Epanọ Whọ Sai ro Fiobọhọ kẹ Ahwo nọ A be Mọ Ẹyao Iroro

Oware nọ Onana U Dhesẹ

Ẹsejọ ma rẹ riẹ oware nọ ma re ru hu nọ ohwo mai jọ ọ tẹ be mọ ẹyao iroro. Ma re dhesẹ nọ ma be daezọ riẹ nọ ma te bi ru eware nọ i re fiobọhọ kẹe thihakọ ẹyao na. Evaọ oghẹrẹ vẹ?

Epanọ Whọ Sai ro Fiobọhọ

“Jọ ọnọ ọ rẹ kake gaviezọ.”—JEMIS 1:19.

Edhere jọ nọ whọ sai ro fiobọhọ họ, whọ rẹ gaviezọ kẹe nọ ọ tẹ be ta ẹme. Riẹ nọ orọnikọ ẹme kpobi nọ ọ ta whọ rẹ kpahe fihọ họ. Dhesẹ kẹe nọ whọ be gaviezọ jẹ be daezọ riẹ. Daoma riẹ epanọ ẹyao na o be kẹe uye te, yọ who du gu ei ẹdhọ họ. Kareghẹhọ nọ ọ sae ta eme izuehọ fiki oghẹrẹ nọ ẹyao na u bi ru ei, yọ e sae kẹe uye ẹdẹfa.—Job 6:2, 3.

“Ta eme omosasọ.”—1 AHWO TẸSALONIKA 5:14.

Ohwo ra nọ ọ be mọ na ọ sae ruawa hayo rri omariẹ nọ o fioka ha. Rekọ nọ who te bi dhesẹ kẹe nọ whọ be daezọ riẹ, onana o rẹ sasa iẹe oma jẹ tuduhọ iẹe awọ, o tẹ make rọnọ whọ riẹ uzedhe ẹme nọ whọ rẹ ta dede he.

“Emamọ ogbẹnyusu o re dhesẹ ­uyoyou ẹsikpobi.”—ITẸ 17:17.

Ru oware jọ ro fiobọhọ kẹe. Ukpenọ who re roro nọ whọ riẹ oware nọ ọ gwọlọ, nọe oware nọ ọ gwọlọ nọ who ru kẹe. O tẹ rrọ bẹbẹ kẹe re ọ ta oware nọ ọ gwọlọ, whọ sae fodẹ oware jọ nọ whẹ avọ iẹe wha re ru kugbe. Wọhọ oriruo, whẹ sae ta nọ wha kpohọ ore. Hayo whọ sae dẹ oware se ei, lele iei ru orufuọ, hayo ru oware ofa jọ.—Ahwo Galesha 6:2.

“Wo odiri.”—1 AHWO TẸSALONIKA 5:14.

Orọnọ ẹsikpobi o te were ohwo ra nọ ọ be mọ na re ọ ta ẹme he. Rekọ vuẹe nọ eva e te were owhẹ re whọ gaviezọ kẹe oke kpobi nọ ọ tẹ gwọlọ ta ẹme jọ. Fiki ẹyao na, ọ sae ta eme jọ hayo ru eware jọ nọ e te kẹ owhẹ uye. Ọ sai nwene iroro evaọ oware nọ wha rọwo fihọ no hayo eva e rẹ sai mu dhae. Wo odiri yọ whọ kake dha eva kẹe he.—Itẹ 18:24.

Eware E rẹ Sai Nwene nọ Who te Fiobọhọ

“Mẹ daoma jọ ohwo nọ ọ rẹ sae ta ẹme kẹ lọlọhọ. Dede nọ mẹ sai ku ebẹbẹ riẹ họ họ, mẹ jẹ hae daoma gaviezọ kẹe ziezi. Ẹsejọ oware nọ ọ gwọlọ kpobi họ, ohwo jọ nọ ọ rẹ gaviezọ kẹe. Onana ọvo u re ru udu tei otọ.”—Farraha nọ ogbẹnyusu riẹ ọ rẹ re emu tere he jẹ ruawa gaga, o te je wo ẹyao ọkora.

“Ogbẹnyusu mẹ jọ ọ rrọ wowou yọ ọ rẹ tuduhọ omẹ awọ. O zizie omẹ kpobọ uwou riẹ nyae re emu ẹdẹ jọ. Evaọ oke nọ ma rọ jọ obọ uwou riẹ na, mẹ ta eva mẹ kẹe keme mẹ ruẹ nọ o you omẹ gaga. Oware nana o tuduhọ omẹ awọ.”—Ha-eun nọ o wo ẹyao ọkora.

“Odiri o wuzou gaga. Nọ aye mẹ o te ru oware jọ nọ o kẹ omẹ uye, mẹ rẹ ta kẹ omamẹ nọ ẹyao riẹ na oye o be lẹliẹe ru oware na orọnikọ ere ọ rrọ họ. Onana u re ru nọ me gbe ro mu ofu kẹe he, jẹ daoma dhesẹ ororokẹ.”—Jacob nọ aye riẹ o wo ẹyao ọkora.

“Aye mẹ ọ be hai fiobọhọ kẹ omẹ jẹ sasa omẹ oma. Nọ mẹ tẹ be ruawa gaga, ọ rẹ gba omẹ họ họ re me ru oware nọ mẹ gwọlọ ru hu. Onana u dhesẹ nọ ẹsejọ eware jọ nọ ọ hae te gwọlọ ru, ọ sai ru ai hi. Me you aye mẹ na gaga keme ọ rrọ wowou, yọ o re roro kpahe omobọ riẹ ọvo ho.”—Enrico nọ ọ rẹ ruawa gaga.