Eme O rẹ Sai Fiobọhọ kẹ Ohwo Yeri Emamọ Uzuazọ?

Wọhọ epanọ ma ta evaọ izoeme nọ e vrẹ na, ahwo a dawo eware buobu no re a sai yeri emamọ uzuazọ je wo evawere. Eware nana jọ họ, isukulu, otatha, efe, gbe emamọ ohwo nọ a rẹ jọ. Rekọ eware nana e rẹ sai fiobọhọ kẹ ohwo yeri emamọ uzuazọ họ. Kọ onana u dhesẹ nọ oware ọvuọvo ọ riẹ nọ ọ rẹ sae kpọ omai hayo fiobọhọ kẹ omai yeri emamọ uzuazọ họ? Ijo!

EHRẸ NỌ E MAI WOMA KPAOBỌ

Nọ ma tẹ gwọlọ jiroro oware jọ, ẹsibuobu ma rẹ nọ mi ohwo nọ ọ kpako je wo areghẹ vi omai. Epọvo na re, ma tẹ gwọlọ riẹ epanọ ma sai ro yeri emamọ uzuazọ enẹna gbe evaọ obaro, u fo nọ ma re lele ehrẹ ohwo jọ nọ ọ kpako je wo areghẹ vi omai thethabọ. Ma rẹ ruẹ ehrẹ nana evaọ obe jọ nọ a muhọ ekere evaọ ikpe idu esa gbe egba isoi (3,500) nọ i kpemu. Obe nana họ, Ebaibol na.

Fikieme whọ sai ro fievahọ Ebaibol na? Keme Ọnọ o wo rie họ ọnọ ọ mae kpako je wo areghẹ evaọ ehrugbakpọ na. A dhesẹ i rie wọhọ “Ọnọ Ọ Rrọ no Anwae Ze,” gbe ọnọ ọ rrọ “no ebẹdẹ bẹdẹ rite ebẹdẹ bẹdẹ.” (Daniẹl 7:9; Olezi 90:2) Ọye họ “Ọmemama nọ ọ ma idhiwu na, Ọghẹnẹ uzẹme na, ọnọ ọ ruẹrẹ otọakpọ na họ.” (Aizaya 45:18) Ọ vuẹ omai nọ odẹ riẹ họ Jihova.—Olezi 83:18.

Fikinọ Ọghẹnẹ nọ ọ ma ahwo-akpọ họ ọnọ o wo Ebaibol na, whọ rẹ jariẹ ruẹ oria ọvo nọ a jọ ta nọ uruemu ẹwho jọ hayo ovioma ahwo jọ o woma vi orọ amọfa ha. Ehrẹ Ebaibol na i re kiekpo ho, yọ i re fiobọhọ kẹ ahwo erẹwho kpobi. A fa Ebaibol na fihọ evẹrẹ buobu no bu vi ebe efa kpobi, yọ oye họ obe nọ ahwo a mai wo evaọ akpọ na.a Onana u ru nọ ahwo kpobi a be sai ro se Ebaibol na je wo otoriẹ riẹ, re a sai wo erere no ehrẹ riẹ ze. Ebaibol na ọ ta nọ:

“Ọghẹnẹ o wo ọriẹwẹ hẹ, rekọ evaọ orẹwho kpobi, ohwo nọ ọ be dhozọ riẹ je bi ru oware nọ u kiehọ ọ rẹ jẹe rehọ.”—IRUẸRU IKỌ 10:34, 35.

Wọhọ epanọ ọsẹ nọ o you emọ riẹ ọ rẹ kẹ ae ehrẹ nọ i re fiobọhọ kẹ ae na, ere ọvona Jihova Ọghẹnẹ ọ be rọ Ẹme riẹ Ebaibol na kẹ omai ehrẹ nọ i re fiobọhọ kẹ omai, keme o you omai. (2 Timoti 3:16) Whọ sai fievahọ Ẹme riẹ keme ọye họ ọnọ ọ ma omai, yọ ọ riẹ oware nọ o rẹ kẹ omai evawere evaọ uzuazọ.

EHRẸ NỌ A RẸ SAI FIEVAHỌ

Ma sai fievahọ oware nọ Ebaibol na ọ ta kpahe obaro. Evaọ oware wọhọ ikpe idu ivẹ (2,000) nọ i kpemu, Ebaibol na ọ ta kpahe eware nọ e be via nẹnẹ na gbe uruemu nọ ahwo a ti dhesẹ, yọ i bi gine rugba.

EWARE NỌ E TE VIA

“Orẹwho o te kpareso orẹwho, uvie o te kpareso uvie. Etọ i ti nuhu gaga, yọ no oria ruọ oria ohọo u ti mu avọ ikpeyao nọ e te jọ.”—LUK 21:10, 11.

URUEMU NỌ AHWO A TI DHESẸ

“Evaọ edẹ urere na, oke obẹbẹ nọ o rẹ bẹ ẹria o te jọ. Keme ahwo a ti you omobọ rai, you ugho, seha, wo omorro, ta eme-aghọ, ghẹmeeyo kẹ esẹgbini, kare uyere-ọghọ, a ti ru ẹme rai gba ha, a ti wo uyoyou kẹ ibe ahwo-akpọ rai hi, a te rọwo ru ọtamuo ho, a te ta ahwo raha, a ti wo oma-onyẹ hẹ, a ti mu ofu-ọkpoo, a ti you oware uwoma ha, a ti vivie ahwo, veghe uzou, fu uke avọ omorro, a ti you omaweromẹ viukpenọ a re you Ọghẹnẹ.”—2 TIMOTI 3:1-4.

Nọ orọnọ eware nọ Ebaibol na ọ ta kpahe evaọ oke nọ u kpemu i bi rugba nẹnẹ na, eme onana u dhesẹ? Ababọ avro, whọ te rọwo ẹme nọ Leung nọ ọ rrọ ohwo Hong Kong ọ ta inọ: “U kri akpọ no nọ a rọ ruẹ eruẹaruẹ nọ e rrọ Ebaibol na. Ohwo-akpọ ọ sae ruẹ eruẹaruẹ nọ i re rugba enẹ hẹ. Onana u dhesẹ nọ ohwo jọ nọ o kpehru gaga je wo areghẹ vi omai, ọye o wo Ebaibol na.”

Eruẹaruẹ Ebaibol nọ i rugba no e rrọ buobu.b Onana u dhesẹ nọ Ebaibol na ginọ Ẹme Ọghẹnẹ. Jihova ọ ta nọ: “Mẹ họ Ọghẹnẹ, yọ ohwo ọvo nọ ọ wọhọ omẹ ọ rrọ họ. Evaọ obọ emuhọ mẹ rẹ jọ ta oware nọ u ti no oware ze.” (Aizaya 46:9, 10) Fikiere, whọ sai fievahọ oware nọ Ebaibol na ọ ta kpahe obaro na.

EHRẸ NỌ I TI FIOBỌHỌ KẸ OWHẸ ENẸNA GBE EVAỌ OBARO

Who te lele ehrẹ nọ e rrọ Ẹme Ọghẹnẹ, Ebaibol na, who ti wo irere buobu. Joma ta kpahe ejọ.

EPANỌ U FO NỌ OHWO O RE RRI UGHO GBE IRUO

“Umutho eriosehọ u woma vi iruo egaga nọ e wọhọ ofou nọ a bi le.” —ỌTAUSIUWOMA NA 4:6.

EVAWERE EVAỌ UVIUWOU

“Whai omomọvo o re you aye riẹ hrọ wọhọ epanọ o you omobọ riẹ; evaọ abọdekọ riẹ, jọ aye o wo adhẹẹ odidi kẹ ọzae riẹ.”—AHWO ẸFISỌS 5:33.

EPANỌ OHWO Ọ SAE RỌ RRIA DHEDHẸ KUGBE AMỌFA

“Nyasiọ evedha ba re whọ siọ ofu-omuo ba; whọ jọ eva e dha owhẹ re whọ nyai ru oware umuomu hu.”—OLEZI 37:8.

Nọ whọ tẹ be hai ru oware nọ Ebaibol na ọ ta, who ti wo irere buobu enẹna je yeri uzuazọ evawere evaọ obaro. Ma rẹ jọ Ebaibol na ruẹ emamọ eware nọ Ọghẹnẹ ọ ya eyaa rai kpahe obaro wọhọ

UDHEDHẸ GBE OMOFỌWẸ

“Eva e te were ae gaga fiki udhedhẹ nọ o dafia.”—OLEZI 37:11.

AHWO KPOBI A TI WO UWOU OBỌRAI GBE EMU NỌ A RẸ RE

“A te bọ iwou, a vẹ te rria eva rai, a te kọ egbọ evaene a vẹ te re ibi rai.”—AIZAYA 65:21.

UWHU GBE ẸYAO E TE GBẸ JỌ HỌ

“Uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha.”—EVIAVIA 21:4.

Eme u fo nọ who re ru re whọ sae reawere uzuazọ nana evaọ obaro? Iviena se uzou nọ o rrọ aro na.

a Re whọ gbẹ riẹ kpahe evẹrẹ nọ a fa Ebaibol na fihọ no gbe epanọ ahwo a wo rie bu te no, kpohọ oria itanẹte mai www.jw.org, rri oria UWUHRẸ EBAIBOL > IKUIGBE GBE EBAIBOL NA.

b Re who gbe wuhrẹ kpahe ẹme nana, rri uzou avọ 9 obe na The Bible—God’s Word or Man’s? onọ Isẹri Jihova a kere. Ọ rrọ oria itanẹte mai www.jw.org. Rri oria EBE GBE EWARE EFA > EBE GBE IBROSHỌ.