Oke Vẹ Ahwo A te rọ Siọ Ohọre Ba?—Eme Ebaibol na Ọ Ta?

“Enẹna họ oke nọ a rẹ rọ siọ ohọre ba re eware i gbe yoma vi enẹ hẹ. Enẹna họ oke nọ ohwo kpobi o re ro kru oma riẹ.” Ọzae jọ nọ a re se António Guterres nọ ọ rrọ United Nations Secretary-General, ọye ọ ta ẹme na okenọ ahwo Iran a sa ebọmbo buobu kpohọ Israel evaọ Ẹdẹ-Ọmaha, Ane 13, 2024.

Ohọre nọ a be họre evaọ Middle East na yọ oriruo jọ evaọ usu emo nọ a bi fi evaọ akpọ na soso.

“Obọnana ozighi gbe emo nọ a bi fi e mai bu kpaobọ anwẹnọ a ro fi ẹmo Akpọ Avivẹ no na. Yọ ahwo nọ a be ruẹ uye fiki emo gbe ozighi na a bu te ima-idu ivẹ (2,000,000,000) koyehọ abọvo abane ahwo nọ a rrọ akpọ na.”—United Nations Security Council, January 26, 2023.

Erẹwho jọ nọ a bi jo ru ozighi hayo fi ẹmo họ, Israel, Gaza, Syria, Azerbaijan, Ukraine, Sudan, Ethiopia, Niger, Myanmar, gbe Haiti.a

Oke vẹ ahwo a te rọ siọ ohọre ba? Kọ isu akpọ na a sae wha udhedhẹ ze? Eme Ebaibol na ọ ta?

Ẹmo ọ da akpọ na fia

Ozighi nọ a bi ru gbe emo nọ a bi fi evaọ eria sa-sa na u dhesẹ nọ ẹmo o ti kuhọ kẹle. A jọ Ebaibol na ruẹaro nọ ahwo a ti fi ẹmo gaga evaọ oke mai na. Ebaibol o se etoke nana, “oke urere uyero-akpọ na.”—Matiu 24:3.

• “Wha ti yo edo emo gbe usi emo. . . . Orẹwho o te kpareso orẹwho, uvie o te kpareso uvie.”—Matiu 24:6, 7.

Se uzoẹme na “Eme Họ Oka ‘Edẹ Urere na,’ Hayo ‘Oke Urere’ Na?” re whọ ruẹ epanọ emo nọ a bi fi enẹna i bi ro ru eruẹaruẹ Ebaibol gba.

Ẹmo nọ o ti ku emo kpobi họ

Ebaibol na ọ ta nọ ẹmo o ti kuhọ kẹle. Ẹvẹ onana o te rọ via? Orọnikọ obọ ahwo-akpọ o ti no ze he. Ebaibol na o se ẹmo nọ Ọghẹnẹ o ti ro ku emo kpobi họ ẹmo Amagidọn, yọ a dhesẹ i rie wọhọ “ẹmo ẹdẹ ologbo Ọghẹnẹ Erumeru na.” (Eviavia 16:14, 16) Ẹmo nana Ọghẹnẹ o ti ro ru eyaa riẹ gba re ahwo-akpọ a sae rria otọakpọ na dhedhẹ bẹdẹ bẹdẹ.—Olezi 37:10, 11, 29.

Re whọ gbẹ riẹ kpahe ẹmo nana nọ Ọghẹnẹ o ti ro ku emo kpobi họ na, se uzoẹme na “Eme Họ Ẹmo Amagidọn?”