Orẹwho Russia O Vẹruọ Orẹwho Ukraine

Evaọ irioke ẹdẹ avọ 24 ọrọ Ava 2022, orẹwho Russia o vẹruọ orẹwho Ukraine avọ isoja ghelọ epanọ isu akpọ na a daoma te re erẹwho ivẹ na a siọ ẹmo ba efi. Oghẹrẹ vẹ ozighi nana nọ ọ rrọ otọ na u ti kpomahọ akpọ na? Evaọ emedẹ jọ nọ e vrẹ na, okere-obe United Nations nọ a re se António Guterres, ọ ta nọ: “Ma sai tube roro kpahe uye gbe ọraha nọ ozighi nana ọ te wha se erẹwho nọ e rrọ Europe hu, gbe epanọ o sai si ufuoma no akpọ na soso.”

Wọhọ epanọ Ebaibol ọ ta, eme eware itiena nọ e be via na i dhesẹ?

• Jesu ọ ruẹaro nọ oke o be tha nọ “orẹwho o te kpareso orẹwho” yọ “uvie o te kpareso uvie.” (Matiu 24:7) Se uzoẹme na “Eme Họ Oka ‘Edẹ Urere’ Hayo ‘Oke Urere’ Na?” re whọ ruẹ epanọ Ebaibol o ro dhesẹ nọ emo nọ a bi fi nẹnẹ na i bi ru eruẹaruẹ Jesu gba.

• Obe Eviavia evaọ Ebaibol na o fodẹ “anyenya nọ ọ rrọ wawae wọhọ erae,” yọ a rehọ ọnọ ọ keria ehru riẹ be dhẹe dhesẹ ẹmo nọ o bi “si udhedhẹ no otọakpọ na” no. (Eviavia 6:4) Se uzoẹme na “Edhẹ-Enyenya Ene Na—Yọ Amono?” re whọ ruẹ epanọ eruẹaruẹ nana i ro kiekpahe emo nọ a bi fi nẹnẹ na.

• Obe Daniẹl o ruẹaro kpahe ozighi nọ o te jọ udevie “ovie ẹkpẹlobọ ovatha-ọre” avọ “ovie obọze ovatha-ọre.” (Daniẹl 11:25-45) Rri ividio na Eruẹaruẹ nọ I Rugba—Daniẹl Uzou avọ 11, re whọ ruẹ oware nọ ma rọ ta nọ Russia avọ ahwo nọ a be thae uke họ ovie ẹkpẹlobọ ovatha-ọre na.a

• Obe Eviavia o tẹ jẹ ta kpahe “ẹmo ẹdẹ ologbo Ọghẹnẹ Erumeru na.” (Eviavia 16:14, 16) Rekọ, orọnikọ ẹmo nana yọ ẹmo erẹwho avọ erẹwho nọ a ti fi wọhọ epanọ ma be ruẹ enẹna ha. Se uzoẹme na “Eme Họ Ẹmo Amagidọn?” re whọ ruẹ eware efa nọ a ta kpahe ẹmo nana nọ a ti fi evaọ obaro na.

Fikieme whọ sai ro rẹro nọ obaro na o ti woma?

• Ebaibol na ọ ta nọ Ọghẹnẹ o ti “ru emo serihọ evaọ otọakpọ na soso.” (Olezi 46:9) Se uzoẹme na “Ẹruore nọ Ma Wo Kpahe Obaro Na” re who gbe wuhrẹ kpahe akpọ owowoma nọ Ọghẹnẹ ọ ya eyaa riẹ na.

• Jesu o wuhrẹ ilele riẹ nọ a lẹ re Uvie Ọghẹnẹ o ze. (Matiu 6:9, 10) Uvie na yọ egọmeti obọ odhiwu nọ u ti ru otọakpọ na fihọ epanọ Ọghẹnẹ ọ gwọlọ, yọ Ọghẹnẹ ọ gwọlọ nọ udhedhẹ o rẹ jọ akpọ na. Re whọ ruẹ eware iwoma nọ Uvie na u ti ru kẹ owhẹ, rri ividio na Eme Họ Uvie Ọghẹnẹ?

Isẹri Jihova nọ e rrọ Ukraine a bu vi idu udhozeza-gbizii (129,000). Wọhọ Isẹri Jihova efa nọ e rrọ erẹwho efa kpobi, a be rọ aro kele Jesu. A re dhomahọ esuo akpọ na ha, yọ a re wobọ evaọ ẹmo ho. (Jọn 18:36) Isẹri Jihova nọ e rrọ akpọ na soso a bi whowho “usi uwoma Uvie na” inọ, Uvie Ọghẹnẹ u ti ku ebẹbẹ ahwo-akpọ họ, te ẹmo te. (Matiu 24:14) Ma bi zizie owhẹ nọ who kere se omai re who gbe wuhrẹ kpahe ẹruore nọ Ebaibol na ọ kẹ omai.