ENỌ IZOGE NA
Eme U Fo nọ Mẹ rẹ Riẹ Kpahe Ifoto nọ A re Fihọ Itanẹte?
Who kpohọ ehọlide nọ whọ be jọ reakpọ kuoma, yọ whọ gwọlọ vuẹ egbẹnyusu ra kpobi kpahe iẹe. Ẹvẹ whọ te rọ vuẹ ae na? Kọ . . .
who ti vi ekade nọ a kere eme fihọ se ai omomọvo?
whọ te rọ itanẹte vi uwou se egbẹnyusu ra kpobi?
who ti fi ifoto nọ whọ rehọ họ itanẹte?
Okenọ ọsẹgboni ologbo ra a jọ ọhwa ra, ẹsejọhọ ọrọ ọsosuọ na ọvo ọ jariẹ.
Nọ ọsẹgboni ra a jọ ọhwa ra, ẹsejọhọ ọrọ avọ ivẹ na ọ jariẹ re.
Whaọ obọnana, izoge buobu nọ a kẹ uvẹ inọ a sai fi ifoto rai họ itanẹte, a te ta nọ ọrọ avọ esa na ọ mae were ae. Kọ ere owhẹ re? O tẹ rrọ ere, uzoẹme nana u ti fiobọhọ kẹ owhẹ whaha ebẹbẹ jọ nọ e rẹ sai noi ze.
Irere vẹ e riẹe?
A re vi ai okioke yena. “Mẹ tẹ rrọ erẹ jọ nọ mẹ be jọ reakpọ kuoma hayo nọ mẹ avọ egbẹnyusu mẹ ma te bi wo omawere, mẹ rẹ sai fi ifoto na họ itanẹte okioke yena nọ oma o be were omẹ na.”—Melanie.
O bẹ hẹ. “O lọhọ gaga re me rri ifoto nọ egbẹnyusu mẹ a fihọ itanẹte vi ẹsenọ me re se iwou nọ a rọ itanẹte vi rọ riẹ oware nọ a bi ru.”—Jordan.
U re fiobọhọ kẹ owhai yo mi ohwohwo. “Oria nọ egbẹnyusu gbe ahwo uviuwou mẹ jọ a be rria u thabọ no oria mai. A tẹ be hai fi ifoto rai họ itanẹte kẹse kẹse yọ mẹ be hai rri rai ẹsikpobi, o rẹ jọ wọhọ ẹsenọ mẹ be ruẹ e rai kẹdẹ kẹdẹ!”—Karen.
Ebẹbẹ vẹ i re noi ze?
Ikpehre ahwo a rẹ sai muẹrohọ owhẹ. Whọ tẹ rọ oghẹrẹ ekamẹra hayo ifonu jọ rehọ ifoto, ifoto na e sai dhesẹ oria nọ whọ rrọ. Oria evuẹ itanẹte nọ a re se Digital Trends o ta nọ: “Who te fi ifoto hayo eware efa nọ e rẹ sai dhesẹ oria nọ whọ rrọ fihọ itanẹte, amọfa nọ a wo ekpehre iroro je wo ekwakwa itanẹte nọ a sae rọ riẹ onana, a rẹ sae riẹ oria nọ whọ rrọ dẹẹ.”
Uzẹme riẹ họ, oware nọ o mae rrọ ikpehre ahwo jọ oja họ, sọ whọ rrọ uwou hu. Oria evuẹ Digital Trends o ta nọ u wo oke jọ nọ iji esa jọ e bẹre ruọ iwou ikpegberee soso evaọ okenọ ahwo nọ a rrọ iwou na a jariẹ hẹ. Ẹvẹ a rọ riẹ nọ ohwo ọvo ọ rrọ uwou hu? Iji na a kpohọ itanẹte, a tẹ rọ okwakwa jọ kiẹ gwọlọ oria nọ ahwo na a rrọ, kẹsena a te kpohọ iwou rai nyai tho eware nọ unuigho rai u bu te enaera ima ọgbagbezeza (₦36,000,000).
Whọ sae ruẹ eware etọtọ. Ahwo jọ a wo omovuọ họ, a re fi oware kpobi họ kẹ akpọ rri. Sarah nọ ọ rrọ ikpe ikpegbọ ọ ta nọ: “Nọ who te bi rri eware nọ ahwo nọ whọ riẹ hẹ a fihọ itanẹte, ẹbẹbẹ o re noi ze. O wọhọ ẹsenọ whọ be jọ okpẹwho nọ whọ riẹ hẹ nya ababọ emapo. Whọ sae nyaruọ oria nọ whọ gwọlọ họ.”
Whọ sae raha oke kufiẹ. Ọmọtẹ nọ a re se Yolanda ọ ta nọ: “O rrọ lọlọhọ re whọ hae rọ oke ra kpobi rri ifoto nọ a fihọ itanẹte gbe eware nọ ahwo kpobi a kere. O sai tube te epanọ whọ rẹ rọ rehọ umuvẹ kpobi nọ who wo rri ifonu ra sọ oware okpokpọ jọ o rro riẹ.”
O gwọlọ oma-onyẹ otẹrọnọ who re fi ifoto họ itanẹte
Samantha nọ ọ rrọ ikpe ikpegbọ ọ rọwo fihọ ẹme yena, inọ: “U wo umuo oke nọ me fihọ nọ me re ro kpohọ oria evuẹ nana. O ginẹ gwọlọ oma-onyẹ otẹrọnọ who re fi ifoto họ itanẹte.”
Oware nọ whọ rẹ sai ru
Yọroma kpahe eware nọ i fo ho. Ebaibol na ọ ta nọ: “Me ti fi oware ovuovo nọ u fioka ha họ aro mẹ hẹ.”—Olezi 101:3.
“Ẹsikpobi mẹ rẹ kiẹ eware ahwo nọ mẹ riẹ riwi. Yọ mẹ tẹ ruẹ nọ a be hai fi eware nọ i fo ho họ itanẹte, me re gbe rovie kpohọ oria rai hi.”—Steven.
Kẹnoma kẹ ahwo nọ a wo emamọ uruemu hu, keme a rẹ sae raha owhẹ. Ebaibol na ọ ta nọ: “Jọ a su owhai thọ họ. Usu uyoma o rẹ raha uruemu ezi.”—1 Ahwo Kọrint 15:33.
“Who rri ifoto ahwo kpobi evaọ itanẹte he fikinọ ahwo buobu a bi rri rai. Ẹsibuobu, etẹe whọ rẹ jọ ruẹ ugbẹruẹ, ahwo nọ a rrọ ẹbẹba, gbe eware iyoma efa.”—Jessica.
Fi umuo oke nọ whọ rẹ raha evaọ itanẹte họ, gbe unuẹse nọ who re fi ifoto họ iẹe. Ebaibol na ọ ta nọ: “Wha fiẹrohotọ ziezi re wha ruẹ nọ oghẹrẹ nọ wha be nya o rrọ wọhọ igheghẹ hẹ rekọ wọhọ ahwo nọ a wo areghẹ, wha hae rehọ oke rai ruiruo evaọ edhere nọ ọ mai woma.”—Ahwo Ẹfisọs 5:15, 16.
“Mẹ gbẹ be jọ itanẹte kpohọ oria ahwo nọ a rẹ kwa eware vọe he. Wọhọ oriruo, ahwo jọ a re kpohọ ugheriwo evaọ abade, kẹsena a ve fi ifoto ekpe usekpe nọ a rehọ fihọ itanẹte udhẹse. Kinọ oware? Ono o wo uvẹ nọ o re ro rri eyena kpobi?”—Rebekah.
Daoma ruẹ nọ ifoto nọ who bi fihọ itanẹte i bi ru owhẹ dhesẹ oma ha. Paul nọ Ọghẹnẹ ọ kẹ ẹzi riẹ ro kere abọjọ Ebaibol na ọ ta nọ: “Mẹ be ta kẹ owhai kpobi inọ ajọ ohwo ọvo o roro omariẹ kpehru vi epanọ u fo ho.” (Ahwo Rom 12:3) Who du nwani roro nọ oma o te were egbẹnyusu ra gaga nọ a tẹ ruẹ ifoto ra gbe eware nọ who bi ru hu.
“Ahwo jọ a re fi ifoto rai họ itanẹte ẹsikpobi. Ma tẹ rrọ egbẹnyusu, mẹ riẹ oghẹrẹ nọ ovao ra o rrọ, u du gwọlọ nọ whọ rẹ rọ ifoto ra kareghẹhọ omẹ ẹsikpobi hi.”—Allison.