Eware nọ Ohwo Ọ rẹ Sai Ru nọ O te Kie Ẹyao Idudhe

Ohwo ọ sai kie ẹyao idudhe. O tẹ via ere, onana o sae lẹliẹ oma rrọ ohwo, ru nọ ohwo o re ro roro iroro, jẹ raha ugho gaga. Rekọ eme o rẹ sai fiobọhọ kẹ owhẹ thihakọ? Ẹvẹ whọ sai ro fiobọhọ kẹ ohwo uviuwou hayo ogbẹnyusu ra nọ ọ be mọ? Dede nọ Ebaibol na yọ obe imu hu, ma sae jọ eva riẹ se kpahe ehrẹ nọ i re fiobọhọ kẹ omai thihakọ ebẹbẹ mai.

Eware jọ nọ e rẹ sai fiobọhọ kẹ owhẹ thihakọ ẹbẹbẹ ẹyao

• Kpohọ ẹsipito

  Oware nọ Ebaibol na ọ ta: “Ahwo nọ oma rai o ga a gwọlọ ọbo-imu hu, rekọ enọ e be mọ e gwọlọ ọbo-imu.”​—Matiu 9:12.

  Oware nọ onana u dhesẹ: O tẹ lọhọ, kpohọ ẹsipito re edọkita a fiobọhọ kẹ owhẹ.

  Dawo onana: Kpohọ oria nọ o mai woma nọ a sae jọ siwi ẹyao na. Ẹsejọ, o rẹ mai woma re whọ nọ kpahe ẹyao na mi edọkita sa-sa. (Itẹ 14:15) Ruẹ nọ who lele i rai ta ẹme ziezi re a riẹ oware nọ o be kẹ owhẹ uye na vevẹ. Daoma ruẹ nọ who wo otoriẹ oware nọ a ta kẹ owhẹ ziezi. (Itẹ 15:22) Kiẹ kpahe ẹyao ra na gbe oghẹrẹ sa-sa nọ a sai ro siwi ei. Nọ whọ tẹ riẹ kpahe epanọ usiwo na o te jọ, u re fiobọhọ kẹ owhẹ riẹ oware nọ who re ru jẹ salọ usiwo nọ u re kiehọ owhẹ oma.

• Hai ru eware nọ i re fiobọhọ kẹ ugboma na

  Oware nọ Ebaibol na ọ ta: “Oma na nọ a re ru jaja o rẹ kẹ . . . erere.”​—1 Timoti 4:8.

  Oware nọ onana u dhesẹ: Irere buobu i re te owhẹ nọ who te bi ru eware nọ i re fiobọhọ kẹ ugboma na, wọhọ oma na nọ a re ru jaja ẹsikpobi.

  Dawo onana: Hai ru oma ra jaja evaọ oke nọ who fihọ, hae re emu nọ o re kiehọ oma na, jẹ daoma wezẹ ziezi. Dede nọ eware e te nwane jọ epanọ e rrọ anwẹdẹ kẹ owhẹ hẹ fiki ẹyao na, egba-eriariẹ a ta nọ irere buobu i re te ohwo nọ ọ tẹ be hae rehọ oke riẹ ru eware nọ i re fiobọhọ kẹ ugboma na. Ghele na, daoma ruẹ nọ eware nọ who bi ru i re ru ẹyao na ga ha, yọ e rẹ raha imu nọ a bi ro siwi owhẹ hẹ.

• Ta kẹ amọfa re a fiobọhọ kẹ owhẹ

  Oware nọ Ebaibol na ọ ta: “Emamọ ogbẹnyusu o re dhesẹ uyoyou ẹsikpobi[,] ọ tẹ jẹ rrọ oniọvo nọ a yẹ fiki oke idhọvẹ.”​—Itẹ 17:17.

  Oware nọ onana u dhesẹ: Egbẹnyusu ra a sai fiobọhọ kẹ owhẹ thihakọ evaọ oke ebẹbẹ.

  Dawo onana: Ta eva ra kẹ ogbẹnyusu ra jọ nọ who fievahọ ziezi. Nọ who te ru ere, onana u re fiobọhọ kẹ owhẹ thihakọ je ru udu te owhẹ otọ. Egbẹnyusu gbe ahwo uviuwou ra a sae gwọlọ nọ a re fiobọhọ kẹ owhẹ evaọ idhere efa, rekọ o sae jọnọ a riẹ oware nọ a re ru hu. Fikiere vuẹ ae oware nọ a re ru ro fiobọhọ kẹ owhẹ. Who du rẹro nọ a te nwani ru eware kpobi nọ whọ ta kẹ ae he, jẹ ruẹ nọ who yere i rai rọkẹ eware nọ a sai ru kẹ owhẹ. Rekọ kareghẹhọ nọ, dede nọ egbẹnyusu ra a gwọlọ fiobọhọ kẹ owhẹ, ẹsejọ a sai ru ei te epanọ o rẹ rọ vẹso owhẹ. Fikiere vuẹ ae umuo nọ a re ru ba, wọhọ epanọ a re wezẹ bru owhẹ ze kpekpe te gbe epanọ a re kri te.

• Hae wereva

  Oware nọ Ebaibol na ọ ta: “Udu nọ oghọghọ o rrọ yọ emamọ umu, rekọ uweri u re mi ohwo ẹgba.”​—Itẹ 17:22.

  Oware nọ onana u dhesẹ: Nọ ohwo ọ tẹ be hae wereva je rẹro nọ eware i ti woma, onana u re ru udu te ei otọ je fiobọhọ kẹe thihakọ ẹbẹbẹ ẹyao.

  Dawo onana: Nọ whọ be daoma riẹ epanọ whọ sai ro yeri uzuazọ ra vrẹ avọ ẹyao na, tẹrovi eware nọ whọ rẹ sai ru orọnikọ enọ whọ rẹ sai ru hu hu. Who du rọ oma ra wawo amọfa ha, hayo rọ oma ra wawo epanọ whọ jọ taure who te ti kie ẹyao na ha. (Ahwo Galesha 6:4) Fi itee họ kẹ omara nọ whọ rẹ sai le te obọ, keme onana u re fiobọhọ kẹ owhẹ wereva je wo emamọ iroro. (Itẹ 24:10) Hai ru eware kẹ amọfa te epanọ ẹgba ra u te. Eva e te were owhẹ nọ who te bi fiobọhọ kẹ amọfa, yọ onana u ti ru nọ who gbe ro roro kpahe ẹyao ra na tere he.​—Iruẹru Ikọ 20:35.

Kọ Ọghẹnẹ o ti fiobọhọ kẹ owhẹ thihakọ ẹbẹbẹ ẹyao?

Ebaibol na o dhesẹ nọ Ọghẹnẹa ọ sai fiobọhọ kẹ ohwo thihakọ ẹbẹbẹ ẹyao. Dede nọ ma re rẹro nọ Ọghẹnẹ o ti siwi omai evaọ edhere igbunu hu, Ọghẹnẹ ọ sai fiobọhọ kẹ ahwo nọ a be gọe evaọ idhere nana nọ ma be te fodẹ na:

Udhedhẹ. Jihova ọ rẹ sae kẹ omai “udhedhẹ Ọghẹnẹ nọ u vi otoriẹ kpobi.” (Ahwo Filipai 4:6, 7) Udhedhẹ nana o re ru udu te ohwo otọ, je ru nọ ohwo o gbe ro roro iroro ga hrọ họ. Ọghẹnẹ ọ rẹ kẹ idibo riẹ udhedhẹ nana nọ a tẹ be lẹ se ei kpahe eware nọ e be lẹliẹ ae ruawa.​—1 Pita 5:7.

Areghẹ. Jihova ọ rẹ sae kẹ omai areghẹ nọ ma sae rọ jẹ emamọ iroro. (Jemis 1:5) Ohwo o re wo areghẹ nana nọ ọ tẹ be hai se Ebaibol na, je fi eware nọ o bi wuhrẹ họ iruo.

Ẹruore kpahe obaro. Jihova ọ ya eyaa nọ evaọ obaro, “ohwo ọvo nọ ọ be rria ẹkwotọ na nọ ọ te ta nọ, ‘Mẹ be mọ’ ọ te jariẹ hẹ.” (Aizaya 33:24) Ẹruore nana o bi fiobọhọ kẹ ahwo buobu wereva o tẹ make rọnọ a be mọ ẹyao nọ ọ rrọ gaga.​—Jerimaya 29:11, 12.