Eware nọ Who re Ru re Who Gbe Roro Iroro Ga Hrọ Họ
Awaọruọ ọgaga o rẹ sae wha ẹyao họ ohwo oma, je ru nọ ohwo o re ro roro iroro egaga. O rẹ jẹ wha ebẹbẹ efa ze nọ e ro vi ebẹbẹ nọ ohwo ọ be rọ fiki rai ruawa na.
Eware jọ nọ i re fiobọhọ kẹ ohwo nọ o gbe ro roro iroro ga hrọ họ
Who du gaviezọ kẹ ekpehre iyẹrẹ ẹsikpobi hi. U du gwọlọ nọ whọ rẹ riẹ kpahe oware uyoma kpobi nọ o be via ha. Nọ whọ tẹ gaviezọ kẹ ekpehre iyẹrẹ ga hrọ, e sae lẹliẹ ozọ mu owhẹ, jẹ wha ọkora họ owhẹ oma.
Ohrẹ Ebaibol: “Uweri u re mi ohwo ẹgba.”—Itẹ 17:22.
“O bẹ hẹ re ohwo ọ hai kpohọ itanẹte ẹsikpobi re ọ ruẹ eware ekpokpọ gbe eware imuozọ nọ e be via, rekọ uruemu yena u kiehọ họ. Anwẹnọ mẹ gbẹ be rọ gaviezọ kẹ iyẹrẹ tere he na, mẹ gbẹ be ruawa gaga ha.”—John.
Roro kpahe onọ nana: Ẹvẹ u fo nọ whọ rẹ gaviezọ kẹ iyẹrẹ ekpokpọ kpekpe te?
Hai ru eware evaọ oke ovona. Hae daoma kpama, re emu, ru iruo uwou je kiẹzẹ evaọ oke ovona kẹdẹ kẹdẹ. Nọ whọ tẹ ma omaa eware nọ who ti ru kpahotọ, u ti ru nọ eware i ti ro zihe kpohọ epanọ e jọ vẹre, yọ whọ gbẹ te ruawa tere he.
Ohrẹ Ebaibol: “Omaa ohwo nọ o re kru obọ ga, o rẹ riẹ nya hrọ.”—Itẹ 21:5.
“Nọ ẹyao COVID-19 na o muhọ obọ, me gbe je ru eware nọ mẹ jẹ hai ru vẹre he, mẹ tẹ jẹ rọ oke mẹ kpobi ro rri etẹlẹvisiọno. Rekọ fikinọ mẹ gwọlọ rọ oke mẹ ru oware nọ u fo, me te kere eware nọ mẹ te hai ru kẹdẹ kẹdẹ fihotọ.”—Joseph.
Roro kpahe onọ nana: Kọ u wo eware jọ nọ whọ be hai ru kẹdẹ kẹdẹ nọ e rẹ lẹliẹ eva were owhẹ evaọ ekuhọ ẹdẹ kpobi?
Tẹrovi emamọ eware nọ e be via evaọ uzuazọ ra. Whọ tẹ be hai roro kpahe eware nọ whọ riẹ ru hu hayo ekpehre eware nọ e rẹ sae via evaọ obaro, e sai lẹliẹ owhẹ ruawa. Ukpoye, whọ sai roro kpahe emamọ eware ivẹ hayo esa jọ nọ e rẹ lẹliẹ eva were owhẹ.
Ohrẹ Ebaibol: “Wha hai dhesẹ nọ wha wo edẹro.”—Ahwo Kọlọsi 3:15.
“Nọ me te bi se Ebaibol na, u re fiobọhọ kẹ ọmẹ roro kpahe emamọ eware orọnikọ ikpehre eware nọ e be via ha. Ohwo ọ sai roro nọ yọ oware ọvo ho, rekọ u re fiobọhọ.”—Lisa.
Roro kpahe onọ nana: Kọ ikpehre eware nọ e via kẹ owhẹ no ọvo whọ be hai roro kpahe viukpọ emamọ eware nọ e be via evaọ uzuazọ ra?
Hai roro kpahe amọfa. Ukpenọ who re siomano ahwo fikinọ whọ be ruawa, daoma roro kpahe epanọ whọ sai ro fiobọhọ kẹ ahwo nọ whọ ruẹ nọ a gwọlọ obufihọ.
Ohrẹ Ebaibol: “Wha gwọlọ ewoma obọrai ọvo ho, rekọ ewoma amọfa re.”—Ahwo Filipai 2:4.
“Eva e rẹ were omẹ nọ me te fiobọhọ kẹ amọfa. Mẹ riẹ nọ eva e rẹ were ae re, yọ onana u re ru nọ mẹ gbẹ rọ ruawa gaga ha. Uzẹme riẹ họ, me re gbe tube wo oke nọ mẹ rẹ rọ ruawa ha.”—Maria.
Roro kpahe onọ nana: Evaọ usu ahwo nọ whọ riẹ kpobi, evẹ họ enọ e ginẹ gwọlọ obufihọ, kọ eme whọ rẹ sai ru ro fiobọhọ kẹ ae?
Hae rẹrote ugboma ra. Hai serihọ je ru eware nọ e rẹ lẹliẹ oma ra jaja ziezi. Hae re emamọ emu. Whọ tẹ be hae rẹrote oma ra ziezi, u ti ru nọ who ti ro roro kpahe emamọ eware nọ e be via evaọ uzuazọ, yọ onana u ti ru nọ whọ gbẹ rọ ruawa tere he.
Ohrẹ Ebaibol: “Oma na nọ a re ru jaja o rẹ kẹ . . . erere.”—1 Timoti 4:8.
“O nwane lọhọ kẹ omẹ avọ ọmọzae mẹ re ma kpohọ otafe nyai ru oma mai jaja wọhọ epanọ ma gwọlọ họ, fikiere ma be hae jọ uwou ru ei ẹsikpobi. Onana u ru nọ ma be rọ wereva, jọ wowou je wo odiri kẹ ohwohwo.”—Catherine.
Roro kpahe onọ nana: Nọ orọnọ o gwọlọ nọ ohwo ọ rẹ re emamọ emu je ru oma riẹ jaja re ọ sai wo omokpokpọ na, kọ who muẹrohọ oria nọ whọ gbẹ sae jọ daoma no?
Eware nana e rẹ sai fiobọhọ kẹ ohwo nọ ọ gbẹ rọ ruawa tere he. Ofariẹ, eyaa nọ Ọghẹnẹ ọ ya kpahe obaro nọ e rrọ Ebaibol na i fiobọhọ kẹ ahwo buobu no re. Rri uzoẹme na, “Eme Uvie Ọghẹnẹ U ti Ru?”