Itẹ 16:3—“Rehọ Iruo Ra Kẹ ỌNOWO Na”

“Rehọ oware kpobi nọ who bi ru họ obọ Jihova, omaa ra kpobi u ve ti rugba.”—Itẹ 16:3, Efafa Akpọ Ọkpokpọ.

“Rehọ iruo ra kẹ ỌNOWO na, o re ti ru [ẹjiroro] ra gba.”—Itẹ 16:3, Ebaibol Ẹri Na.

Otofa Eme nọ E Rrọ Itẹ 16:3

Eme nọ e rrọ Itẹ nana i dhesẹ nọ idibo Ọghẹnẹ a tẹ rẹroso ẹe evaọ oware kpobi nọ a bi ru, je bi koko izi riẹ, eware e rẹ riẹ nya kẹ ae.

“Rehọ oware kpobi nọ who bi ru họ obọ Jihova.” Taure odibo Jihovaa ọ tẹ te jiroro jọ kpobi, ọ rẹ romatotọ rri ẹme Ọghẹnẹ re ọ riẹ oware nọ o re ru. (Jemis 1:5) Fikieme o re ro ru ere? Oware jọ họ, mai ahwo-akpọ ma riẹ oghẹrẹ nọ uzuazọ mai o te jọ odẹ hẹ. Eware nọ ma rẹro rai hi e sae via. (Ọtausiuwoma Na 9:11; Jemis 4:13-15) U te no ere no, ẹsejọ eware jọ nọ ahwo a rẹ gwọlọ ru, a riẹ epanọ a sai ro ru ai hi. Oye o soriẹ ze nọ ahwo buobu a rẹ rọ rẹroso Ọghẹnẹ nọ a tẹ gwọlọ ru oware jọ. Eme o re dhesẹ nọ a rẹroso Jihova? A rẹ lẹ se Jihova nọ a tẹ be jiroro jọ, a ve je se Ebaibol na re a riẹ oreva Jihova gbe oghẹrẹ nọ Jihova o rri iroro nọ a gwọlọ jẹ na.—Itẹ 3:5, 6; 2 Timoti 3:16, 17.

Ẹme na “rehọ iruo ra kẹ ỌNOWOb na,” a sae jẹ tae nọ “ghelie iruo ra kẹ ỌNOWO na.” A jọ obe jọ nọ o rẹ fotọ eme Ebaibol ru ẹme nana vẹ. Obe na o ta nọ oria Ebaibol yena u bi dhesẹ “epanọ ohwo nọ ọ wọ owha nọ o gbẹdẹ vi ei ọ rẹ wọ owha na kẹ omọfa nọ ọ goma vi ei, nọ ọ rẹ sae wọ owha na lọlọhọ.” Ahwo nọ a romakpotọ kẹ Ọghẹnẹ je fievahọ iẹe, udu u re kpoho ai hi, keme a riẹ nọ Jihova o ti fiobọhọ kẹ ae.—Olezi 37:5; 55:22.

Dede nọ oria nana ọ ta nọ ma “rehọ iruo” mai kpobi kẹ Ọghẹnẹ, orọnikọ oyena o nwani dhesẹ nọ oware kpobi nọ ohwo ọ gwọlọ ru oye Jihova ọ rẹ jẹrehọ họ. Re Jihova ọ ghale iroro nọ ma be jẹ, iroro na e rẹ rọwokugbe oreva riẹ gbe izi riẹ. (Olezi 127:1; 1 Jọn 5:14) Ahwo nọ a re yoẹme kẹ Ọghẹnẹ hẹ, ọ rẹ ghale ae he. Ebaibol ọ tubẹ ta nọ Ọghẹnẹ “ọ rẹ raha omaa ahwo omuomu.” (Olezi 146:9) Rekọ ahwo nọ a be daoma ru oware nọ Jihova ọ ta evaọ Ebaibol na, Jihova o re fiobọhọ kẹ ae.—Olezi 37:23.

“Omaa ra kpobi u ve ti rugba.” A jọ Ebaibol jọ fa ẹme nana nọ “omaa ra kpobi u ve ti dikihẹ kothi.” Ẹme nọ a fa “dikihẹ kothi” evaọ Ikereakere Hibru nọ a re je se Ọvọ Anwae na, u dhesẹ epanọ a rẹ wọ uwou hotọ nọ a tẹ be bọ uwou. Yọ a rẹ rehọ iẹe ta kpahe epanọ eware nọ Ọghẹnẹ ọ ma i ro dikihẹ ziezi. (Itẹ 3:19; Jerimaya 10:12) Ere ọvona re, Ọghẹnẹ o re fiobọhọ kẹ ahwo nọ a bi ru oware nọ o rẹ were iẹe, eware e rẹ riẹ nya kẹ ae, yọ eva e rẹ were ae.—Olezi 20:4; Itẹ 12:3.

Eme nọ E Wariẹ Itẹ 16:3 Họ

Solomọn ovie na ọye o kere Itẹ uzou avọ 16 na, yọ ọye o kere enwenọ obe Itẹ na soso. Areghẹ nọ Jihova ọ kẹ Solomọn o fiobọhọ kẹe kere eme itẹ buobu nọ e rrọ Ebaibol na.—1 Ivie 4:29, 32; 10:23, 24.

Nọ Solomọn o je mu ẹme riẹ họ evaọ obe Itẹ uzou avọ 16, o jiri Ọghẹnẹ gaga fiki epanọ areghẹ Ọghẹnẹ ọ rro te, ọ tẹ jẹ ta nọ Jihova o mukpahe ahwo nọ a wo omorro. (Itẹ 16:1-5) Kẹsena, ọ tẹ ta kpahe oware jọ nọ u wuzou gaga nọ a fodẹ unuẹse buobu evaọ obe Itẹ. Oye họ: Re ohwo ọ sai wo uvi areghẹ, eware i ve je woma kẹe, o gwọlọ nọ ọ rẹ romakpotọ, Ọghẹnẹ ọ vẹ jẹ kpọe evaọ oware kpobi nọ o bi ru. (Itẹ 16:3, 6-8, 18-23) A jọ eria efa buobu evaọ Ebaibol na ta kpahe ẹme nana re.—Olezi 1:1-3; Aizaya 26:3; Jerimaya 17:7, 8; 1 Jọn 3:22.

Rri ividio ọkpẹkpẹe nana re whọ ruẹ eware nọ e rrọ obe Itẹ.