Kọ Ọghẹnẹ Ọ Rrọ Oria Kpobi?
Uyo nọ Ebaibol na ọ kẹ
Ọghẹnẹ ọ rẹ sae ruẹ eware kpobi je ru oware kpobi evaọ oria kpobi nọ o were e riẹ. (Itẹ 15:3; Ahwo Hibru 4:13) Rekọ Ebaibol na ọ ta vievie he inọ Ọghẹnẹ ọ rrọ oria kpobi gbe evaọ oma eware kpobi. Ukpoye, u dhesẹ nọ Ọghẹnẹ yọ ohwo, o te je wo oria nọ ọ be rria.
Oghẹrẹ nọ Ọghẹnẹ ọ rrọ: Ọghẹnẹ yọ ohwo ẹzi. (Jọn 4:24) Ahwo-akpọ a rẹ sae ruẹ e riẹ hẹ. (Jọn 1:18) Eruẹaruẹ nọ a jọ ta kpahe Ọghẹnẹ evaọ Ebaibol na i dhesẹ nọ Ọghẹnẹ o wo uzedhe oria ọvo nọ ọ be rria. A jọ oria ọvo dhesẹ iẹe nọ ọ rrọ oria kpobi hi.—Aizaya 6:1, 2; Eviavia 4:2, 3, 8.
Oria nọ Ọghẹnẹ ọ be rria: Ọghẹnẹ ọ be rria oria nọ emama ẹzi e rrọ, onọ u wo ohẹriẹ no eware nọ a ma nọ ma rẹ ruẹ na. Ọghẹnẹ o wo ‘oria nọ ọ be rria evaọ obọ idhiwu’ na. (1 Ivie 8:30) Ebaibol na ọ ta nọ evaọ ẹdẹ jọ, ikọ-odhiwu a “nyaziọ aro Jihova,”a onọ u dhesẹ nọ Ọghẹnẹ o wo uzedhe oria nọ ọ be rria.—Job 1:6.
Otẹrọnọ Ọghẹnẹ ọ rrọ oria kpobi hi, kọ ọ sai gine fiobọhọ kẹ omẹ?
Ee. Ọghẹnẹ ọ be daezọ mai kpobi omomọvo. Dede nọ ọ be rria obọ odhiwu, o re muẹrohọ ahwo kpobi nọ a gwọlọ ru oreva riẹ evaọ otọakpọ na, yọ ọ rẹ thae uke. (1 Ivie 8:39; 2 Iruẹru-Ivie 16:9) Eware nọ e rrọ obotọ na i dhesẹ nọ Jihova ọ be daezọ enọ e be gọe no eva ze:
Okenọ whọ tẹ be lẹ: Jihova o re yo olẹ ra evaọ okioke nọ whọ be rọ lẹ na.—2 Iruẹru-Ivie 18:31.
Okenọ ọkora ọ tẹ rrọ owhẹ oma: “Jihova ọ kẹle enọ e rrọ ọkora; o re siwi enọ e rrọ uweri.”—Olezi 34:18.
Okenọ o tẹ gwọlọ nọ whọ rẹ riẹ oware nọ who re ru: Jihova ọ te rọ Ebaibol na fiobọhọ kẹ owhẹ, onọ u ti “ru owhẹ wo otoriẹ udidi je wuhrẹ owhẹ” oware nọ u fo nọ who re ru.—Olezi 32:8.
Eriwo ọthọthọ nọ ahwo a wo kpahe oria nọ Ọghẹnẹ ọ rrọ
Eriwo ọthọthọ: Ọghẹnẹ ọ rrọ oria kpobi evaọ oma emama.
Uzẹme ẹme na: Ọghẹnẹ ọ be rria otọakpọ na hayo idadeghe nọ ma be ruẹ na ha. (1 Ivie 8:27) Uzẹme riẹ họ, isi gbe eware efa nọ Ọghẹnẹ ọ ma i bi “whowho oruaro Ọghẹnẹ via.” (Olezi 19:1) Ghele na, wọhọ epanọ ohwo nọ ọ rẹ drọ iwoho ọ rẹ rria eva iwoho nọ ọ drọ ha na, ere ọvona Ọghẹnẹ ọ be rria oma eware nọ ọ ma ha. Rekọ ma rẹ sai wuhrẹ oware jọ kpahe ohwo nọ ọ drọ uwoho nọ ma te rri oware nọ ọ drọ. Epọvo na re, eware nọ Ọghẹnẹ ọ ma i bi wuhrẹ omai eware buobu kpahe “oghẹrẹ nọ ọ rrọ,” wọhọ ogaga riẹ, areghẹ riẹ gbe uyoyou riẹ.—Ahwo Rom 1:20.
Eriwo ọthọthọ: Re Ọghẹnẹ ọ sae riẹ eware kpobi je wo ogaga nọ u vi ogaga kpobi, ọ rẹ jọ oria kpobi hrọ.
Uzẹme ẹme na: Ẹzi ọfuafo Ọghẹnẹ yọ ogaga Ọghẹnẹ nọ o bi ro ru iruo. Ọghẹnẹ ọ sae rọ ẹkwoma ẹzi ọfuafo riẹ riẹ je ru oware kpobi evaọ oria kpobi gbe evaọ oke kpobi dede nọ ọyomariẹ ọ rrọ etẹe he.—Olezi 139:7.
Eriwo ọthọthọ: Obe Olezi 139:8 o dhesẹ nọ Ọghẹnẹ ọ rrọ oria kpobi keme o ta nọ: “Me te muvrẹ kpobọ odhiwu, whọ te jọ obei, yọ mẹ tẹ hwa ehwa mẹ fihọ obọ Uki, rri! whọ te jọ obei.”
Uzẹme ẹme na: Orọnikọ oria Ikereakere nana o be ta kpahe oria nọ Ọghẹnẹ ọ rrọ họ. Ukpoye, u bi wuhrẹ omai nọ makọ epanọ oria u siomano te kẹhẹ, Ọghẹnẹ ọ sai fiobọhọ kẹ omai evaọ etẹe.
a Ebaibol na o dhesẹ nọ Jihova họ odẹ Ọghẹnẹ.