọ kẹ ai.c Wọhọ oriruo, ọzae jọ nọ a re se Allen ọ ta nọ: “Evaọ oke nọ me je ro siobọno idi eda, oma o jẹ hae da omẹ ọvo. Oke yena mẹ rọ ta nọ me re kpohọ ẹsipito re a kẹ omẹ imu nọ e rẹ sai fiobọhọ kẹ omẹ, dede nọ inievo ukoko na a jẹ hae tuduhọ omẹ awọ.”

Kọ Ebaibol ọ ta nọ o thọ re a rehọ imu siwi ohwo?

Ijo. A tubẹ jọ Ebaibol ta ẹme nọ u dhesẹ nọ a sae rọ udi ogaga siwi oghẹrẹ eyao jọ, hayo rọkẹ ohwo nọ ọ kẹle uwhu no re edada riẹ e gbẹ ga hrọ họ. (Itẹ 31:6; 1 Timoti 5:23) Rekọ nọ ohwo ọ tẹ be da udi kẹse kẹse, o re zihe ruọ ọgba-idi. Ere ọvona oghẹrẹ imu jọ nọ a rẹ rehọ fiki edada e rẹ sae reria ohwo obọ. Fikiere, taure ma tẹ te rehọ umu nọ u re kpe edada nọ edọkita o kere kẹ omai, joma hae kareghẹhọ nọ o sae reria ohwo obọ, re ma gbẹ nwane rehọ ae epanọ u je he.—Itẹ 22:3.