Aizaya 42:8—“Mẹ Họ ỌNOWO Na”

Mẹ họ Jihova. Odẹ mẹ oye; mẹ rẹ rehọ oruaro mẹ kẹ omọfa ha, hayo rehọ ujiro mẹ kẹ ẹmema nọ a kare he.”—Aizaya 42:8, Efafa Akpọ Ọkpokpọ.

“Mẹ họ ỌNOWO na, oyehọ odẹ mẹ; mẹ rẹ rehọ oro mẹ kẹ omọfa ha, hayo rehọ ejiro mẹ kẹ edhọ nọ a kare he.”—Aizaya 42:8, Ebaibol Ẹri Na.

Otofa Eme nọ E Rrọ Aizaya 42:8

Ọghẹnẹ ọ jọ oria Ebaibol nana vuẹ omai odẹ riẹ, ọ tẹ jẹ vuẹ omai nọ ma rehọ emema rọ gọe he.

Ọghẹnẹ o mu odẹ nana kẹ omariẹ, yọ “Jehovah” a fa riẹ evaọ Ebaibol Oyibo buobu.a (Ọnyano 3:14, 15) Odẹ na o romavia enwenọ isia idu ihrẹ (7,000) evaọ Ọvọ Anwae na, (Ikereakere Hibru avọ Aramaik), rekọ efefafa buobu a si odẹ na no a tẹ rehọ “ỌNOWO” hayo “OLORI” nọ a rọ ibieme ikpokpoko kere ro nwene iei. Oria utiona jọ họ Olezi 110:1, nọ a jọ fodẹ eruẹaruẹ jọ nọ i kiekpahe Jihova avọ Jesu. Evaọ Ebaibol Ẹri Na, oria nana o ta nọ: “ỌNOWO [Jihova] ọ ta kẹ ỌNOWO mẹ [Jesu] nọ: ‘Keria obọze mẹ, bẹsenọ me re ti ru ewegrẹ ra họ akpala-uthiawọ ra.’” (Iruẹru Ikọ 2:34-36) Rekọ a jọ Efafa Akpọ Ọkpokpọ na fa oria nana evaọ oghẹrẹ nọ u gbe ro reghe ohwo ho, keme a fi Ọnowo ivẹ fihọ oria nana ha, ukpoye a fi odẹ Ọghẹnẹ fihọ oria nọ u fo nọ o rẹ jọ. Oria nana o ta nọ: “Jihova ọ ta kẹ Olori mẹ nọ: ‘Keria obọze mẹ bẹsenọ me re ru ewegrẹ ra họ akpala nọ whọ rẹ rọ awọ ra kpahe.’”

Egba-uwuhrẹ buobu a rọwo nọ otofa odẹ na họ, “O re Ru Zihe Ro.” Jihova Ọghẹnẹ uzẹme na ọvo ọ rẹ sai wo odẹ nana, keme ọye ọvo họ ọnọ ọ rẹ sai ru omariẹ gbe emama riẹ zihe ro oware kpobi nọ o gwọlọ re o ru ẹjiroro riẹ gba.

Nọ orọnọ Ọghẹnẹ họ ọnọ ọ ma eware kpobi, ọ tẹ jẹ rrọ Ọghẹnẹ uzẹme ọvo na, u fo nọ ọye ọvo ma rẹ gọ. Ma rẹ gọ emema hayo oware ofa jọ họ.—Ọnyano 20:2-6; 34:14; 1 Jọn 5:21.

Eme nọ E Wariẹ Aizaya 42:8 Họ

Evaọ eme nọ e rrọ emuhọ Aizaya 42 na, Jihova ọ ta kpahe iruo nọ odibo riẹ nọ ọ “salọ” o ti ru. Ọghẹnẹ ọ ta nọ odibo riẹ nana nọ ọ jẹrehọ na “ọ te wha uvioziẹ ziọ erẹwho na.” (Aizaya 42:1) Ọghẹnẹ ọ ta kpahe eyaa yena nọ: “Enẹna, me bi whowho eware ekpokpọ. Mẹ be vuẹ owhai kpahe ae taure e tẹ te romavia.” (Aizaya 42:9) Nọ ikpe buobu e vrẹ no, eruẹaruẹ kpahe odibo nọ Ọghẹnẹ ọ “salọ” na i te rugba evaọ okenọ Mesaya na, hayo Kristi, ọ ziọ akpọ na je ku iruo odibọgba riẹ họ no.—Matiu 3:16, 17; 12:15-21.