Ẹmo Ukraine na Ọ Ruọ Ukpe avọ Ivẹ No—Kọ Ẹruore Vẹ Ebaibol na Ọ Kẹ?

Edisoi-Oka nọ ọ rrọ ẹdẹ avọ 24 Ava, 2023, u ru rie gba ukpe ọvo nọ a ro mu ẹmo họ efi evaọ obọ Ukraine na. Iyẹrẹ jọ e ta nọ, isoja Ukraine avọ erọ Russia nọ a kpe no hayo nọ e nwoma evaọ ẹmo na a bu te oware wọhọ idu egba esa (300,000) no. Yọ ahwo gheghe nọ a whu no evaọ ẹmo na a bu te oware wọhọ idu ọgba (30,000). Rekọ o sae jọ nọ unu ahwo na a bu vrẹ ere.

U yoma kẹhẹ inọ, o wọhọ nọ ẹmo na o ti kuhọ kẹle he.

• “Enwenọ ẹgbukpe na nọ isoja Russia a rọ wọ ẹmo kpohọ Ukraine na, yọ emamọ oka ovo o riẹ hẹ nọ u bi dhesẹ nọ ẹmo na o ti kuhọ kẹle. O wọhọ nọ abọ ọvuọvo o ti fi kparobọ evaọ ẹmo na ha. O tẹ jẹ wọhọ nọ abọ ivẹ na a te sae rọwokugbe evaọ oware ovo jọ nọ u ti ku ẹmo na họ họ.”—NPR (National Public Radio), Ẹdẹ avọ 19 Ava, 2023.

O thọ họ inọ ahwo buobu a rrọ uweri fiki ẹmo nana gbe eware ozighi efa nọ i bi gbe edha họ ahwo aro evaọ akpọ nana soso. Kọ ẹruore vẹ Ebaibol na ọ kẹ? Kọ ẹmo-ofio o ti serihọ edẹ jọ?

Ẹmo nọ O ti Ku Emo Kpobi Họ

Ebaibol na ọ fodẹ ẹmo jọ nọ o ti siwi ahwo-akpọ, orọnikọ ọ te raha ai kufiẹ hẹ. A re se ẹmo yena Amagidọn. Ebaibol na o te je sei “ẹmo ẹdẹ ologbo Ọghẹnẹ Erumeru na.” (Eviavia 16:14, 16) Ọghẹnẹ ọ te rehọ ẹmo yena ku esuo ohwo-akpọ họ. Esuo ohwo-akpọ o be wha emo buobu ze nọ i bi kpe ahwo kufiẹ. Re who wuhrẹ epanọ Amagidọn ọ te rọ wha udhedhẹ ebẹdẹ bẹdẹ ze, se izoẹme nana:

• “Eme Họ Ẹmo Amagidọn?”

• “Amagidọn Yọ Oware Evawere!”