Ẹvẹ Whọ Be Re Emu Abọ-Ẹzi D’oma Te?
1 A rẹ ta nọ ‘epanọ ma re emu te ere ma re wo ẹkoma te re.’ Evaọ uzẹme, oghẹrẹ nọ ma rẹ re emu u re kpomahọ ogaga ugboma gbe omakpokpọ mai. Nọ Jesu ọ ta nọ: “Fiki ebrẹdi ọvo ohwo ọ rẹ rọ zọ họ, rekọ fiki kẹme kẹme nọ ọ via no unu Ọghẹnẹ ze” na, epọvo na oghẹrẹ nọ ma rẹ re emu abọ-ẹzi u re kpomahọ omai kẹ ewoma hayo eyoma. (Mat. 4:4) Fikiere, ẹvẹ whọ be re emu d’oma te evaọ abọ-ẹzi? Whẹ yọ ohwo nọ ọ rẹ salọ emu? Kọ whọ rẹ re emu avọ okpakpa? Manikọ o rẹ were owhẹ re whọ roma totọ reawere emamọ emuore abọ-ẹzi ẹsikpobi?
2 Kiẹ Oghẹrẹ Emuọriọ Ra Riwi: Jihova ọ rẹ kẹ ‘emuore evaọ ẹruoke’ avọ “emamọ emu,” ẹkwoma ‘ọrigbo nọ o wo ẹrọwọ avọ areghẹ na.’ (Mat. 24:45; Aiz. 25:6) Re ma wo erere no eruẹrẹfihotọ uyoyou enana ze vọvọ, ma rẹ daoma re ma re emu d’oma ziezi evaọ abọ-ẹzi.
3 Whọ sae nọ oma ra nọ: ‘Kọ me bi se ikere okpẹdẹ na gbe ọkpahefihọ riẹ kẹdẹ kẹdẹ? Kọ me bi se je roro kpahe Ebaibol na kẹdẹ kẹdẹ? Kọ mẹ be ruẹrẹ oma kpahe kẹ iwuhrẹ ukoko ẹkwoma ebe nọ a bi ti wuhrẹ na nọ me re se re oke u te te? Kọ me se ebe ekpokpọ mai n’oka duoka no?’
4 Jesu ọ y’eyaa nọ: “Ahwo nọ a [se ẹgwọlọ abọ-ẹzi rai gboja], eva e were ae . . . Ahwo nọ ohọo gbe uruame ẹrẹreokie u re kpe eva e were ae, keme eva e rẹ te vọ ae.” (Mat. 5:3, 6) Fikiere, re emu d’oma evaọ abọ-ẹzi ẹkwoma eriariẹ Ọghẹnẹ nọ whọ rẹ rọ vọ iroro gbe udu ra.