Enọ I bi Se Ebe Mai A Nọ Inọ

Diẹse A Te Jọ Fi Ẹmo Amagẹdọn?

Orọnikọ ugogo oria jọ a te jọ fi ẹmo Amagẹdọn ho. Ukpoye, otọakpọ na soso a te jọ fi ei. Fikieme? Fikinọ eko ahwo ivẹ nọ i bi ti fi ẹmo na a bu vrẹ epanọ a sae rọ jọ ugogo oria ovo jọ.

A se Amagẹdọn “ẹmo ologbo Ọghẹnẹ Erumeru na” re. Jihova Ọghẹnẹ ọ te rehọ Ọmọ riẹ, Jesu Kristi koko ogbaẹmo ijẹle họ lele isu imuomu otọakpọ na soso họre.—Eviavia 16:14; 19:11-16.

Setan ọ te rọ oghẹrẹ jọ bẹbẹ erẹwho akpọ na kpobi họ ruọ ohọre na. Ebaibol na e ta kpahe “izi ukumuomu” nọ a vi ruọ akpọ na “re a koko ivie akpọ na kpobi họ . . . oria nọ a rẹ rọ unu Hibru se nọ Amagẹdon.”—Eviavia 16:14-16.

Evaọ oma Ebaibol na kpobi, obe Eviavia o mae rrọ use-abọ kẹ ahwo buobu re a riẹ otọ riẹ. Ibuobu nọ e rehọ eware nọ a fodẹ evaọ obe Eviavia na wọhọ eware oka ha, a tẹrovi oria jọ nọ a roro nọ ẹmo Amagẹdọn na ọ te jọ muhọ, bi muẹrohọ eware kpobi nọ e rrọ okegbe yena soso via kiọkiọkiọ. Evaọ obe jọ nọ ohwo Griki nọ a re se Oeconomus ọrọ ikpe-udhusoi avọ ezeza ọrọ ekele oke mai na o kere kpahe obe Eviavia, ma rẹ ruẹ eriwo nọ u dhesẹ Amagẹdọn wọhọ ugogo oria jọ.

Ọnowuzou ogbẹgwae Dallas Theological Seminary vẹre, John F. Walvoord ọ ta eriwo otu isu-egagọ nọ e talamu iwuhrẹ egagọ rai nọ i notọ ze inọ Amagẹdọn yọ “ẹmo urere nọ akpọ nọ eware e vẹso no o ti fi evaọ obọ Udevie Ovatha-Ọre.” Ẹwho Mẹgido ọrọ oke anwae nọ u wo ugbehru nọ o rehọ irula udhosagbikpe kpehru vi ukiekpotọ opraprara nọ o wariẹ e riẹ họ họ oria nọ Walvoord ọ ta nọ a te jọ fi ẹmo ologbo nana.

Dede na, obe Eviavia o rrọ obe udhesẹ-oria nọ ohwo o re ro vuhu ugogo oria jọ nọ a re se Amagẹdọn ho. Emuhọ obe na o ta nọ eware nọ e rrọ obe Eviavia na yọ eware “oka.” (Eviavia 1:1, NW) U kri no nọ Isẹri Jihova a rọ jọ obe rai jọ nọ a re se Studies in the Scriptures, Uko avọ Ene ta nọ: “Ma re rẹro nọ a ti koko ahwo-akpọ fihọ ugbehru Mẹgido ho.”

Eware nọ e via evaọ oke nọ u kpemu evaọ ugbehru Mẹgido i dhesẹ inọ ọwegrẹ Ọghẹnẹ ọvuọvo ọ rẹ sae vabọ họ. Fikiere, eva Amagẹdọn, Ọghẹnẹ ọ te ruẹ nọ o si koghẹrẹ koghẹrẹ ogbekuo gbe uzioraha kpobi notọ akpọ na kpobi riẹriẹriẹ.—Eviavia 21:8.

U fo re ahwo nọ a you Jihova Ọghẹnẹ gbe Ọmọ riẹ Jesu Kristi a dhozọ Amagẹdọn ho. Ahwo nọ a se inọ a re kurẹriẹ hẹ nọ Ọghẹnẹ o bruoziẹ kpe ọvo ẹmo nana ọ rrọ kẹ. Ẹmo na ọ te salọ ahwo kpe. Ebaibol e ta nọ: “Ọnowo ọ riẹ epanọ o re ro siwẹ ahwo-Ọghẹnẹ.” (2 Pita 2:9) Eyaa omosasọ nọ e rrọ Olezi 37:34 e ta nọ: “Hẹrẹ ỌNOWO whọ nya edhere riẹ, ọ rẹ te kpare owhẹ kpehru re whọ reuku otọ na; nọ a te guọghọ oru-umuomu, whọ te rue riẹ.”