Oke Vẹ Akpọ na O ti ro Kuhọ?

Uyo nọ Ebaibol na ọ kẹ

Re ma riẹ okenọ akpọ na o ti ro kuhọ, u fo re ma riẹ otọ ẹme nọ a jọ Ebaibol se “akpọ” na. Ẹme Griki nọ a re se koʹsmos nọ a rẹ mae fa “akpọ” na o rẹ mai dhesẹ ahwo-akpọ, maero ahwo nọ a rrọ abọ Ọghẹnẹ hẹ. (Jọn 15:18, 19; 2 Pita 2:5) Ẹsejọ a rẹ rehọ koʹsmos ta kpahe eware nọ ahwo-akpọ na a bi ru.—1 Ahwo Kọrint 7:31; 1 Jọn 2:15, 16.a

Eme họ otọ ẹme na “ekuhọ akpọ na”?

Ẹme na “ekuhọ akpọ na” nọ o romavia evaọ efafa Ebaibol buobu na, a rẹ sae jẹ fae “oke urere uyero-akpọ na.” (Matiu 24:3) Ẹme yena o dhesẹ ekuhọ eware nọ ahwo-akpọ a bi ru, orọnikọ otọakpọ na hayo ahwo-akpọ kpobi hi.—1 Jọn 2:17.

Ebaibol na ọ ta nọ “a ti kpe ahwo omuomu no” re emamọ ahwo a sae reawere otọakpọ na. (Olezi 37:9-11) A te raha ahwo omuomu no evaọ oke “uye ulogbo” na, onọ u ti kuhọ evaọ oke ẹmo Amagidọn.—Matiu 24:21, 22; Eviavia 16:14, 16.

Oke vẹ akpọ na o ti ro kuhọ?

Jesu ọ ta nọ: “Kpahe ẹdẹ gbe auwa yena ohwo ọvo ọ riẹ riẹ hẹ, makọ ikọ-odhiwu hayo Ọmọ na dede, rekọ Ọsẹ na ọvo. (Matiu 24:36, 42) Ọ tẹ jẹ ta nọ, akpọ na o ti kuhọ evaọ okenọ a rẹro riẹ hẹ, “evaọ auwa nọ wha roro ho.”—Matiu 24:44.

O make rọnọ ma sae riẹ uzedhe ẹdẹ gbe auwa na ha na, Jesu ọ fodẹ “oka” hayo eware nọ e te via, nọ u ti dhesẹ etoke nọ ma ti no ruọ ekuhọ akpọ na. (Matiu 24:3, 7-14) Ebaibol na o se etoke nana “oke urere na,” gbe “edẹ urere na.”—Daniẹl 12:4; 2 Timoti 3:1-5.

Kọ oware jọ u ti gbe kiọkọ nọ akpọ na o te kuhọ no?

Ee. Otọakpọ na o te gbẹ jariẹ, keme Ebaibol na ọ ta nọ, “a ti goi no ẹta riẹ hẹ bẹdẹ bẹdẹ.” (Olezi 104:5) Yọ ahwo a te vọ otọakpọ na wọhọ epanọ Ebaibol ọ ta inọ: “Ahwo okiẹrẹe na a te rọ otọakpọ na reuku, yọ a te rriae bẹdẹ bẹdẹ.” (Olezi 37:29) Ọghẹnẹ o ti ru eware kpobi fihọ epanọ ọ jiroro rai evaọ oke emuhọ:

• Akpọ na ọ te jọ Aparadase.—Aizaya 35:1; Luk 23:43.

• Ufuoma gbe ọruẹriọ ọ te jariẹ.—Maeka 4:4.

• Ahwo kpobi a ti wo emamọ iruo.—Aizaya 65:21-23.

• Ahwo a gbẹ te mọ hayo who ho.—Job 33:25; Aizaya 33:24.