Eme Eware Nana Kpobi I Dhesẹ?

JESU KRISTI ọ ta nọ a re ti vuhu “urere akpọ na” mu ẹkwoma ẹmo, ohọo, ẹyao, gbe etọ nọ i re nuhu.—Matiu 24:1-8; Luk 21:10, 11.

Anwọ 1914 ze, uzuazọ o tahaku no fiki emo nọ erẹwho gbe uyẹ sa-sa a bi fi, ẹsibuobu fiki isu-egagọ nọ i bi du oma họ esuo, yọ enẹna ozighi ọkparesuọ nọ o vọ oria kpobi o be taha uzuazọ ahwo ku.

Ghelọ ẹnyaharo evaọ ona nọ a re ro ru emuore bu, ohọo ogaga u gbe bi kpe ima ahwo buobu nẹnẹ nya otọakpọ wariẹ. Kukpe kukpe, ima ahwo buobu a bi whu fiki ohọo.

Ẹyao nọ o re vo ọ rrọ abọjọ oka nọ Jesu ọ kẹ na re. Nọ Ẹmo Akpọ I ọ vrẹ no, ẹyao ọtehekọ o kpe ahwo nọ a bu vi 21,000,000. Wo ohẹriẹ no eyao nọ i re kpomahọ umutho okegbe jọ ọvo evaọ oke nọ o vrẹ, ẹyao nana o du obọ te erẹwho wariẹ otọakpọ na họ jegbe ikoliko nọ i dhere dede. AIDS o bi du obọ te oria kpobi evaọ akpọ na nẹnẹ, yọ tuberculosis, uliaro, ẹyao ibiaro, gbe ẹyao owezẹ e gbẹ rrọ otọ evaọ erẹwho nọ i bi rovie aro ze.

Wọhọ epanọ iyẹrẹ e ta, etọ, te esese te ilogbo nọ i nuhu nọ e be roma via kukpe kukpe i bu te idu buobu. Ghelọ ekwakwa nọ a rẹ rọ riẹ eria nọ etọ i ti jo nuhu gbe ekwakwa iyẹrẹ-enẹ nọ a rẹ rọ vuẹ ahwo kpahe ae, ẹsikpobi ma gbẹ be jọ usi yo okpẹtu nọ ọ be via fiki etọ nọ i nuhu evaọ oria nọ ahwo a rrọ buobu.

Ebaibol na e tẹ jẹ ruẹaro nọ: “Rekọ riẹ onana, nọ eva edẹ urere oke ẹbẹbẹ te tha, keme ahwo a re ti you oma-obọrai, je you igho, a ve ti heri-oheri avọ oma-ovia gbe ekaela, a re ti yo ẹme e nọ i yẹ rai hi, a rẹ te jọ ababọ uyere-ọghọ gbe ababọ ẹfuọ, a wo eva egaga, a re koko eya ha, a rẹ raha odẹ ahwo, a wo oma-onyẹ hẹ, avọ ofu-ọkpoo, a re mukpahe ahwo ezi, otu ovivie, avọ uzou-uveghe, otu okpiro, enọ i yowọ enu-awere siọ Ọghẹnẹ ba, a rẹ yọrọ oghẹrẹ egagọ a vẹ vro ogaga nọ o rọ eva riẹ. Si oma no oghẹrẹ ahwo otiọye.”—2 Timoti 3:1-5.

Kọ whọ gbẹ rọwo nnọ ma be rria “oke ẹbẹbẹ”?

Kọ who muẹrohọ no inọ ahwo a bi you omobọ rai viere nẹnẹ, bi you igho, avọ omoya?

Ono ọ rẹ vro riẹ inọ akpọ na ọ vọ avọ ahwo nọ a wo oriobọ gbe ababọ uyere-ọghọ, nọ a re koko eyaa ha, ababọ ẹfuọ?

Kọ whọ riẹ inọ aghẹmeeyo kẹ esẹgbini avọ ababọ-uyoyou u vi haro te epanọ a sai gbiku riẹ hẹ no, orọnikọ evaọ umutho eria jọ ọvo ho rekọ evaọ akpọ na soso?

Ababọ avro, who vuhumu inọ ma be rria akpọ nọ ọ be rehọ uyoyou omaweromẹ wholo, rekọ nọ o kare uyoyou ewoma. Ere Ebaibol i dhesẹ iruemu nọ e te da oria kpobi fia evaọ “edẹ urere” na.

Kọ ma gwọlọ imuẹro efa re ma tẹ riẹ etoke nọ ma be rria na? Jesu ọ tẹ jẹ ruẹaro inọ evaọ etoke ọvo nana, a rẹ te ta usiuwoma Uvie Ọghẹnẹ evaọ otọakpọ na kpobi. (Matiu 24:14) Kọ a bi ru ere?

Uwou-Eroro Na, emagazini nọ a kere no Ebaibol ze onọ a bi ro whowho emamọ usi Uvie Jihova, a bi kere iei kẹse kẹse evaọ evẹrẹ nọ i bu vi onọ a bi ro kere emagazini efa kpobi.

Kukpe kukpe, Isẹri Jihova a be raha bu vi euwa ima-odu ro se isẹri kẹ amọfa kpahe Uvie Ọghẹnẹ.

Enẹna, Isẹri Jihova a bi kere ebe nọ a bi ro ru Ebaibol na vẹ evaọ evẹrẹ 400, makọ evẹrẹ nọ umutho ahwo jọ nọ e rrọ imivu akpọ na a be jẹ. Isẹri Jihova a wha emamọ usi na te erẹwho akpọ na kpobi no; yọ a ta usiuwoma na no re evaọ ikoliko gbe ekwotọ nọ e kawo vi enọ egọmeti akpọ na i re mu ẹro họ. Evaọ ekwotọ buobu, a wo emamọ omaa uwuhrẹ Ebaibol ikẹse kẹse nọ o kẹre te iwuhrẹ, ikokohọ, gbe usiuwoma ota.

Evaọ uzẹme, a bi whowho emamọ usi Uvie Ọghẹnẹ evaọ otọakpọ na soso, orọnikọ re a ku akpọ na rẹriẹ hẹ, rekọ re a ro se isẹi kẹ ae. A be kẹ ahwo nọ e rrọ oria kpobi uvẹ re a dhesẹ sọ a be daezọ ọnọ ọ ma idhiwu gbe otọakpọ na, gbe sọ a te rọ adhẹẹ kẹ izi riẹ je dhesẹ uyoyou kẹ erivẹ rai.—Luk 10:25-27; Eviavia 4:11.

Kẹle na, Uvie Ọghẹnẹ u re ti si emuemu kpobi no otọakpọ na je ru ei fihọ aparadase akpọ-soso.—Luk 23:43.

[Ẹkpẹti nọ o rrọ ẹwẹ-obe avọ 6]

Edẹ Urere erọ Eme?

Orọnikọ edẹ urere ohwo-akpọ họ. Rọkẹ enọ i bi ru oreva Ọghẹnẹ, Ebaibol na e kẹ ẹruore ẹria ebẹdẹ bẹdẹ.—Jọn 3:16, 36; 1 Jọn 2:17.

Orọnikọ edẹ urere otọakpọ na ha. Ẹme Ọghẹnẹ ọ yaa eyaa nọ otọakpọ na o rẹ te jọ bẹdẹ bẹdẹ.—Olezi 37:29; 104:5; Aizaya 45:18.

Ukpoye, enana yọ edẹ urere erọ uyerakpọ ozighi nana nọ o kare uyoyou na, gbe orọ enọ e be talamu idhere riẹ.—Itẹ 2:21, 22.

[Ẹkpẹti/Uwoho nọ e rrọ ẹwẹ-obe avọ 7]

Kọ Ebaibol na Ghinọ Ẹme Ọghẹnẹ?

Eruẹaro Ebaibol na a kere unuẹse buobu nọ: “Enẹ ỌNOWO na ọ tae.” (Aizaya 43:1; Jerimaya 2:2) Makọ Jesu Kristi, Ọmọ Ọghẹnẹ, o fi ẹgba họ iẹe nnọ ‘ọ rehọ udu obọ riẹ ta ẹme he.’ (Jọn 14:10) Ebaibol na omariẹ e ta vevẹ nọ: “Ọghẹnẹ o gie ẹwolo ku ikereakere na kpobi.”—2 Timoti 3:16.

Obe ofa o riẹ hẹ nọ a kere evaọ evẹrẹ nọ i bu te ere—bu vi evẹrẹ 2,200, wọhọ epanọ United Bible Societies o niyẹrẹ. Uvumọ obe ofa o riẹ hẹ nọ a ghale bu te ere no—bu vi ima-idu ene. Kọ ogbẹrọnọ oye họ oware nọ who re rẹro riẹ kpahe ovuẹ nọ u no obọ Ọghẹnẹ ze kẹ ahwo-akpọ kpobi?

Rọkẹ ẹmeọta okokodo ọrọ imuẹro na inọ Ebaibol na yọ obe nọ a rehọ ẹgba ẹzi Ọghẹnẹ kere, rri obe na The Bible—God’s Word or Man’s?, onọ Isẹri Jihova a kere.

Who te bi se Ebaibol na avọ ovuhumuo inọ ghinọ Ẹme Ọghẹnẹ o rrọ, who ti wo erere gaga.

[Ẹkpẹti/Uwoho nọ o rrọ ẹwẹ-obe avọ 8]

Eme Họ Uvie Ọghẹnẹ?

Oye họ egọmeti obọ odhiwu onọ Ọghẹnẹ uzẹme na, Jihova, Ọnọma odhiwu gbe otọakpọ na, o bi su.—Jerimaya 10:10, 12.

Ebaibol na e fodẹ Jesu Kristi wọhọ ọnọ Ọghẹnẹ ọ rehọ udu esuo na kẹ. (Eviavia 11:15) Okenọ ọ jọ otọakpọ, Jesu o dhesẹ inọ o wo ogaga igbunu nọ Ọghẹnẹ ọ kẹ riẹ—ogaga nọ ọ rẹ rọ kpọ ẹkporo gbe ofou, nọ o re ro siwi oghẹrẹ eyao kpobi, gbe onọ ọ rẹ rọ tubẹ kpare iwhuowhu. (Matiu 9:2-8; Mak 4:37-41; Jọn 11:11-44) Eruẹaruẹ Ebaibol nọ a rọ ẹgba ẹzi kere e ta inọ Ọghẹnẹ ọ te jẹ rehọ “isuẹsu gbe oruaro gbe uvie rọ [kẹe], re ahwo kpobi, erẹwho gbe evẹrẹ kpobi, re a ruẹse gọ e.” (Daniẹl 7:13, 14) A se egọmeti yena Uvie obọ odhiwu; obọ odhiwu Jesu Kristi ọ be rehọ udu esuo riẹ su no ze.

[Iwoho nọ e rrọ ẹwẹ-obe avọ 7]

Ewhowho emamọ usi na wariẹ akpọ-soso