Epanọ Who re ro Wuhrẹ Ọmọ Ra

Nọ Jihova ọ to uviuwou họ, o fi emọ họ otọ esẹgbini. (Ahwo Kọlọsi 3:20) Whai esẹgbini, owha-iruo rai o rrọ re wha wuhrẹ emọ rai re a you Jihova jẹ jọ emamọ ahwo odẹnotha. (2 Timoti 1:5; 3:15) Wha rẹ jẹ daoma riẹ oware nọ o rrọ udu emọ rai. Emamọ oriruo nọ who re fihọ otọ kẹ emọ na o roja gaga. Re whọ sae rọ Ẹme Jihova wuhrẹ ọmọ ra, whọ rẹ kake rehọ iẹe wuhrẹ omara tao.—Olezi 40:8.

1 JỌ OHWO NỌ EMỌ E RẸ SAI LELE TA ẸME LỌLỌHỌ

OWARE NỌ EBAIBOL NA Ọ TA: “Jọ ohwo kpobi ọ jọ ọnọ ọ rẹ kaki yo, ọnọ ọ rẹ rọ okpakpa ta ẹme he.” (Jemis 1:19) U fo nọ whọ rẹ jọ ọsẹ hayo oni nọ emọ ra a rẹ sae ta oware kpobi nọ o rrọ ae eva kẹ. Ru ai riẹ nọ oke kpobi nọ a gwọlọ lele owhẹ ta ẹme, whọ te gaviezọ kẹ ae. Who dhuaro ku emọ na ha, re a sai rovie eva kẹ owhẹ. (Jemis 3:18) A te roro nọ who ti do ku ai, a te gbẹ ta eva kẹ owhẹ hẹ. Wo odiri, je ru ai riẹ ẹsikpobi nọ who you rai.—Matiu 3:17; 1 Ahwo Kọrint 8:1.

OWARE NỌ WHỌ RẸ SAI RU:

• Oke kpobi nọ emọ ra a gwọlọ lele owhẹ ta ẹme, gaviezọ kẹ ae

• Hai lele emọ ra ta ẹme n’oke t’oke orọnikọ oke nọ ẹbẹbẹ jọ ọ rrọ otọ ọvo ho

2 DAOMA WO OTORIẸ ẸME NỌ ỌMỌ RA Ọ BE TA

OWARE NỌ EBAIBOL NA Ọ TA: “Ọnọ ọ kezọ ẹme na u re woma kẹ ẹe.” (Itẹ 16:20) Ẹsejọ, o rẹ gwọlọ nọ whọ riẹ oware nọ o rrọ otọ ẹme nọ ọmọ ra ọ be ta re whọ sae riẹ oware nọ o riẹe eva. Ẹsibuobu emọ e rẹ gwọlọ bru okpa họ ẹme hayo fake ta eme jọ. “Ọnọ o ri yo ẹme he ọ vẹ kẹ uyo, yọ ugheghẹ.” (Itẹ 18:13) Whọ rọ okpakpa mu ofu hu.—Itẹ 19:11.

OWARE NỌ WHỌ RẸ SAI RU:

• Gbaemu nọ makọ oghẹrẹ ẹme kpobi nọ ọmọ ra ọ te ta kẹhẹ, who ti bru ẹme dhei unu hayo va ku ei hi

• Daoma kareghẹhọ epanọ whọ jẹ hai ru gbe eware nọ who se gboja evaọ oke nọ whọ jọ ọmaha

3 WHA WO EVA EVO EVAỌ EMỌ EYỌRỌ

OWARE NỌ EBAIBOL NA Ọ TA: “Ọmọ mẹ, yo oghrẹ ọsẹ ra, whọ jẹ uwuhrẹ oni ra fiẹ hẹ.” (Itẹ 1:8) Jihova o mu emọ họ esẹgbini obọ. O gwọlọ nọ who re wuhrẹ emọ ra re a yoẹme jẹ kẹ owhẹ adhẹẹ. (Ahwo Ẹfisọs 6:1-3) Emọ e rẹ riẹ nọ ọsẹgboni a gbẹ rrọ “okugbe ọvo evaọ iroro” ho. (1 Ahwo Kọrint 1:10) O tẹ make rọnọ whai imava na wha rọwo fihọ ẹme jọ họ, wha vro avro evaọ iraro emọ na ha keme u re ru nọ a gbẹ rọ kẹ owhai adhẹẹ hẹ.

OWARE NỌ WHỌ RẸ SAI RU:

• Wha rọwo fihọ oghẹrẹ nọ wha te rọ kẹ emọ rai ọwhọkuo nọ a te ru thọ

• Otẹrọnọ whai imava na wha rọwo fihọ oware jọ họ evaọ ẹyọrọ emọ na, daoma wo otoriẹ oware nọ ọrivẹ ra ọ gbẹ rọ rọwo kugbe owhẹ hẹ

4 WO OMAA

OWARE NỌ EBAIBOL NA Ọ TA: “Wuhrẹ ọmọ edhere nọ ọ rẹ nya.” (Itẹ 22:6) Re a riẹ ọmọ yọrọ, o rrọ okolo iruo ho. O gwọlọ nọ whọ rẹ ma omaa oghẹrẹ nọ whọ rẹ rọ yọrọ ọmọ ra, gbe oghẹrẹ nọ whọ te rọ kẹe ọwhọkuo. (Olezi 127:4; Itẹ 29:17) Re a kẹ ọmọ ọkpọvio, orọnikọ ukpe ọvo a re kpei hi, rekọ who re fiobọhọ kẹe riẹ oware nọ whọ rọ ta nọ o ru oware jọ. (Itẹ 28:7) U te no ere no, whọ rẹ rọ Ẹme Jihova wuhrẹ emọ ra re a wo otoriẹ izi Ọghẹnẹ. (Olezi 1:2) Onana u ti fiobọhọ kẹ ae riẹ oware nọ u woma gbe onọ u yoma.—Ahwo Hibru 5:14.

OWARE NỌ WHỌ RẸ SAI RU:

• Fiobọhọ kẹ emọ ra riẹ nọ Ọghẹnẹ ọ ginẹ rrọ, gbe nọ a rẹ sai fievahọ iẹe

• Dhesẹ epanọ a sai ro vuhu jẹ whaha ekpehre iruemu gbe usu, wọhọ usu nọ a rẹ jọ Itanẹte mu. Wuhrẹ ae epanọ a sae rọ whaha ahwo nọ e rẹ gwọlọ gba emaha du