Ahwo Egọmeti A be Vẹvẹ Unu nọ Amagidọn Ọ be Tha—Eme Ebaibol na Ọ Ta?

Evaọ ohiohiẹ Ẹdọvo-Oka amara Akpe 10, 2022, isoja Russia a gbolo ebọmbo fihọ ewho sa-sa evaọ Ukraine. A rọ evedha ru onana fikinọ edẹ ivẹ nọ i kpemu, ahwo jọ a sa akwa nọ a re ro no Russia ruọ Crimea raha. Eware nana e via nọ ahwo egọmeti a nwane vẹvẹ unu nọ Amagidọn ọ be tha no.

• “Amagidọn o ri te otọ enẹ ẹdẹvo ho anwọ oke [osu America nọ a re se John F.] Kennedy, nọ ẹmo o je ti ro duwu lahwe fiki ozighi Cuban Missile Crisis na. . . . Me roro nọ u wo oghẹrẹ ọvo nọ a rẹ sa ebọmbo ọraha-muotọ nọ Amagidọn ọ gbẹ rọ romavia ha ha.”—Prẹsidẹnte America nọ a re se Joe Biden, Akpe 6, 2022.

• “Mẹ rọwo nọ Amagidọn o ti noi ze dẹe, oware uyoma o te via kẹ akpọ na soso.”—Prẹsidẹnte Ukraine nọ a re se Volodymyr Zelensky ọye ọ ta ẹme nana nọ a nọe kpahe oware nọ o re noi ze nọ a tẹ sa ebọmbo ọraha-muotọ, BBC News, Akpe 8, 2022.

Kọ ahwo-akpọ a tẹ rọ ebọmbo ọraha-muotọ fi ẹmo, oye o te wha Amagidọn ze? Eme Ebaibol na ọ ta?

Kọ ebọmbo ọraha-muotọ oye o te wha ẹmo Amagidọn ze?

Ijo. Oria ọvo nọ whọ rẹ sae jọ ruẹ ẹme na “Amagidọn” họ, obe Eviavia 16:16. A rehọ ẹme na dhesẹ ẹmo orẹwho avọ orẹwho ho, ukpoye a rehọ e riẹ dhesẹ ẹmo nọ Ọghẹnẹ o ti fi kugbe “ivie otọakpọ na soso.” (Eviavia 16:14) Ọghẹnẹ ọ te rehọ ẹmo Amagidọn raha esuo ohwo-akpọ kpobi no.—Daniẹl 2:44.

Re whọ gbẹ riẹ kpahe oware nọ o te via kẹ ahwo-akpọ evaọ ẹmo Amagidọn, se uzoẹme nana Eme Họ Ẹmo Amagidọn?

Kọ ebọmbo ọraha-muotọ e te raha otọakpọ na gbe ahwo no?

Ijo. Dede nọ isu ahwo-akpọ a sae rehọ ebọmbo ọraha-muotọ fi ẹmo evaọ obaro, Ọghẹnẹ ọ te kuvẹ re a raha otọakpọ na no ho. Ebaibol na ọ ta nọ:

• “Otọakpọ na o rẹ jọ bẹdẹ bẹdẹ.”—Ọtausiuwoma Na 1:4.

• “Ahwo okiẹrẹe na a te rọ otọakpọ na reuku, yọ a te rriae bẹdẹ bẹdẹ.”—Olezi 37:29.

Rekọ eruẹaruẹ Ebaibol gbe eware nọ e be via enẹna i dhesẹ nọ kẹle na eware i ti nwene kẹ ahwo-akpọ riẹriẹriẹ. (Matiu 24:3-7; 2 Timoti 3:1-5) Re who gbe wuhrẹ kpahe oware nọ Ebaibol na ọ ta kpahe obaro na, kpohọ oria nana re who wuhrẹ Ebaibol na ọvọvẹ.