Nọ Oware Okpẹtu O tẹ Via

Dede nọ whọ be dawo ẹgba ra kpobi re who wo evawere evaọ orọo gbe uviuwou ra, eware nọ a rẹro rai hi e sae via nọ i re ru nọ who gbe ro wo evawere he. (Ọtausiuwoma Na 9:11) Nọ ebẹbẹ i te te omai, Ọghẹnẹ o re fiobọhọ kẹ omai. Makọ epanọ ẹbẹbẹ ọ rro te kẹhẹ, who te ru lele ithubro Ebaibol nọ ma be te ta kpahe na, i ti fiobọhọ kẹ owhẹ avọ uviuwou ra kru udu ga.

1 RẸROSO JIHOVA

OWARE NỌ EBAIBOL NA Ọ TA: “Wha gbolo awaọruọ rai kpobi kẹe, keme ọ be daezọ rai.” (1 Pita 5:7) Hae kareghẹhọ ẹsikpobi nọ orọnikọ Ọghẹnẹ ọ wha ebẹbẹ ra ze he. (Jemis 1:13) Who te si kẹle iẹe, o ti fiobọhọ kẹ owhẹ. (Aizaya 41:10) “Wha rovie eva rai rọ kẹ e.”—Olezi 62:8.

Who ti je wo omosasọ nọ whọ tẹ be hai se Ebaibol na kẹdẹ kẹdẹ. Whọ vẹ te ruẹ nọ Jihova họ “ọnọ ọ rẹ sasa omai oma evaọ uye kpobi nọ ma rrọ.” (2 Ahwo Kọrint 1:3, 4; Ahwo Rom 15:4) Ọ ya eyaa nọ ọ te kẹ owhẹ “udhedhẹ Ọghẹnẹ nọ u vi otoriẹ kpobi.”—Ahwo Filipai 4:6, 7, 13.

OWARE NỌ WHỌ RẸ SAI RU:

• Lẹ se Jihova re o fiobọhọ kẹ owhẹ rọ udu t’otọ je rorote ziezi

• Roro kpahe eware sa-sa nọ whọ rẹ sai ru re whọ salọ onọ o mai kiehọ

2 RẸROTE OMARA GBE UVIUWOU RA

OWARE NỌ EBAIBOL NA Ọ TA: “Ọkiroro ọye o re wo urusio eriariẹ, jegbe ezọ enọ i wo areghẹ e rẹ gwọlọ eriariẹ.” (Itẹ 18:15) Daoma wo otoriẹ oware nọ o rrọ otọ na gbe epanọ o rrọ ahwo uviuwou ra oma. Daoma riẹ oware nọ omomọvo evaọ uviuwou na ọ gwọlọ. Lele ai ta ẹme. Gaviezọ kẹ ae.—Itẹ 20:5.

Eme who re ru otẹrọnọ ohwo nọ who you o whu? Otẹrọnọ oviẹ o gba owhẹ udu, who du vuoma oviẹ hẹ. Kareghẹhọ nọ “irui-oviẹ” i no Jesu aro ze. (Jọn 11:35; Ọtausiuwoma Na 3:4) U te no ere no, hae daoma somahọ ziezi jẹ wezẹ doma. (Mak 6:31) Onana o rẹ sai fiobọhọ kẹ owhẹ thihakọ ẹbẹbẹ na.

OWARE NỌ WHỌ RẸ SAI RU:

• Nọ oware okpẹtu o re romavia ha, daoma hai lele ahwo uviuwou ra ta ẹme ẹsikpobi. O jẹ rọnọ ẹbẹbẹ ọ romavia, a vẹ sai rovie eva kẹ owhẹ

• Lele amọfa nọ oware utioye o via kẹ no ta ẹme

3 DEDE OBUFIHỌ AMỌFA REHỌ

OWARE NỌ EBAIBOL NA Ọ TA: “Ogbẹnyusu uzẹme o re dhesẹ uyoyou ẹsikpobi, yọ ọ rrọ oniọvo nọ o re fiobọhọ evaọ etoke uye.” (Itẹ 17:17, NW) Egbẹnyusu ra a gwọlọ fiobọhọ kẹ owhẹ, rekọ a riẹ oware nọ a re ru ro fiobọhọ họ. Ta oware nọ whọ ginẹ gwọlọ kẹ ae, whọ ko ẹe dhere he. (Itẹ 12:25) U te no ere no, vuẹ ahwo nọ a wo otoriẹ Ebaibol na re a fiobọhọ kẹ owhẹ bọ usu ra kugbe Ọghẹnẹ ga. Ohrẹ nọ a te kẹ owhẹ no Ebaibol na ze u ti fiobọhọ kẹ owhẹ.—Jemis 5:14.

Nọ whọ tẹ be hai kuomagbe ahwo nọ a wo ẹrọwọ nọ i fievahọ eyaa Ọghẹnẹ, u ti fiobọhọ kẹ owhẹ kru udu ga. Whọ rẹ sai je wo omosasọ nọ whọ tẹ be tuduhọ ahwo nọ a wo ẹbẹbẹ awọ. Ta kẹ ae kpahe Jihova gbe eyaa riẹ. Fiobọhọ kẹ ahwo nọ e gwọlọ obufihọ, yọ who siomano ahwo nọ i you owhẹ gbe he.—Itẹ 18:1; 1 Ahwo Kọrint 15:58.

OWARE NỌ WHỌ RẸ SAI RU:

• Ta eva kẹ ogbẹnyusu ọkpekpe ra re o fiobọhọ kẹ owhẹ

• Fodẹ uzedhe oware nọ a sai ru ro fiobọhọ kẹ owhẹ