Ẹvẹ Mẹ Sai ro Wuhrẹ Obe Ziezi nọ Mẹ tẹ be Jọ Obọ Uwou Kpohọ Isukulu?

Anwọ oke jọ ze na, u wo oghẹrẹ sa-sa nọ emọ buobu a bi ro kpohọ isukulu. A rẹ jọ obọ uwou rọ itanẹte thuru kpobọ isukulu. Otẹrọnọ ere whọ be hai ro kpohọ isukulu, eme who re ru re whọ sai wuhrẹ obe ziezi? Joma ta kpahe eware jọ nọ whọ rẹ sai ru.a

• Eware isoi jọ nọ e rẹ sai fiobọhọ kẹ owhẹ

• Ẹme nọ ehwa ra a ta

Eware isoi jọ nọ e rẹ sai fiobọhọ kẹ owhẹ

• Kere eware nọ whọ te hai ru kẹdẹ kẹdẹ fihotọ. Ruẹ nọ who ru eware nọ who kere fihotọ na wọhọ epanọ whọ hai ti ru evaọ obọ isukulu. Ruẹrẹ oke jọ fihọ nọ who re ro ru eware isukulu ra, iruo uwou, gbe eware efa nọ i wuzou. Yọ o tẹ gwọlọ nọ who re nwene eware jọ evaọ usu enọ who kere fihotọ na, whọ sai ru ere.

  Ohrẹ Ebaibol: “Jọ eware kpobi e nya . . . lele ọruẹrẹfihotọ.”​—1 Ahwo Kọrint 14:40.

  “Hai ru eware kẹdẹ kẹdẹ wọhọ ẹsenọ whọ rrọ obọ isukulu. Daoma ru oware evaọ oke nọ who fihọ kẹe.”​—Katie.

  Roro kpahe onana: Fikieme u ro fo nọ who re kere eware nọ whọ te hai ru fihotọ je fi ei họ oria nọ whọ sae jọ ruẹ e riẹ ziezi?

• Hae gba omara họ ru eware jọ. Re whọ sai dhesẹ nọ who bi te ohwo no, o gwọlọ nọ whọ rẹ gba omara họ ru eware nọ u fo nọ who re ru, o tẹ make rọnọ o be ruọ owhẹ oma ha. Whaha uruemu meti meti.

  Ohrẹ Ebaibol: “Wha goma iruo, wha moyẹlẹ hẹ.”​—Ahwo Rom 12:11.

  “Re ohwo ọ gba omariẹ họ ru oware o bẹ wumuo ho. Rekọ o bẹ hẹ re ohwo o gu inoma jẹ ta nọ, ‘Me ti ru eware isukulu mẹ ẹsiẹfa.’ Kẹsena nọ who gbe ru ei evaọ ẹsiẹfa nọ whọ ta na ha, eware isukulu e vẹ te vọ owhẹ uzou.”​—Alexandra.

  Roro kpahe onana: Ẹvẹ eware isukulu ra nọ who re ru evaọ oke gbe oria ovona kẹdẹ kẹdẹ o sai ro fiobọhọ kẹ owhẹ wo omonyẹ?

• Ruẹrẹ oria jọ họ nọ whọ te hae jọ wuhrẹ obe. Daoma tọlọ eware kpobi nọ whọ gwọlọ kẹle oma. Nabe ruẹrẹ oria na họ kpatiẹ, rekọ who ru ei woma te epanọ o rẹ rọ lẹliẹ owezẹ su owhẹ hẹ. Riẹ nọ obe whọ gwọlọ wuhrẹ orọnikọ owezẹ hẹ! Otẹrọnọ who wo oria ọvo nọ whọ rẹ sae jọ ru eware isukulu ra ha, whọ sae jọ ikichini hayo ubruwou nọ who re kiẹzẹ ruẹrẹ oria jọ họ nọ who re jo ru eware isukulu ra.

  Ohrẹ Ebaibol: “Omaa ohwo nọ o re kru obọ ga, o rẹ riẹ nya hrọ.”​—Itẹ 21:5.

  “Fi ebọro avọ eware igemu ra gbe agita ra họ oria nọ whọ rẹ jọ ruẹ e rai hi, je ru ifonu ra fihọ oghẹrẹ nọ o gbe ro ru edo ho. Re whọ sae tẹrovi oware nọ who bi wuhrẹ ziezi, o gwọlọ nọ who re si oware kpobi nọ o rẹ sai si iroro ra no oware nọ who bi wuhrẹ na no.”​—Elizabeth.

  Roro kpahe onana: Inwene vẹ whọ rẹ sai ru evaọ oria nọ whọ be jọ ru eware isukulu ra re o sai kiehọ kẹ obe uwuhrẹ ziezi?

• Tẹrovi oware ọvo. Ukpenọ who re ru eware buobu ẹsiẹvo, tẹrovi oware nọ who bi wuhrẹ na ọvo. Nọ who te bi ru eware buobu evaọ oke ovona, eware jọ e sae thọ owhẹ obọ, yọ u ti ru nọ whọ te rọ raha oke vi epaọ ọsosuọ.

  Ohrẹ Ebaibol: “Wha hae rehọ oke rai ruiruo evaọ edhere nọ ọ mai woma.”​—Ahwo Ẹfisọs 5:16.

  “Nọ ifonu mẹ o tẹ rrọ kugbe omẹ, o rẹ jọ bẹbẹ re mẹ tẹrovi oware nọ me bi ru. Mẹ rẹ raha oke mẹ ru eware nọ i fioka ha.”​—Olivia.

  Roro kpahe onana: Kọ whọ sae daoma wuhrẹ omara ẹmẹrera epanọ a rẹ tẹrovi oware ọvuọvo?

• Hae kpama ẹsejọ. Whọ sae rehọ oke yena nya onya, dhẹ ebasikoro hayo ru oware nọ o rẹ lẹliẹ oma ra jaja. Whọ sae je ru oware jọ nọ o rẹ were owhẹ gaga. Obe jọ nọ a re se School Power o ta nọ: “U fo nọ whọ rẹ kaki ru eware isukulu ra no tao. Oma o rẹ mae dhẹ owhẹ nọ who te ru eware nọ e rrọ owhẹ obọ no taure who te ti ru eware efa.”

  Ohrẹ Ebaibol: “Umutho eriosehọ u woma vi iruo egaga nọ e wọhọ ofou nọ a bi le.”​—Ọtausiuwoma 4:6.

  “Evaọ obọ isukulu, whọ rẹ sai wuhrẹ epanọ a re kporo okwakwa ikporakporo jọ hayo wuhrẹ onaa ọfa jọ. Mẹ jẹ hae rri eware nana vo rekọ enẹna ẹro rai u bi vo omẹ gaga. Nọ who te wuhrẹ obe te oria jọ no, u fo nọ who re ru eware nana ro ru oma ra jaja.”​—Taylor.

  Roro kpahe onana: Eme whọ rẹ sai ru evaọ oke ibreki ra re oma o sasa owhẹ nọ whọ te wariẹ mu eware isukulu ra họ?