ENỌ IZOGE NA
Ẹvẹ Mẹ Sae rọ Rehọ Oke Mẹ Ruiruo Ziezi?
Fikieme o rọ gwọlọ nọ whọ rẹ rọ oke ra ruiruo ziezi?
Oke o wọhọ ugho. Whọ tẹ raha iẹe kufiẹ, yọ u kpo no. Evaọ abọdekọ riẹ, whọ tẹ ma omaa eware nọ whọ rẹ rọ oke ra ru, who ti wo oke kẹ eware arozaha nọ e rẹ kẹ owhẹ evawere.
Ehri-uzi Ebaibol: “Ọyẹlẹ o wo eware nọ i bi si ei urru, rekiyọ o wo oware ovuovo ho, rekọ ọnọ o kru obọ ga o ti wo eware buobu.”—Itẹ 13:4.
Ẹme na họ: Whọ tẹ ma omaa oke ra, who ti wo oke ziezi kẹ eware nọ i wuzou, gbe eware efa.
Whọ tẹ be hae rọ oke ra ruiruo ziezi, u ti fiobọhọ kẹ owhẹ gaga nọ whọ tẹ kpako no. Who te wo iruo no, o sai ru nọ ọga iruo ra ọ gbẹ rọ kaki si owhẹ no iruo ho. Whọ tẹ rrọ ọga iruo, kọ whọ te gwọlọ nọ ohwo nọ o re leti ziọ iruo ẹsikpobi o ru iruo kẹ owhẹ?
Ehri-uzi Ebaibol: “Ohwo nọ ọ jọ oware osese dhesẹ nọ a re fievahọ iẹe ọ rẹ jọ ulogbo dhesẹ re nọ a re fievahọ iẹe.”—Luk 16:10.
Ẹme na họ: Oghẹrẹ nọ whọ be rọ oke ra ruiruo, u re dhesẹ oghẹrẹ ohwo nọ whọ rrọ.
Rekọ re a t’uzẹme, re ohwo ọ ma omaa oke riẹ fihọ eware nọ ọ gwọlọ ru o nwane lọhọ tere he. Joma ta kpahe eware nọ i re ru onana jọ bẹbẹ.
Ẹbẹbẹ #1: Egbẹnyusu
“Nọ egbẹnyusu mẹ a te zizie omẹ kẹ oware jọ, me re lele ai, o tẹ make rọnọ me wo uvẹ na ha. Me re roro nọ, ‘Me te zihe ze, mẹ te rọ ovovẹrẹ ru eware nọ mẹ gwọlọ ru.’ Rekọ ẹsejọ, o rẹ nwane lọhọ ere he, yọ onana o rẹ raha eware ku omẹ.”—Cynthia.
Ẹbẹbẹ #2: Eware nọ e rẹ raha oke kufiẹ
“Etẹlẹvisiọno ọ rẹ re oke ohwo. A te mu ifimu gbe eware efa họ edhesẹ no, o rẹ jọ bẹbẹ re ohwo ọ kpama no aro riẹ.”—Ivy.
“Mẹ rẹ raha euwa buobu ro ru eware evaọ etablẹte mẹ. Ebatri riẹ o gbe re no ho me re fi ei họ otọ họ, onana o vẹ be lẹliẹ udu brukpe omẹ.”—Marie.
Ẹbẹbẹ #3: Uruemu meti meti
“Mẹ tẹ gwọlọ ru ihomwhọko mẹ gbe eware efa, me re dhe oke na ẹvẹva. Mẹ rẹ raha oke kufiẹ ro ru eware nọ i wuzou tere he, kẹsena mẹ vẹ rọ umutho oke nọ u kiọkọ gba omamẹ họ ru ihomwhọko mẹ. Onana yọ emamọ edhere nọ ohwo ọ rẹ rọ rehọ oke riẹ ruiruo vievie he.”—Beth.
Whọ tẹ ma omaa oke ra, who ti wo oke ziezi kẹ eware nọ i wuzou, gbe eware efa.
Oware nọ whọ rẹ sai ru
Kere eware nọ i wuzou fihotọ. Ejọ họ, iruo uwou gbe ihomwhọko. Kere oke nọ o gwọlọ nọ who re ro ru eware nana ọvuọvo evaọ ẹkpoka fihotọ.
Ehri-uzi Ebaibol: “Vuhu eware nọ e mae roja.”—Ahwo Filipai 1:10.
Kere eware nọ i wuzou tere he fihotọ. Eware nana jọ họ, iwou nọ who re vi evaọ itanẹte, gbe etẹlẹvisiọno iriwo. Who ve je kere oke nọ whọ rẹ raha fihọ eware nana ọvuọvo evaọ ẹkpoka.
Ehri-uzi Ebaibol: “Wha hae rọ areghẹ [ru eware], wha hae rehọ oke rai ruiruo ziezi.”—Ahwo Kọlọsi 4:5.
Ma omaa. Wariẹ rri ẹko eware ivẹ nọ who kere fihotọ na. Kọ who fi oke họ kẹ eware nọ e mai wuzou? Kọ o gwọlọ nọ whọ rẹ gbẹ rehọ oke no eware arozaha ze?
Oware jọ nọ u re fiobọhọ: Kere eware nọ whọ gwọlọ ru kẹdẹ kẹdẹ fihotọ, re whọ hai kpokahọ onọ who ru no.
Ehri-uzi Ebaibol: “Omaa ohwo nọ o re kru obọ ga, o rẹ riẹ nya hrọ.”—Itẹ 21:5.
Ru lele omaa ra. O sae gwọlọ nọ whọ rẹ siọ uzizie jọ ẹsejọ re whọ sai ru eware nọ i wuzou. Rekọ whọ te ruẹ nọ who te ru lele omaa ra, ẹsiẹ whọ te mai wo oke kẹ eware arozaha, yọ enẹ eva e te mae rọ were owhẹ.
Ehri-uzi Ebaibol: “Wha goma iruo, wha raha oke evaọ iruo rai hi.”—Ahwo Rom 12:11, ẹme-obotọ.
Whọ rọ okpakpa nyai serihọ họ. Ọmọtẹ jọ nọ a re se Tara ọ ta nọ: “Ẹsejọ nọ me te ru eware ivẹ evaọ usu eware nọ me kere fihotọ no, mẹ vẹ jọ udu mẹ ta nọ, ‘Jomẹ nyai rri etẹlẹvisiọno iminiti ikpegbisoi, kẹsena me ve zihe kpohọ iruo mẹ.’ Iminiti ikpegbisoi i ve kpohọ ọgba, iminiti ọgba i ve kpohọ auwa. Me je rri hi na, mẹ raha euwa ivẹ soso ro rri etẹlẹvisiọno no!”
Ẹvẹ whọ sae rọ whaha onana? Rri eware arozaha wọhọ erere nọ who re wo nọ who te ru iruo okpẹdoke ra re no, orọnikọ oware nọ u wuzou nọ who re ru kẹdẹ kẹdẹ hẹ.
Ehri-uzi Ebaibol: “Oware ovo o rrọ họ nọ u woma kẹ ohwo-akpọ vi [onana, re ọ] reakpọ kuoma evaọ iruo egaga riẹ.”—Ọtausiuwoma Na 2:24.