“U Wo Eware Buobu nọ Mẹ Riẹ Hẹ”

UZUAZỌ MẸ EVAỌ OKENỌ U KPEMU

A yẹ omẹ evaọ La Ceiba, obọ Honduras, yọ mẹ họ ọrọ ọmaha kpobi evaọ usu emọ isoi nọ ọsẹgboni mẹ a yẹ. Yọ mẹ ọvo họ ọmọzae nọ ọ rrọ usu rai. Mẹ ọvo họ ohwo nọ ọ jọ uviuwou mai diezọ re. Edhagoda e vọ oria mai gaga, yọ mai iyogbe. Eware e wariẹ ga kẹ omai nọ ọsẹ mẹ ọ nwoma evaọ oria nọ ọ jọ je ru iruo. Kẹsena o te whu. Oke yena mẹ jọ oware wọhọ ikpe ene.

Oni mẹ ọ jẹ daoma gaga re ọ rẹrote omai emọ na, rekọ ọ jẹ hae sae ruẹ ugho dẹ ewu kẹ omẹ hẹ. Oso ọ tẹ be rrọ, ekpahe e jẹ hai kpe omẹ keme mẹ jẹ hae ruẹ iwu egbẹgbẹdẹ fihọ họ.

Nọ mẹ be kpako ze na, me te wuhrẹ Ẹvẹrẹ Obọ rọ t’Ẹme Honduras. Onana u te fiobọhọ kẹ omẹ nọ mẹ jẹ sai ro lele amọfa nọ a diezọ ta ẹme. Te oni gbe inievo-emetẹ mẹ a riẹ Ẹvẹrẹ Obọ rọ t’Ẹme Honduras he. Umutho eware jọ ọvo a jẹ hae sae rehọ abọ gbe oma ta kẹ omẹ. Rekọ oni mẹ o you omẹ gaga, yọ ọ jẹ hae rọ umutho eme nọ ọ rẹ sai lele omẹ ta na vẹvẹ omẹ unu inọ mẹ yọroma kẹ ikpehre iruemu wọhọ isigareti ivovo gbe idi nọ a rẹ da vrẹ oma. Me ru eware nana no emaha ze he. Ọghẹnẹ o ru inọ oni mẹ o wuhrẹ omẹ.

Evaọ oke nọ mẹ gbẹ jọ ọmaha, oni mẹ ọ jẹ hae wha omẹ kpohọ ichọche Katọlik. Rekọ mẹ jẹ hai wo otoriẹ eware nọ a je wuhrẹ hẹ, keme ohwo ọvuọvo ọ jẹ fa ae fihọ ẹvẹrẹ obọ rọ t’ẹme kẹ omẹ hẹ. O gbẹ jẹ ruọ omẹ oma re me kpohọ ichọche he. Fikiere nọ me te ikpe ikpe no, mẹ tẹ seba. Rekọ, mẹ gbẹ gwọlọ wuhrẹ kpahe Ọghẹnẹ.

Evaọ 1999, nọ mẹ jọ ikpe udhegbesa, mẹ tẹ ruẹ aye jọ nọ o no obọ America ze, ohwo ichọche jọ. O te je wuhrẹ omẹ eware jọ evaọ Ebaibol. Kẹsena o te wuhrẹ omẹ Ẹvẹrẹ Obọ rọ t’Ẹme America. Eware nọ o je wuhrẹ omẹ no Ebaibol ze na e were omẹ gaga, te epanọ mẹ rọ ta nọ mẹ rẹ jọ epastọ. Fikiere me te kpohọ isukulu nọ ahwo ichọche jọ a re jo wuhrẹ ahwo nọ a diezọ Ebaibol na evaọ obọ Puerto Rico. Nọ me zihe ziọ La Ceiba evaọ 2002, me te rovie ichọche kẹ ahwo nọ a diezọ, yọ u wo egbẹnyusu esa mẹ jọ nọ ma gbẹ jọ usu. Ọjọ rai họ Patricia, yọ uwhremu na, mẹ avọ iẹe ma tẹ ruọ orọo.

Fikinọ mẹ họ epastọ ichọche mai, mẹ jẹ hae rehọ Ẹvẹrẹ Obọ rọ t’Ẹme Honduras wuhrẹ ahwo ichọche na, je dhesẹ ifoto ikuigbe Ebaibol. Mẹ jẹ hai ru edrama ikuigbe Ebaibol re ahwo nọ a diezọ na a ruẹsi wo otoriẹ rai. Mẹ jẹ hae nyabru ahwo ewho nọ e kẹle omai. Mẹ jẹ hae tuduhọ ae awọ je fiobọhọ kẹ ae evaọ ebẹbẹ rai. Mẹ tubẹ rọ obọ America gbe obọ Zambia kpohọ iruo imishọnare oke jọ. Rekọ, uzẹme riẹ họ, mẹ riẹ Ebaibol na tere he. Eware nọ a wuhrẹ omẹ gbe oghẹrẹ nọ me wo otoriẹ ifoto iku Ebaibol mẹ jẹ hai ro wuhrẹ ahwo. Uzẹme riẹ họ, u wo eware buobu nọ mẹ riẹ hẹ.

Ẹdẹ jọ ahwo ichọche mẹ a te mu erue họ egu kpahe omẹ, be ta kẹ ahwo nọ mẹ yọ ọgba-idi jegbe nọ me bi lele eyae efa. Erue nana nọ a gu fihọ omẹ uzou na o da omẹ gaga, o tẹ jẹ lẹliẹ omẹ muofu. U gbe kri hi, mẹ avọ Patricia ma te no ichọche na.

EPANỌ EBAIBOL NA O RO NWENE UZUAZỌ MẸ

Kẹse kẹse Isẹri Jihova a jẹ hae nyaze te ta usi uwoma kẹ omẹ avọ aye mẹ Patricia, rekọ ẹsikpobi nọ a tẹ nyaze ma re le ai. Nọ ma no ichọche na no, aye mẹ ọ tẹ rọwo nọ ọzae jọ nọ a re se Thomas avọ aye riẹ Liccy nọ a rrọ Isẹri Jihova a wuhrẹ Ebaibol kugbei. U gbe omẹ unu gaga nọ dede nọ a diezọ họ, a riẹ ẹvẹrẹ obọ rọ t’ẹme. Fikiere me te kuomagbe aye mẹ je lele ai wuhrẹ.

Ividio Ẹvẹrẹ Obọ rọ t’Ẹme America ma je ro wuhrẹ. Rekọ nọ egbẹnyusu mẹ jọ a ta nọ ahwo-akpọ gheghe Isẹri Jihova a bi lele, mẹ gbẹ rọwo nọ a wuhrẹ omai Ebaibol ho. Nọ Thomas ọ maki dhesẹ eware sa-sa kẹ omẹ nọ e kẹ imuẹro nọ ahwo-akpọ gheghe Isẹri Jihova a bi lele he, mẹ rọwo ho.

Nọ emerae jọ e vrẹ no, nọ aye mẹ ọ jọ ọkora ọgaga ọ tẹ lẹ nọ ajọ Ọghẹnẹ o ru re Isẹri Jihova a wariẹ nyabru ei ze. U kri hi, Osẹri Jihova jọ nọ ọ be rria kẹle omai ọ tẹ nyabru aye mẹ ze jẹ nọe sọ o te were iẹe re ọ ta kẹ Liccy re ọ wariẹ nyabru ei ze. Emamọ ogbẹnyusu Liccy ọ ginẹ jọ. Ọ jẹ hae nyaze te tuduhọ aye mẹ awọ koka koka je wuhrẹ Ebaibol kugbei. Ghele na me gbe je wo avro kpahe Isẹri Jihova.

Evaọ 2012, Isẹri Jihova a tẹ jẹ ghale omobe ovẹvẹ na, Kọ Whọ Gwọlọ Riẹ Uzẹme Na? nọ a ru fihọ ividio Ẹvẹrẹ Obọ rọ t’Ẹme Honduras. Liccy ọ kẹ omai ividio nana re. Nọ me rri rie, u gbe omẹ unu gaga inọ eware buobu nọ me je wuhrẹ ahwo wọhọ erae ehẹle, gbe ohwo o wo ẹzi nọ o re whu hu e rrọ Ebaibol na ha.

Oka nọ u lele i rie me te kpobọ Ọgwa Uvie Isẹri Jihova nyae ruẹ Thomas. Mẹ tẹ vuẹe nọ mẹ gwọlọ wuhrẹ ahwo nọ a diezọ ovuẹ Ebaibol na, rekọ mẹ gwọlọ jọ Osẹri Jihova ha. Oware nọ o jọ omẹ eva họ, re me rovie ichọche ekpokpọ kẹ ahwo nọ a diezọ. Thomas o jiri omẹ kẹ ajọwha nana nọ mẹ wariẹ wo na. Rekọ o te se obe Ahwo Ẹfisọs 4:5 kẹ omẹ nọ u dhesẹ nọ u fo re ukoko Ileleikristi uzẹme a jọ ọvo.

Thomas ọ tẹ jẹ kẹ omẹ ividio na, Jehovah’s Witnesses​—⁠Faith in Action, Part 1: Out of Darkness orọ Ẹvẹrẹ Obọ rọ t’Ẹme America. A jọ ividio nana dhesẹ epanọ utu ahwo jọ a rọ kiẹ Ebaibol na ziezi re a riẹ uzẹme na kpahe eware sa-sa. Nọ me rri ividio na mẹ tẹ nwane ruẹ nọ epanọ ahwo nana a jẹ gwọlọ uzẹme na ere mẹ omamẹ mẹ be gwọlọ iẹe re. Ividio na i ru rie vẹ kẹ omẹ nọ Isẹri Jihova a bi wuhrẹ uzẹme na keme Ebaibol a be rehọ iwuhrẹ rai kpobi no ze. Fikiere mẹ tẹ ta kẹ ae nọ jọ a wariẹ mu Ebaibol họ ewuhrẹ kugbe omẹ. Evaọ ukpe 2014 mẹ avọ aye mẹ Patricia ma tẹ họ-ame.

IRERE NỌ ME WO NO

Ukoko Isẹri Jihova o were omẹ keme o rrọ fuafo wọhọ epanọ Ọghẹnẹ omariẹ ọ rrọ fuafo na. Isẹri Jihova a wo emamọ ẹmeunu gbe emamọ uruemu. A bi lele ohwohwo rria dhedhẹ jẹ tuduhọ ohwohwo awọ. Isẹri Jihova a wo okugbe yọ oware ovona a bi wuhrẹ dede nọ a rrọ ọvuọ orẹwho riẹ yọ a be jẹ evẹrẹ sa-sa.

Eware nọ me bi wuhrẹ no Ebaibol ze enẹna e were omẹ gaga. Wọhọ oriruo, me wuhrẹ nọ Jihova họ Ọghẹnẹ Erumeru na, gbe Osu odhiwu gbe akpọ. O you ahwo kpobi, te enọ i diezọ te enọ i re yo. Eva e were omẹ gaga inọ Ọghẹnẹ o you omẹ. Oware ofa nọ me wuhrẹ họ, Ọghẹnẹ o ti zihe otọakpọ na ruọ aparadase, ma ve ti wo uzuazọ ebẹdẹ bẹdẹ gbe omokpokpọ. Me bi rẹro eware nana gaga.

Mẹ avọ aye mẹ, ma be hae rọ Ebaibol na wuhrẹ amọfa nọ a diezọ. Ma be rọ Ebaibol na wuhrẹ ahwo jọ nọ a jọ ichọche mai vẹre. Enẹna, mẹ riẹ eware nọ me bi wuhrẹ ahwo ziezi no. O gbẹ wọhọ epanọ ọ jọ oke nọ mẹ jọ epastọ họ. U wo eware buobu nọ mẹ riẹ vẹre he, rekọ Isẹri Jihova a wuhrẹ omẹ eware nana no evaọ Ebaibol na.