Ẹrọo Ẹdidi

Evaọ oke nọ u kpemu, egba-eriariẹ a je roro nọ ọvra nọ a re se ẹdidi ọ rẹ sae rehọ ẹrọo riẹ se ame idodo keme ighogho e rrọ ẹrọo riẹ. A roro nọ ọ tẹ thọrọ ẹrọo riẹ fihọ ame ododo, ọ vẹ rọ ighogho na se ame na rehọ. Rekọ ekiakiẹ nọ a ru uwhremu na i dhesẹ nọ ere o rrọ họ. Oghẹrẹ ofa nọ ọ mai woma oye ọvra nana ọ rẹ rọ lalọ ame ododo.

Roro kpahe onana: Nọ ẹdidi ọ tẹ thọrọ ẹrọo riẹ họ ame ododo, ẹrọo riẹ ọ vẹ hẹriẹ kpohọ abava wọhọ ẹsenọ o wo erọo ivẹ. Yọ evaọ obọ ẹroro ivẹ na ọvuọvo, eria jọ i re rovie fihọ. Nọ o te si ẹrọo riẹ rehọ, o ve zihe kpohọ epanọ o jọ. Fikiere nọ ọ tẹ thọrọ ẹrọo riẹ nọ ọ hẹriẹ kpohọ abava na họ ame ododo, ọ vẹ rriẹ obọ ẹroro ẹrọo riẹ nọ o kpiri vẹre na, ame ododo na o ve su ruọ eria nọ i rovie fihọ na. Kọ enẹ ọ sae rọ lalọ ame ododo na, orọnikọ ọ rẹ rọ ẹrọo riẹ se ame na rehọ họ. Nọ o te kpiri obọ ẹroro ẹrọo riẹ na no, ẹrọo na o ve vi rehọ avọ ame ododo na nọ o rrọ unu riẹ.

Egba-eriariẹ jọ nọ a re se Alejandro Rico-Guevara, Tai-Hsi Fan, gbe Margaret Rubega, a ta nọ ẹdidi ọ rẹ thọrọ ẹrọo riẹ họ ame ododo je vi ei rehọ vẹrẹ vi “emaharo ọvo kpekufiẹ.” A tẹ jẹ ta nọ: “Obọ ẹroro ẹrọo riẹ na o wọhọ oware nọ a rẹ rọ jẹ ame nọ o re nwene . . . fihọ oghẹrẹ ọfa okenọ ọ tẹ be thọrọ iẹe fihọ ame ododo je vi ei rehọ.”

Ofariẹ, ẹdidi ọ rẹ rọ ẹgba riẹ ru onana ha. Eware jọ nọ e rrọ ẹrọo riẹ eye i re ru nọ ẹrọo na ọ rẹ rọ rriẹ hayo kpiri nọ o te vi ei lahwe.

Fikinọ ẹdidi ọ riẹ epanọ ọ rẹ rehọ ẹrọo riẹ lalọ ame ododo ziezi, egba-eriariẹ a bi roro kpahe epanọ a sai ro ku eware nọ e wọhọ ẹrọo ẹdidi nọ i re fiobọhọ evaọ ofẹ usiwo imu, erọbọto nọ a bi ku, gbe eware efa. A sai tube rri rie ro ku eware nọ a re ro ririe ame hayo ewhri.

Ẹvẹ who roro? Kọ ẹrọo ẹdidi nọ ọ rẹ rọ lalọ ame ododo ziezi na, u mu romavia? Manikọ ẹma a ma riẹ?