Eme Ebaibol na Ọ Ta Kpahe Emema nọ A re Guzou Kpotọ Kẹ?

A jọ oria nọ a rẹ jọ niyẹrẹ eware sa-sa nọ ahwo Katọlik a bi ru ta oware jọ nọ o via evaọ ẹdẹ avọ 25 Asa 2022. Ẹdẹ yena, olorida egagọ Katọlik nọ a re se Pope Francis ọ jọ oria egagọ rai nọ a re se St. Peter’s Basilica dikihẹ aro ẹmema Meri. Ọ tẹ “faro, guzou kpotọ jẹ lẹ.” Ọ “lẹ se Meri” inọ jọ o ru re a wo udhedhẹ. A jọ oria evuẹ itanẹte Katọlik ta re nọ, “Pope na ọ lẹ nọ jọ udu ahwo-akpọ kpobi, maero kọ orọ ahwo Russia avọ Ukraine o jọ fuafo wọhọ udu Meri nọ o rrọ fuafo na.”

Ẹvẹ who roro? Kọ u fo re ma guzou kpotọ kẹ jẹ lẹ se emema, iwoho gbe eware efa itieye? Rri oware nọ eria Ebaibol nana e ta:

• “Who re wo ẹmema nọ a kare kẹ omara vievie he hayo uwoho jọ nọ o wọhọ oware jọ evaọ obọ idhiwu na, hayo evaọ otọakpọ na hayo evaọ ame nọ ọ rrọ obotọ otọakpọ na. Who re guzou kpotọ kẹ ae vievie he hayo wo isiuru inọ whọ rẹ gọ ae he, keme mẹ, Jihova Ọghẹnẹ ra, mẹ yọ Ọghẹnẹ nọ ọ gwọlọ omarọkẹ riẹriẹriẹ.”—Ọnyano 20:4, 5.a

• “Isiliva gbe igoru a ro ru emedhọ rai, iruo abọ ahwo-akpọ. A wo unu, rekọ a rẹ sae ta ẹme he; a wo ibiaro, rekọ a rẹ sae ruẹ ude he; a wo ezọ, rekọ a rẹ sai yo ẹme he; a wo inwe, rekọ a rẹ sai yo ore he; a wo abọ, rekọ a rẹ sai kru oware he; a wo awọ, rekọ a rẹ sae nya ha; a rẹ sae rọ edhuru rai ru edo ọvuọvo ho. Ahwo nọ a ru rai a te jọ wọhọ e rai.”—Olezi 115:4-8.

• “Mẹ họ Jihova. Odẹ mẹ oye; Mẹ rẹ ghale oruaro mẹ kugbe omọfa ha, hayo rehọ ujiro mẹ kẹ ẹmema nọ a kare he.”—Aizaya 42:8, ẹme-oruvẹ.

• “Kẹnoma kẹ ẹdhọgọ.”—1 Ahwo Kọrint 10:14.

• “Wha kẹnoma kẹ emedhọ.”—1 Jọn 5:21.

Whọ tẹ gwọlọ gbẹ riẹ kpahe oware nọ Ebaibol na ọ ta kpahe emema hayo iwoho nọ a re guzou kpotọ kẹ jẹ le se, se uzoẹme na “The Bible’s Viewpoint—Images” (Oware nọ Ebaibol na Ọ Ta Kpahe Emema) hayo rri ividio na Kọ O rẹ Were Ọghẹnẹ nọ A tẹ be Rọ Emema Gọe?

Se izoẹme nana re whọ ruẹ oware nọ Ebaibol na ọ ta re:

• “Eme Ebaibol na Ọ Ta Kpahe Meri, Ọmọtẹ-Kọkọ Na?”

• “Should You Pray to the Virgin Mary?” (Kọ U fo re Whọ Lẹ Se Meri Ọmọtẹ-Kọkọ Na?)

• “Miracles and Apparitions—Signs From God?” (Kọ Obọ Ọghẹnẹ Eware Igbunu Hayo Eware Oka I bi No Ze?)

• “Udhedhẹ Akpọ-Soso—Ẹvẹ O te rọ Ze?”

Photo credit: Vincenzo Pinto/AFP via Getty Images