Uruemu Ahwo U bi Yoma Kẹdẹ Kẹdẹ—Eme Ebaibol na Ọ Ta?

Uruemu ahwo u bi dhe eyeyoma. Ahwo nọ a bi siwi evaọ ọspito a re do ku edọktọ; ahwo nọ a kpohọ ehọtẹle nyae re emu a rẹ wọviẹ ahwo nọ a be zẹ emu kẹ ae; ahwo nọ a rrọ arupre bi kpohọ erẹ a rẹ họre ahwo nọ a bi ru iruo evaọ arupre; emọ nọ i bi yo ẹme he a rẹ họre iticha rai, la ae eka je seha kẹ ae; yọ ahwo jọ nọ a rrọ isuẹsu a re ru ikpehre eware, yọ ejọ ọvo a re jiri omarai inọ a woma gaga.

Ebaibol na ọ rẹ sai fiobọhọ kẹ omai riẹ uruemu nọ u woma gbe onọ u yoma. Ma rẹ jẹ jọ Ebaibol na ruẹ oware nọ o be whae ze nọ uruemu ahwo u bi ro dhe eyeyoma kẹdẹ kẹdẹ.

Uruemu ahwo u bi yoma kẹdẹ kẹdẹ

Evaọ akpọ na soso, ma rẹ ruẹ nọ ahwo a gbe bi dhesẹ emamọ uruemu hu, ukpoye, uruemu ahwo u bi dhe eyeyoma.

• Evaọ ekiakiẹ jọ nọ a ru kẹle na, ahwo America nọ a kiẹ riwi a ta nọ oke nana uruemu ahwo o mai yoma kpaobọ evaọ America anwọ ikpe udhegbivẹ nọ e vrẹ na.

• Evaọ ekiakiẹ ọfa jọ, a kiẹ ahwo nọ a bu te idu ọgbagbivẹ (32,000) riwi evaọ erẹwho udhegberee. Evaọ usu rai, ahwo nọ a bu vi abọvo (65%) a ta nọ enẹna ahwo nọ a bi dhesẹ emamọ uruemu a mae kawo vi epaọ anwẹdẹ kpobi.

Ebaibol na ọ ta nọ enẹ uruemu ahwo o te jọ evaọ oke mai na.

• “Evaọ edẹ urere na, oke obẹbẹ nọ o rẹ bẹ ẹria o te jọ. Keme ahwo a ti you omobọ rai, you ugho, seha, wo omorro, ta eme-aghọ, ghẹmeeyo kẹ esẹgbini, kare uyere-ọghọ, . . . a ti mu ofu-ọkpoo, a ti you oware uwoma ha.”—2 Timoti 3:1-3.

Re whọ gbẹ riẹ kpahe epanọ eruẹaruẹ Ebaibol nana i bi ro rugba, se uzoẹme na “Kọ A Jọ Ebaibol Ruẹaro Kpahe Iruemu Iyoma nọ Ahwo A Wo Nẹnẹ Na?”

Oware nọ o re fiobọhọ kẹ omai dhesẹ emamọ uruemu

Evaọ akpọ nana nọ uruemu ahwo u bi jo dhe eyeyoma na, ahwo buobu a ruẹ nọ Ebaibol na ọ sai fiobọhọ kẹ ae dhesẹ emamọ uruemu. Ehrẹ nọ e rrọ Ebaibol i re fiobọhọ kẹ omai yọ ma rẹ sai “fievahọ ai ẹsikpobi, enẹna rite ebẹdẹ bẹdẹ.” (Olezi 111:8) Joma ta kpahe ehrẹ Ebaibol jọ:

• Oware nọ Ebaibol na ọ ta: “Eware kpobi nọ wha gwọlọ nọ ahwo a ru kẹ owhai, o gba owhai họ nọ eye wha re ru kẹ ae re.”—Matiu 7:12.

  Oware nọ u dhesẹ: O gwọlọ nọ ma rẹ jọ wowou jẹ rọ adhẹẹ kẹ amọfa wọhọ epanọ ma gwọlọ nọ a ru kẹ omai.

• Oware nọ Ebaibol na ọ ta: “Enẹna nọ wha siobọno eviẹhọ no na, whai omomọvo ọ hae ta uzẹme kẹ ọrivẹ riẹ.”—Ahwo Ẹfisọs 4:25.

  Oware nọ u dhesẹ: U fo nọ ma rẹ ta uzẹme evaọ oware kpobi je dhesẹ uruemu oruọzewọ.

Re whọ gbẹ riẹ eware efa kpahe uzoẹme nana, iviena se:

• Uwou-Eroro Na, ọnọ uzoẹme riẹ o ta nọ “Ẹvẹ Whọ Sae rọ Riẹ Oware Uwoma gbe Uyoma.”

• Uzoẹme na “Tolerance—How the Bible Can Help.”