ENỌ IZOGE NA
Fikieme Mẹ be Hae rọ Ta Ẹme Ọthọthọ Ẹsikpobi?
“Ẹsejọ mẹ rẹ sae kpọ ẹrọo mẹ, rekọ evaọ oke ofa, o wọhọ nọ ẹrọo mẹ ọ rẹ ta vrẹ ọvo ababọ ẹvori mẹ nọ o re roro kpahe ẹme na tao!”—James.
“Nọ udu u te bi bru omẹ, me re rorote mẹ tẹ ta ẹme he, yọ evaọ okenọ udu u te omẹ otọ, mẹ rẹ ta vrẹ oma. Fikiere, o wọhọ nọ ẹsikpobi mẹ rẹ ta thọ.”—Marie.
Ebaibol na ọ ta nọ: “Ẹrọo na yọ erae,” gbe nọ “a rẹ sae rehọ erae esese gheghe tu erae họ igbrẹwọ soso!” (Jemis 3:5, 6) Kọ ẹme ra ọ be hai fi owhẹ họ ẹbẹbẹ? O tẹ rrọ ere, uzoẹme nana u ti fiobọhọ kẹ owhẹ.
Fikieme mẹ be hae rọ ta ẹme ọthọthọ?
Sebaẹgba. Ebaibol na ọ ta nọ: “Mai kpobi ma re zoruẹ unuẹse buobu. Otẹrọnọ ohwo jọ ọ rẹ ta ẹme thọ họ, kiyọ ohwo ọgbagba ọ rrọ.” (Jemis 3:2) Epanọ ma rẹ sai kpowọ họ otọ nọ ma tẹ be nya onya fikinọ ma gba ha na, ere ọvona ẹme ọ rẹ sae thọ omai unu re.
“Mẹ yọ ohwo-akpọ, fikiere mẹ tẹ ta nọ mẹ rẹ sae kpọ ẹrọo gbe ẹvori mẹ nọ ọ gba ha na gbagba yọ mẹ be viẹ omamẹ họ.”—Anna.
Eme nọ a rẹ ta bu hrọ. Ebaibol na ọ ta nọ: “Nọ ohwo ọ tẹ be ta eme buobu, ọ rẹ seba ẹta thọ họ.” (Itẹ 10:19) Ahwo nọ a rẹ ta eme bu hrọ, nọ a rẹ gaviezọ kẹ amọfa ziezi hi, a rẹ sae ta ẹme nọ ọ rẹ dha amọfa eva.
“Nọ ahwo a tẹ rrọ oria, orọnikọ enọ e mai wo areghẹ ae a rẹ mae ta ẹme he. Jesu họ ohwo nọ ọ mai wo areghẹ nọ ọ rria otọakpọ na no, ghele na u wo etoke sa-sa nọ ọ fọ tou.”—Julia.
Atahwẹ. Ebaibol na ọ ta nọ: “Eme nọ a roro te re a tẹ ta ha, e wọhọ ọgbọdọ nọ a ro duwu ohwo.” (Itẹ 12:18) Oriruo jọ ọrọ eme nọ a re roro te he họ atahwẹ, koyehọ eme edada nọ a rẹ ta ro kpomovuọ họ amọfa oma. Ahwo nọ a rẹ ta atahwẹ a sae ta nọ, “Emiehwẹ gheghe mẹ rrọ!” Rekọ re a kpomovuọ họ omọfa oma yọ emiehwẹ vievie he. Ebaibol na ọ ta kẹ omai nọ ma siobọno “eme ekela, jegbe oware uyoma kpobi.”—Ahwo Ẹfisọs 4:31.
“Me re ru eware ẹghẹ gaga, yọ o rẹ were omẹ re me ru eware nọ i re fou ahwo họ ehwẹ. Iruemu nana i re su kpohọ atahwẹ, yọ onana o rẹ so ẹme se omẹ ẹsibuobu.”—Oksana.
Whọ tẹ ta ẹme no, whọ rẹ sae gbẹ rehọ iẹe zihe he, wọhọ epanọ a rẹ sae rehọ ame ofuakọ zihe he nọ a te mi ei lahwe no na
Epanọ a rẹ rọ kpọ ẹrọo na
Re ma sae kpọ ẹrọo mai o lọhọ tere he, rekọ ehrẹ Ebaibol e rẹ sai fiobọhọ. Joma ta kpahe ejọ rai.
“Wha ta eme rai fihọ eva, . . . re wha fibo.”—Olezi 4:4.
Ẹsejọ, oware nọ o mai woma nọ ma re ru họ, ma re fibo. Ọmọtẹ jọ nọ a re se Laura ọ ta nọ: “Oghẹrẹ nọ me re rri oware okenọ eva e tẹ be dha omẹ u re wo ohẹriẹ no oghẹrẹ nọ me re rri rie nọ oke yena o tẹ vrẹ no. Nọ ofu mẹ o te kpotọ no, eva e rẹ were omẹ inọ mẹ ta ẹme nọ ọ jọ omẹ udu evaọ oke yena ha.” Ohwo ọ tẹ tubẹ fọ evaọ umutho emaharo jọ ọvo dede, o rẹ sai ru no ọ gbẹ rọ ta ẹme ọthọthọ họ.
“Kọ ogbẹrọnọ ozọ o rẹ dawo ẹme wọhọ epanọ ẹrọo ọ rẹ dawo emu na?”—Job 12:11.
Whọ rẹ sae whaha ẹbẹbẹ ologbo otẹrọnọ whọ nọ omara enọ nana taure whọ tẹ te ta ẹme:
Kọ ẹme na uzẹme? O rrọ wowou? O roja?—Ahwo Rom 14:19.
Ẹvẹ o te jọ omẹ oma nọ omọfa ọ tẹ tae kẹ omẹ?—Matiu 7:12.
Kọ ẹme na o ti dhesẹ nọ eriwo ohwo ọdekọ na o fioka ha?—Ahwo Rom 12:10.
Kọ oke gbe oria nana u fo nọ mẹ rẹ jọ tae?—Ọtausiuwoma Na 3:7.
“Avọ omaurokpotọ wha rri amọfa inọ a rro vi owhai.”—Ahwo Filipai 2:3.
Ohrẹ yena u ti fiobọhọ kẹ owhẹ wo emamọ eva kpahe amọfa, onọ u ti ru owhẹ kpọ ẹrọo ra je roro te whọ tẹ te ta. O tẹ make rọnọ whọ rọ ethobọ ta ẹme oyoma, omaurokpotọ u ti fiobọhọ kẹ owhẹ wounu ẹsiẹsiẹ. (Matiu 5:23, 24) Kẹsena whọ vẹ gbaemu nọ whọ te daoma kpọ ẹrọo ra evaọ oke ofa.