Matiu 6:34—“Wha Ruawa Odẹ Hẹ”

“Fikiere, wha ruawa odẹnotha vievie he, keme odẹnotha o ti wo ẹkẹ ebẹbẹ riẹ. Ebẹbẹ ẹdẹ kpobi i te kẹ ẹdẹ yena.”—Matiu 6:34, Efafa Akpọ Ọkpokpọ.

“Fikiere wha ruawa odẹ hẹ, keme odẹ ọ rẹ ruawa o riẹ. Uyoma ẹdẹ oda riẹ ẹro.”—Matiu 6:34, Ebaibol Ẹri Na.

Otofa Eme nọ E Rrọ Matiu 6:34

Jesu họ ohwo nọ ọ ta eme nana. Ọ ta kẹ ahwo nọ a jẹ gaviezọ kẹe nọ u du gwọlọ nọ a rẹ ruawa vrẹta ha kpahe ebẹbẹ nọ a ti wo evaọ obaro. Ukpoye, nọ okpẹdoke u te te, jọ a ruawa kpahe ẹdẹ yena ọvo.

Orọnikọ Jesu ọ be ta nọ ma du roro kpahe odẹ hẹ hayo ma omaa kpahe obaro ho ho. (Itẹ 21:5) Ukpoye, ọ be ta nọ ma du ruawa vrẹta ha kpahe eware nọ ma roro nọ e sae via evaọ odẹ. Ma tẹ be ruawa ere, u re ru nọ ma gbẹ rọ wereva ha, o vẹ jẹ whae ze nọ ma gbẹ rọ tẹrovi eware nọ u fo nọ ma re ru hu. Ma tẹ be ruawa kpahe eware nọ e re te via ha, erere ọvo o re noi ze he. Yọ ẹsibuobu, eware nọ ma rẹ ruawa rai na dede e rẹ via ha, hayo e tẹ make via dede, e rẹ nwani yoma te epanọ ma je roro ho.

Eme nọ E Wariẹ Matiu 6:34 Họ

Jesu ọ ta eme nana evaọ okenọ ọ jẹ kẹ Ovuẹ Obọ Ugbehru nọ ahwo a riẹ gaga na, yọ a kere eme nana fihọ obe Matiu izou 5 rite 7. Evaọ Ovuẹ Obọ Ugbehru na, Jesu ọ ta nọ, makọ oghẹrẹ nọ ma ruawa te kẹhẹ, ma rẹ sae rria kri vrẹ epanọ ma hae te rria kri te he, yọ orọnikọ ẹsiẹe akpọ mai ọ rẹ mai woma ha. (Matiu 6:27) Ọ tẹ jẹ ta nọ ma tẹ be rọ egagọ Ọghẹnẹ karo evaọ uzuazọ mai, u du gwọlọ nọ ma rẹ ruawa gaga kpahe odẹnotha ha. Nọ orọnọ Ọghẹnẹ ọ be rẹrote erao gbe ekakọ na, ọ te rẹrote ahwo nọ a be gọe re.—Matiu 6:25, 26, 28-33.