Eware nọ E be Raha Evaọ Akpọ Na—Oware nọ Uvie Ọghẹnẹ U ti Ru Kpahe iẹe

“Eware nọ i bi nwene raha evaọ ehru na o be wha uye se ahwo, ikpewho, gbe eware nọ e rrọ otọakpọ na. Ikpisoi avọ ifou egaga nọ i bi dhe ẹgaga fiki ehru na nọ o bi nwene e be raha iwou ahwo gbe eyerakpọ ahwo evaọ akpọ na soso. Ame abade ọ be ruọruọ vi epaọ anwẹdẹ, yọ onana o sae whae ze nọ emama buobu nọ e rrọ abade na e sai ro whu.”—Inger Andersen, ohwo ologbo jọ evaọ United Nations gbe ọnọ o wuzou UN Environment Programme, Ahrẹ 25, 2023.

Kọ egọmeti akpọ na a te sai kuobọgbe ku ebẹbẹ nọ e rrọ akpọ na soso họ? Kọ a wo ogaga nọ a sai ro ku ai họ riẹriẹriẹ?

Ebaibol na ọ fodẹ egọmeti jọ nọ ọ sai ku ebẹbẹ akpọ na kpobi họ, yọ o ti gine ru ei. Ebaibol na ọ ta nọ, “Ọghẹnẹ obọ odhiwu ọ te rehọ uvie jọ mu,” koyehọ egọmeti nọ o ti su otọakpọ na soso, o ve ti ku ebẹbẹ na kpobi họ. (Daniẹl 2:44) Evaọ okenọ egọmeti yena o ti su, ahwo a gbẹ te “wha ọraha ọvo ze he,” koyehọ, a gbẹ te raha ohwohwo hayo otọakpọ na ha.—Aizaya 11:9.