Nọ Ọzae-avọ-Aye A te Wo Ọvuọ Eriwo Riẹ

Abọ nọ ọzae-avọ-aye a jọ wo ohẹriẹ evaọ uruemu gbe iroro o rẹ sae wha ebẹbẹ fihọ orọo. Rekọ u wo eware efa nọ e rẹ tubẹ mae wha ebẹbẹ fihọ orọo, ejọ rai họ:

• Epanọ a rẹ raha oke kugbe imoni rai te

• Eware nọ a rẹ raha ugho fihọ

• Sọ a re yẹ emọ hayo a re yẹ hẹ

Eme whọ rẹ sai ru nọ whẹ avọ ọzae hayo aye ra wha te wo ọvuọ iroro riẹ?

• Oware nọ u fo nọ whọ rẹ riẹ

• Oware nọ whọ rẹ sai ru

Oware nọ u fo nọ whọ rẹ riẹ

Nọ ọzae-avọ-aye a tẹ be riẹ yerikugbe orọnikọ u dhesẹ nọ a wo iroro evona ẹsikpobi hi. Makọ ọzae-avọ-aye nọ a be riẹ yeri ziezi a re wo ọvuọ eriwo riẹ ẹsejọ, makọ evaọ eware nọ i wuzou gaga dede.

“Ma rẹ gwọlọ jọ kugbe ohwohwo gaga evaọ uviuwou nọ me no ze. Evaọ urere oka, ma re weze bru ọsẹgboni ologbo mai, inievo ọsẹgboni mai, gbe emọ rai. Ahwo uviuwou ọzae mẹ a re kuomagbe ohwohwo tere he. Fikiere mai imava ma wo eriwo ọvona ha kpahe oke nọ ma rẹ raha kugbe ahwo uviuwou mai hayo oke nọ ma re ro lele imoni mai nọ e be rria ugbothabọ ta ẹme evaọ ifonu.”—Tamara.

“Mẹ avọ aye mẹ ma wo ọvuọ eriwo riẹ kpahe oware nọ a rẹ raha ugho fihọ. Nọ ma rọo obọ, onana o wha emebẹbẹ jọ ze. Orọnikọ ẹsiẹvo hayo isiava ọvo ma keria ta ẹme na taure ẹbẹbẹ na o te ti kuhọ họ.”—Tyler.

Orọnikọ ebẹbẹ kpobi i re kuhọ nọ ọjọ ọ tẹ rọwo fihọ orọ ọdekọ họ. Wọhọ oriruo, eme ọzae-avọ-aye a re ru nọ ọsẹ hayo oni ọjọ ọ tẹ be mọ jẹ gwọlọ ẹruorote? Hayo kinọ ọjọ ọ tẹ gwọlọ nọ a yẹ emọ yọ ọdekọ ọ gwọlọ họ?a

“Mẹ avọ aye mẹ ma keria ta ẹme lelehie unuẹse jọ kpahe emọ-iyẹ. O gbe bi roro kpahe emọ-iyẹ na noke toke, yọ mẹ gwọlọ yẹ vievie he. O wọhọ nọ u wo oghẹrẹ ọvo nọ mẹ avọ iẹe ma ti ro wo eriwo ọvona ha.”—Alex.

Ọvuọ eriwo riẹ nọ ọzae-avọ-aye a re wo o nwani dhesẹ nọ orọo rai o tahaku no ho. Ahwo jọ nọ a rẹ kẹ ohrẹ kpahe orọo a ta nọ otẹrọnọ whẹ avọ ọzae hayo aye ra wha be rọwokugbe he evaọ oware nọ u wuzou gaga, whọ rẹ daoma kpobi re who ru onọ o rrọ owhẹ eva na, o tẹ make rọnọ who re no orọo na. Rekọ ohwo nọ o ru lele ohrẹ utioye o se eriwo ohwo ọdekọ na gboware ovo ho, yọ o bi rri eyaa nọ ọ ya evaọ aro Ọghẹnẹ vo inọ ọ te talamu ọzae hayo aye riẹ ghelọ oware kpobi nọ o via kẹhẹ.

Oware nọ whọ rẹ sai ru

Gbaemu nọ who re ru eyaa orọo ra gba. Who te wo ọtamuo nana, wha ti kuomagbe jiroro epanọ wha re ro ku ẹbẹbẹ na họ, ukpenọ wha te rọsuọ ohwohwo.

Ehri-uzi Ebaibol: “Onọ Ọghẹnẹ o kugbe no, ajọ ohwo ọvo ọ hẹriẹ iẹe he.”—Matiu 19:6.

Roro kpahe oware nọ o te rehọ mi owhẹ. Wọhọ oriruo, dae rehọ iẹe nọ ọjọ ọ gwọlọ nọ a re yẹ emọ rekọ ọdekọ ọ gwọlọ họ. U wo eware sa-sa nọ a re roro kpahe, ejọ họ:

• Epanọ whai imava wha be riẹ yerikugbe te.

  Ẹbẹbẹ ọmọ ọ tẹ romavia no, ẹvẹ orọo na o te jọ?

• Owha-iruo ọyewọ.

  Orọnikọ wha te wo emu, iwu, gbe oria nọ wha rẹ rria no yọ ẹme o re no ho.

• Epanọ eware e rrọ kẹ owhai evaọ abọ ugho.

  Kọ whọ te sae wọ owha uviuwou avọ emọ, iruo, gbe eware efa nọ i wuzou?

Ehri-uzi Ebaibol: “Ono evaọ usu rai na nọ ọ gwọlọ bọ uwou ukpehru ọ rẹ kake keria tao ho re o roro araha na?”—Luk 14:28.

Rri ẹme nọ ọ rrọ otọ na mu ziezi. Who te ru ere, abọ jọ ẹbẹbẹ na ọ sai kuhọ. Wọhọ oriruo, o tẹ rrọ ẹme emọ-iyẹ, ọnọ ọ gwọlọ yẹ hẹ na ọ sae nọ omariẹ nọ:

• ‘Nọ mẹ ta nọ mẹ gwọlọ yẹ hẹ, kọ mẹ be ta nọ mẹ gwọlọ yẹ vievie he, manikọ mẹ gwọlọ yẹ obọnana ha?’

• ‘Kọ fikinọ me roro nọ mẹ te sae rẹrote ọmọ ziezi hi mẹ gbẹ rọ gwọlọ yẹ hẹ?’

• ‘Kọ ozọ u bi mu omẹ nọ ọzae hayo aye mẹ o gbe ti rri omẹ ovao ho?’

Evaọ abọdekọ riẹ, ọnọ ọ gwọlọ yẹ emọ na ọ sai roro kpahe enọ nana:

• ‘Kọ ma te sae rẹrote owha-iruo ọyewọ?’

• ‘Kọ ugho o rrọ omai obọ te epanọ ma sae rọ yọrọ ọmọ?’

Ehri-uzi Ebaibol: “Areghẹ nọ o no obọ ehru ze . . . o re dhesẹ nọ o wo iroro.”—Jemis 3:17.

Rri abọ nọ eriwo ọzae hayo aye ra o ro woma. Imava e sai rri oware ovona, rekọ oware nọ a ruẹ u ve wo ohẹriẹ no ohwohwo. Epọvo na re, ọzae-avọ-aye a sai rri ẹme ọvona, rekọ a ve wo ọvuọ eriwo riẹ. Oriruo jọ họ, ẹme ugho oraha. Wha tẹ be ta kpahe oware jọ nọ whai imava wha jọ wo ọvuọ eriwo riẹ, wha kake ta kpahe abọ nọ wha jọ rọwokugbe evaọ ẹme na.

• Abọ vẹ wha jọ rọwokugbe?

• Ewoma vẹ ọ rrọ eriwo rai na ọvuọvo?

• Re evawere e sae jọ orọo na, kọ omọvo jọ hayo wha imava na wha sae dina nwene eriwo rai re wha rọwokugbe?

Ehri-uzi Ebaibol: “Jọ omomọvo ọ hae daoma ru oware nọ o rẹ kẹ omọfa erere orọnikọ omobọ riẹ hẹ.”—1 Ahwo Kọrint 10:24.