Ẹvẹ Who Rri Ebaibol Na?

OWARE NỌ EBAIBOL NA Ọ TA

“Ẹkwoma ẹzi Ọghẹnẹ a ro kere Ikereakere na kpobi.”​—2 Timoti 3:16, Efafa Akpọ Ọkpokpọ.

IRERE NỌ I RE TE OWHẸ NỌ WHỌ TẸ RỌWO NỌ EBAIBOL NA YỌ ẸME ỌGHẸNẸ

U ti fiobọhọ kẹ owhẹ ruẹ iyo enọ jọ nọ i wuzou gaga evaọ uzuazọ.​—Itẹ 2:1-5.

Whọ te jọ eva riẹ ruẹ ehrẹ nọ e te kpọ owhẹ evaọ uzuazọ.​—Olezi 119:105.

Who ti wo obọdẹ ẹruore.​—Ahwo Rom 15:4.

KỌ MA SAI GINE FIEVAHỌ OWARE NỌ EBAIBOL NA Ọ TA?

Ee, fiki eware esa jọ:

• Oma Ebaibol na kpobi o rọwokugbe. Ezae 40 i kere Ebaibol na, yọ o rehọ etoke nọ o vrẹ ikpe odu ọvo gbe egba ezeza (1,600). Ibuobu ahwo nana a ruẹ ohwohwo ẹdẹvo ho. Ghele na, oma Ebaibol na soso o rọwokugbe, yọ uzoẹme ovo o dhẹ riẹ duwu.

• Ikuigbe uzẹme. Nọ otu nọ o re gbiku a tẹ be ta kpahe orẹwho rai, a rẹ ta kpahe eware nọ i kie kpe ai hi. Rekọ ahwo nọ a kere Ebaibol na a kere kpahe ethobọ obọrai gbe erọ orẹwho rai.​—2 Iruẹru-Ivie 36:15, 16; Olezi 51:1-4.

• Eruẹaruẹ nọ a re fievahọ. Ebaibol na ọ ruẹaro kpahe ọraha nọ o ti te okpẹwho Babilọn. A ruẹaro nana fihotọ ikpe udhusoi akuava (200) taure o tẹ te via. (Aizaya 13:17-22) Orọnikọ eruẹaruẹ na e ta kpahe oghẹrẹ nọ a te rọ raha Babilọn ọvo ho, rekọ e tubẹ fodẹ odẹ ovie nọ ọ te raha iẹe.​—Aizaya 45:1-3.

  Eruẹaruẹ efa buobu evaọ Ebaibol na e r’obọ kotọ rugba re. Kọ o gbẹ ginẹ rọnọ enẹ Ẹme Ọghẹnẹ ọ rẹ jọ?​—2 Pita 1:21.