HAI ROU!
Ẹmo Obọ Ukraine Ọ be Lẹliẹ Ohọo Ga Evaọ Akpọ-Soso
Evaọ ẹdẹ avọ 19 Asoi 2022, ahwo ologbo egọmeti nọ a bu te udhosa gbe ikpegbisoi a ta kẹ ukoko nọ a re se United Nations Security Council inọ, “ẹmo nọ ọ rrọ obọ Ukraine na o bi ru ohọo nọ COVID-19 gbe ẹrrorro ọgaga akpọ soso ọ wha ze ga viere.” U gbe kri hi, a tẹ jọ obe-usi nọ a re se The Economist ta nọ “ẹmo na o bi ru nọ ohọo ogaga u ti je ro kpe ahwo buobu evaọ akpọ nana nọ ebẹbẹ efa e da fia na.” Ebaibol na ọ ta nọ ohọo ogaga u ti mu evaọ oke mai na, o tẹ jẹ fodẹ epanọ ma te sai ro thihakọ ẹbẹbẹ nana.
Ebaibol ọ ta nọ ohọo u ti mu
Jesu ọ ta nọ: “Orẹwho o te kpareso orẹwho, uvie o te kpareso uvie, yọ no oria ruọ oria ohọo u ti mu.”—Matiu 24:7.
A jọ obe Eviavia ta kpahe edhẹ-enyenya ene nọ a ro dhesẹ oghẹrẹ eware nọ e te via. Ọjọ o dikihẹ kẹ ẹmo. Ọfa nọ o dikihẹ kẹ ohọo ọ tẹ rọ kpahe iẹe. Onana u dhesẹ oke nọ emu ọ te rọ jọ ghaghae, nọ o te sai ro te ahwo kpobi obọ họ. Ebaibol ọ ta nọ: “Mẹ tẹ ruẹ esi obiebi jọ, yọ ọnọ ọ be dhẹ e na owawọ-eware o rọ obọ riẹ, me te yo edo nọ ọ wọhọ uru . . . nọ o ta nọ, ‘Omodhe eka họ osa iruo okpẹdẹ; imidhe esa ẹgu-ọka họ osa iruo okpẹdẹ.’”—Eviavia 6:5, 6, Ebaibol Ẹri Na.
Eruẹaruẹ Ebaibol nana nọ e ta kpahe emu nọ ọ te jariẹ tere he na o bi rugba evaọ oke mai nana nọ Ebaibol o se “edẹ urere na.” (2 Timoti 3:1) Whọ tẹ gwọlọ gbẹ riẹ kpahe “edẹ urere na” gbe edhẹ-enyenya ene nọ a fodẹ evaọ obe Eviavia na, rri ividio na, Akpọ na O Nwene No Anwọ Ukpe 1914 Ze Na re who je se uzoẹme na, “Edhẹ-Enyenya Ene Na—Yọ Amono?”
Epanọ Ebaibol ọ sai ro fiobọhọ kẹ owhẹ
Ehrẹ buobu e rrọ Ebaibol na nọ e rẹ sai fiobọhọ kẹ owhẹ thihakọ ebẹbẹ nọ e make rrọ gaga, te ọrọ emu nọ ọ riẹ tere he hayo nọ o bi dhe ẹghẹghare na. Rri ehrẹ Ebaibol na jọ evaọ uzoẹme na, “Epanọ Whọ Sae rọ Maneji Ugho.”
Ebaibol ọ ta nọ eware i ti woma evaọ obaro. O ta nọ evaọ obaro, “emu ọ te dafia evaọ otọakpọ na,” yọ ohwo kpobi ọ te re eva vọ. (Olezi 72:16) Ebaibol ọ ta kpahe eware iwoma buobu nọ Ọghẹnẹ o ti ru kẹ omai evaọ obaro gbe oware nọ o lẹliẹ omai riẹ nọ o ti gine ru ai. Se kpahe iẹe evaọ uzoẹme na “Ẹruore nọ Ma Wo Kpahe Obaro Na.”