Itẹ 22:6—“Wuhrẹ Ọmọ Edhere nọ Ọ rẹ Nya”

“Wuhrẹ ọmọ edhere nọ u fo nọ ọ rẹ nya; makọ okenọ ọ kpako no dede o re noi hi.”—Itẹ 22:6, Efafa Akpọ Ọkpokpọ.

“Wuhrẹ ọmọ edhere nọ ọ rẹ nya, nọ ọ jẹ kpako no ọ gbẹ thọriẹ ẹro ho.”—Itẹ 22:6, Ebaibol Ẹri Na.

Otofa Eme nọ E Rrọ Itẹ 22:6

Nọ esẹgbini a te wuhrẹ emọ rai re a you Jihova je koko izi riẹ, a re rẹro nọ onana u ti fiobọhọ kẹ ae evaọ edẹ uzuazọ rai kpobi.

“Wuhrẹ ọmọ edhere nọ u fo nọ ọ rẹ nya.” Oghẹrẹ ọfa nọ a sae rọ fa eme nana họ, “kpọ ọmọ ra họ emamọ edhere.” A jọ eria buobu evaọ obe Itẹ ta kẹ esẹgbini inọ jọ a wuhrẹ emọ rai epanọ a sai ro vuhu oware uwoma gbe uyoma nọ a gbẹ maha na. (Itẹ 19:18; 22:15; 29:15) Rekọ u fo nọ esẹgbini a rẹ riẹ nọ emaha a wo ufuoma nọ a rẹ rọ salọ oware nọ a gwọlọ wọhọ ekpako. Fikiere ukpenọ esẹgbini a rẹ ta oware nọ emọ rai a re ru kẹ ae ẹsikpobi, a sai lele ai jiroro re a fiobọhọ kẹ ae wo areghẹ nọ a sae rọ jẹ emamọ iroro kẹ omobọrai nọ a be rro ze na.—Iziewariẹ 6:6, 7; Ahwo Kọlọsi 3:21.

Ahwo jọ nọ a wuhrẹ kpahe eme Ebaibol ziezi a ta nọ a sae jẹ fa eme nana inọ, “epanọ ọmọ ra ọ rrọ ere who re ro wuhrẹ iẹe,” hayo rọ epanọ ọ be hai rri eware wuhrẹ iẹe. Ahwo jọ a sai roro nọ u kiehọ ziezi re a fa ẹme nana enẹ, rekọ ẹme Hibru nọ a fa “edhere nọ u fo nọ ọ rẹ nya” na, a sae rehọ iẹe dhesẹ emamọ uzuazọ hayo uzuazọ okiẹrẹe nọ ohwo o re yeri. Obe Itẹ o ta kpahe idhere ivẹ nọ ohwo ọ rẹ sae nya. Orọ ọsosuọ, “edhere emamọ ahwo,” hayo “edhere areghẹ,” gbe “emamọ edhere.” (Itẹ 2:20; 4:11; 23:19) Orọ avivẹ họ, “edhere ahwo omuomu,” hayo “idhere ohwo ogheghẹ,” gbe ‘edhere ọnyathọ.’ (Itẹ 4:14; 12:15; 16:29) A rọ edhere nọ u fo nọ ọmọ ọ “rẹ nya” dhesẹ “emamọ edhere,” koyehọ oghẹrẹ uzuazọ nọ u fo nọ ohwo o re yeri nọ a jọ Ebaibol na ta ẹme kpahe.—Olezi 119:105.

“Makọ okenọ ọ kpako no dede o re noi hi.” Nọ ọsẹgboni a te wuhrẹ ọmọ rai kpahe izi Jihova, ẹsibuobu ọmọ na ọ rẹ nya emamọ edhere na evaọ edẹ uzuazọ riẹ kpobi. Rekọ ẹsejọ nọ a tẹ maki wuhrẹ ọmọ ziezi, ọmọ na ọ sai ‘no’ emamọ edhere na hayo siọ izi Jihova ba ekoko. Wọhọ oriruo, nọ ohwo o te bi lele ahwo nọ a bi ru eware iyoma nyusu, ọ sae nyasiọ “idhere nọ i kiete” ba, o ve mu eware iyoma họ eru re. (Itẹ 2:12-16; 1 Ahwo Kọrint 15:33) O make rrọ ere na, nọ esẹgbini a te wuhrẹ emọ rai re a koko izi Jihova, onana u re fiobọhọ kẹ emọ na ru oware nọ u kiehọ evaọ uzuazọ, re eware e sai woma kẹ ae.—Itẹ 2:1, 11.

Eme nọ E Wariẹ Itẹ 22:6 Họ

A jọ obe Itẹ izou 22 ta eme areghẹ nọ i re fiobọhọ kẹ omai jẹ emamọ iroro nọ ma tẹ rẹriẹ ovao ku eware sa-sa evaọ uzuazọ. Eme areghẹ nana i dhesẹ nọ u wuzou gaga re ohwo o wo emamọ odẹ evaọ aro Jihova.a Yọ onana o sae lọhọ nọ ohwo o te wo omaurokpotọ, nọ ọ tẹ be hai ru ọghọ, je kru obọ ga ru iruo. (Itẹ 22:1, 4, 9, 29) Rekọ nọ ohwo ọ tẹ be hai gbabọkẹ izi Ọghẹnẹ je kienyẹ iyogbe, uye u re noi ze te ohwo na.— Itẹ 22:8, 16, 22-27.

Dede nọ a jọ eria buobu evaọ obe Itẹ izou 22 ta kpahe epanọ a rẹ yọrọ ọmọ tere he, a jariẹ ta kpahe oghẹrẹ uzuazọ nọ u fo nọ ohwo o re yeri re ọ sai wo aruoriwo Ọghẹnẹ, o ve je wo evawere. (Itẹ 22:17-19) Nọ esẹgbini a te wuhrẹ emọ rai re a yeri oghẹrẹ uzuazọ yena, onana u re dhesẹ nọ a gwọlọ nọ eware i woma kẹ emọ rai evaọ uzuazọ.—Ahwo Ẹfisọs 6:1-3.

Rri ividio ọkpẹkpẹe nana re whọ ruẹ eware nọ e rrọ obe Itẹ.