Ẹvẹ Mẹ Sae rọ Re Emamọ Emu?

Nọ ohwo ọ gbẹ be re emamọ emu hu, o rẹ sae lẹliẹe mọ. Yọ ohwo ọ tẹ be re emu nọ ọ rẹ kẹ oma na omamọ oware ọvo ho evaọ oke uzoge riẹ, epọvo na o ti ru re nọ ọ tẹ kpako no. Oye u je fo nọ whọ rẹ re emamọ emu nọ whọ gbẹ rrọ uzoge na.

• Eme họ emamọ emu?

• Ẹvẹ mẹ sae rọ ruẹ nọ mẹ re emamọ emu ẹsikpobi?

• Ẹme nọ ehwa ra a ta

Eme họ emamọ emu?

Ebaibol na ọ ta nọ ma jọ “owowa” evaọ oware kpobi, yọ onana u kugbe oghẹrẹ emu nọ ma rẹ re. (1 Timoti 3:11) Fikiere u fo nọ whọ rẹ riẹ eware nana . . .

• Re a re emamọ emu, o gwọlọ nọ ohwo ọ rẹ re oghẹrẹ emu sa-sa. U wo oghẹrẹ emu sa-sa nọ e riẹ wọhọ: ame-ivie, emu nọ a rọ ame-ivie ru, arao, emeri, ibi-ire gbe ebe. Fikinọ ahwo jọ a gwọlọ jọ fuẹfu hu, a rẹ rọwo re oghẹrẹ emu jọ họ keme a roro nọ ere a rẹ rọ whaha ufuẹfu. Rekọ who te ru ere, eware nọ i re fiobọhọ kẹ oma ra e gbẹ te jọ oma na ha.

  Dawo onana: Ru ekiakiẹ hayo nọ edọkita re ọ vuẹ owhẹ oware nọ u ro fo re whọ re oghẹrẹ emu sa-sa. Wọhọ oriruo:

  U wo oghẹrẹ emu jọ nọ o rẹ kẹ oma na ẹgba yọ a re sei carbohydrates. Ọfa jọ họ ọnọ a re se proteins, yọ u re fiobọhọ kẹ ugboma na họre ẹyao je fiobọhọ kẹ iriẹ gbe eware itieye efa evaọ oma na. U wo oghẹrẹ emu jọ nọ o rẹ kẹ ohwo oware nọ a re se fats (iwhri), yọ u gbe bu ga hrọ evaọ oma na ha, u re fiobọhọ whaha ẹyao udu yọ o rẹ jẹ kẹ ohwo ẹgba.

  “Mẹ rẹ daoma ruẹ nọ mẹ re oghẹrẹ emu sa-sa. Yọ me roro nọ o nwane thọ họ re a re enuawere evaọ ẹsejọ. Rekọ u fo re ohwo ọ re oghẹrẹ emu otiọye na ọvo ho. U fo nọ o rẹ jọ umumuo.”—Brenda.

  

• Re a re emamọ emu, ohwo o re ru eware vrẹta ha. Onana o gwọlọ nọ ohwo ọ rẹ rọ ohọo kpe omariẹ hẹ yọ ọ rẹ re emu vrẹta ha.

  Dawo onana: Evaọ amara jọ soso, muẹrohọ oghẹrẹ emu nọ whọ be re. Who te ru ere no, whọ te riẹ unuẹse nọ who ru eware nọ ma fodẹ evaọ obehru na. O tẹ rrọ ere, whọ vẹ nọ omara nọ, ‘Eme me re ru re mẹ hae re emamọ emu?’

  “Ẹsejọ mẹ jẹ hae re emu nọ ọ rẹ kẹ omẹ ẹgba ziezi, yọ mẹ rẹ re iẹe vrẹta, rekọ evaọ oke ofa, mẹ vẹ re enọ e rẹ kẹ ohwo ẹgba tere he. Mẹ jẹ hae rri oware kpobi nọ mẹ be re, re mẹ riẹ epanọ o rẹ kẹ ohwo ẹgba te. Rekọ uwhremu na, mẹ tẹ se uruemu yena ba. Mẹ tẹ jẹ gba oma mẹ re mẹ se emu ba ẹre vrẹta yọ eva e tẹ vọ omẹ no, mẹ vẹ nwane seba ẹre. Dede nọ asohẹrioke me ro nwene he, enẹna mẹ be re emamọ emu.”—Hailey.

Ẹvẹ mẹ sae rọ ruẹ nọ mẹ re emamọ emu ẹsikpobi?

• Ma omaa kpahotọ. Ebaibol na ọ ta nọ: “Omaa ohwo nọ o re kru obọ ga, o rẹ riẹ nya hrọ.” (Itẹ 21:5) Re ohwo ọ hae re emamọ emu ẹsikpobi, o gwọlọ nọ ọ rẹ ma omaa kpahotọ.

  “O gwọlọ nọ ohwo ọ rẹ ma omaa ziezi re ọ sae re emamọ emu, yọ emu nọ ohwo o there o rẹ mai woma kẹ ugboma na. Dede nọ o lọhọ họ, irere buobu i re noi ze, yọ u re ru nọ ohwo ọ gbẹ rọ raha ugho vrẹta ha.”—Thomas.

• Mu emamọ emu họ ẹre. Ebaibol na ọ ta nọ: “Wo uvi areghẹ.” (Itẹ 3:21) Who te wo uvi areghẹ, u ti ru nọ whọ te rọ riẹ emamọ emu sa-sa nọ u fo nọ whọ rẹ re jẹ hae re ae ẹsikpobi.

  “Oware nọ me re ru họ, kẹdẹ kẹdẹ mẹ rẹ daoma re mẹ re emamọ oware jọ. Wọhọ oriruo, ukpenọ mẹ re enuawere, kọ apo mẹ rẹ re. U kri hi, me te ti mu eware itienana họ eru ziezi kẹdẹ kẹdẹ!”—Kia.

• Who rẹro oware nọ whọ sai ru hu mi omara ha. Ebaibol na ọ ta nọ: “Re emu ra avọ oghọghọ.” (Ọtausiuwoma Na 9:7) Re whọ re emamọ emu, orọnikọ u dhesẹ hẹ inọ ohwo ọ rẹ gbẹ re oware omemere ọvuọvo ho hayo ruawa kpahe oware kpobi nọ ọ be re. O tẹ make rọnọ whọ gwọlọ fu hu, kareghẹhọ nọ re who wo omokpokpọ who bi ro ru eware nana kpobi na. Fikiere, who rẹro oware nọ whọ rẹ sai ru hu mi omobọ ra ha.

  “Kẹle na me muẹrohọ nọ mẹ kpọ vi epaọ ọsosuọ no. Dede na, mẹ rọ ohọo kpe omamẹ ẹdẹvo ho, hayo siọ oghẹrẹ emu jọ ba ẹre he, yọ mẹ jẹ ruawa ha nọ mẹ tẹ make re enuawere ẹsejọ. Mẹ riẹ nọ re mẹ sae kpọ, o rrọ oware asohẹrioke he, yọ o gwọlọ nọ mẹ rẹ se oghẹrẹ eware jọ ba ẹre, jẹ re enọ i re fiobọhọ kẹ oma na.”—Melanie.