ENỌ IZOGE NA
Kọ U Fo re Mẹ Lẹ?
U wo oke jọ nọ a nọ izoge sa-sa enọ kpahe olẹ. Evaọ usu izoge ikpe kpobi nọ a nọ evaọ obọ America, eree e ta nọ a rẹ lẹ. Rekọ evaọ usu enọ e ta nọ e rẹ lẹ na, abọvo rai ọvo a ta nọ a rẹ lẹ kẹdẹ kẹdẹ. Ẹsejọhọ izoge nana jọ a be hae jọ udu rai nọ nọ: ‘Kọ olẹ yọ oware nọ a rẹ faki ru rọ kpairoro gheghe, manikọ Ọghẹnẹ o bi gine yo?’
Eme họ olẹ?
Olẹ yọ ẹme nọ ohwo o re lele Ọnọ ọ ma eware kpobi na ta. Ọghọ riẹ ọ rro kẹhẹ! Dai roro iei: Jihova ọ rro vi ahwo-akpọ kpekufiẹ, ghele na, “o thabọ no omai omomọvo ho.” (Iruẹru Ikọ 17:27) U te no ere no, Ebaibol na o dhesẹ nọ Ọghẹnẹ o rovie uvẹ ulogbo jọ kẹ omai, inọ: “Wha si kẹle Ọghẹnẹ, o re ti si kẹle owhai.”—Jemis 4:8.
Ẹvẹ whọ sai ro si kẹle Ọghẹnẹ?
Edhere jọ họ, olẹ nọ whọ rẹ lẹ. Ere whọ rẹ rọ ta ẹme kẹ Ọghẹnẹ.
Edhere ọfa họ, Ebaibol nọ whọ rẹ romatotọ se. Ere Ọghẹnẹ ọ rẹ rọ ta ẹme kẹ owhẹ, keme eme riẹ e rrọ Ebaibol na.
Whọ tẹ be hae lẹ je se Ebaibol, o wọhọ ẹsenọ whẹ avọ Ọghẹnẹ wha be ta ẹme kẹ ohwohwo. Yọ usu ra avọ Ọghẹnẹ o te kpekpe ziezi.
“Re ohwo-akpọ o lele Jihova, Ọghẹnẹ nọ Ọ Mai Kpehru na ta ẹme, a rẹ ruẹ obọ ọghọ riẹ hẹ.”—Jeremy.
“Olẹ nọ mẹ rẹ lẹ se Jihova jẹ ta eva mẹ kpobi kẹe, u re si omẹ kẹle iẹe gaga.”—Miranda.
Kọ Ọghẹnẹ ọ rẹ gaviezọ?
Whọ tẹ make rọwo nọ Ọghẹnẹ ọ rrọ, jẹ be hae lẹ sei dede, o sae jọ bẹbẹ kẹ owhẹ re whọ rọwo nọ ọ rẹ ginẹ gaviezọ kẹ elẹ ra. Rekọ Ebaibol na ọ ta nọ Jihova họ “Ọnọ o re yo olẹ.” (Olezi 65:2) Ọ tubẹ jọ Ebaibol na ta nọ: “Wha gbolo awaọruọ rai kpobi kẹe.” Fikieme? “Keme ọ be daezọ rai.”—1 Pita 5:7.
Roro kpahe onọ nana: Kọ whẹ avọ egbẹnyusu ra nọ e kpekpe owhẹ oma ziezi wha be hae ta ẹme ẹsikpobi? Whẹ avọ Ọghẹnẹ wha sae ta ẹme ere re. Hae lẹ sei, yọ whọ tẹ be lẹ, hai se odẹ riẹ, Jihova. (Olezi 86:5-7; 88:9) Ọ tubẹ jọ Ebaibol na ta nọ whọ “hae lẹ kẹse kẹse.”—1 Ahwo Tẹsalonika 5:17.
“Olẹ yọ ẹme nọ mẹ avọ Ọsẹ obọ odhiwu mẹ ma rẹ ta. Mẹ avọ iẹe ma tẹ be ta ẹme, mẹ rẹ ta eva mẹ kpobi kẹe.”—Moises.
“Me re si oware ovo no Jihova ha. Mẹ rẹ ta eva mẹ kpobi kẹe wọhọ epanọ mẹ rẹ ta eva kẹ oni mẹ hayo ogbẹnyusu ọkpekpe mẹ.”—Karen.
Eme mẹ rẹ sae lẹ kpahe?
Ebaibol ọ ta nọ: “Evaọ oware kpobi wha rọ olẹ avọ olẹ ayare-ọgaga kugbe uyere-okẹ ta ayare rai via kẹ Ọghẹnẹ.”—Ahwo Filipai 4:6.
Kọ oria nana u dhesẹ nọ whọ sae jọ olẹ ta kpahe eware nọ e be kẹ owhẹ uye? Ee! Ebaibol na ọ tubẹ ta nọ: “Gbolo owha ra kẹ Jihova, ọ te rẹrote owhẹ.”—Olezi 55:22.
O make rrọ ere na, orọnikọ eware nọ e be kẹ omai uye ọvo ma rẹ ta kpahe he nọ ma tẹ be lẹ se Ọghẹnẹ. Uvovo-aye jọ nọ a re se Chantelle ọ ta nọ: “Otẹrọnọ oware nọ mẹ rẹ ta evaọ olẹ mẹ kpobi họ, inọ Jihova o fiobọhọ kẹ omẹ, kiyọ usu na o rrọ oghẹrẹ jọ. Me rri rie nọ, mẹ rẹ kaki yere iei kẹ eware nọ o ru kẹ omẹ no tao, yọ u fo nọ mẹ rẹ romatotọ yere iei oke lelehie keme eware nọ o ru kẹ omẹ no e rrọ buobu.”
Roro kpahe enọ nana: Eme gbe eme Ọghẹnẹ o ru kẹ owhẹ no nọ whọ rẹ sai yere iei kẹ? Kọ u gbe ti woma re who roro te eware esa jọ nọ Jihova o ru kẹ owhẹ no, nọ whọ rẹ rọ fiki rai yere iei nẹnẹ?
“Makọ omoware wọhọ ododo owowoma nọ ma ruẹ, ma sae rọ fiki riẹ lẹ se Jihova re ma yere iei.”—Anita.
“Roro didi kpahe oware jọ nọ Jihova ọ ma nọ o were owhẹ, hayo oria Ebaibol jọ nọ o te owhẹ udu gaga, kẹsena who ve yere Jihova fiki riẹ.”—Brian.