Kọ Orẹwho Izrẹl Ẹmo Amagidọn O ti jo Muhọ?—Eme Ebaibol na Ọ Ta?

Ebaibol na o dhesẹ nọ Amagidọn yọ ẹmo nọ Ọghẹnẹ avọ egọmeti ahwo-akpọ a ti fi. Ẹmo na o ti te oria kpobi evaọ akpọ na orọnikọ oria jọ ọvo a ti jo fi ei hi.

• “Enana yọ eme nọ i no obọ idhivẹri ze. . . . A tẹ nyabru ivie otọakpọ na soso, re a koko ae họ kẹ ẹmo ẹdẹ ologbo Ọghẹnẹ Erumeru na. . . . A te koko ae họ kpohọ oria nọ a rẹ rọ ẹvẹrẹ Hibru se Amagidọn.”—Eviavia 16:14, 16.

Ẹme na “Amagidọn” o no ẹme Hibru nọ a re se Har Meghid·dohnʹ ze, yọ otofa riẹ họ “Ugbehru Mẹgido.” Evaọ oke anwae, Mẹgido yọ odẹ ẹwho jọ evaọ ẹkwotọ Izrẹl. Fikiere ahwo jọ a re roro nọ Izrẹl a te jọ fi ẹmo Amagidọn. Rekọ ubrotọ Mẹgido hayo erẹwho nọ e rrọ ofẹ ovatha-ọre na e rro te epanọ e sae rọ gba “ivie otọakpọ na soso” gbe egbaẹmo rai hi.

“Eka” a ro dhesẹ eware nọ e te via evaọ obaro kẹ Jọn evaọ obe Eviavia. (Eviavia 1:1) Amagidọn yọ oria jọ dẹe he, rekọ ẹmo nọ erẹwho akpọ na soso a te jọ họre wọso Ọghẹnẹ.—Eviavia 19:11-16, 19-21.