A be Rehọ Ai Fiobọhọ kẹ Inievo Mai Gu Ẹdhọ re A Sai Wo Ufuoma Egagọ

Evaọ usu ima ahwo buobu gbidi gbidi nọ a be rria unuakpọ Latin America, ima ahwo buobu nọ e rrọ emotọ a wo ọvuọ ẹvẹrẹ rai gbe uruemu ẹwho rai. Isẹri Jihova buobu yọ emotọ evaọ eria nana, yọ uruemu ẹwho rai o rẹ were ae gaga. Re a sai fiobọhọ kẹ ahwo wuhrẹ kpahe Ọghẹnẹ, a fa ebe Isẹri fihọ evẹrẹ nọ i bu vi udhozeza gbe ikpe (130) no, evaọ usu evẹrẹ nọ emotọ a rẹ ta evaọ Latin America.a Ghele na, fikinọ inievo mai nana a salọ nọ a rẹ gọ Jihova, yọ a rọwo nọ a re wobọ evaọ iruemu ẹwho nọ e wọso izi Ọghẹnẹ hẹ, a be rẹriẹ ovao dhe ọwọsuọ. Ẹvẹ a be rọ rehọ okẹ unevaze ra fiobọhọ kẹ ae?

A Fiobọhọ Kẹ Ae Zihe Ziọ Orẹwho Rai

Evaọ orẹwho Mexico, inievo mai nọ e be rria ẹwho Huichol nọ o rrọ ugbehru jọ evaọ ubrotọ Jalisco, a rọwo nọ a re wobọ evaọ iruẹru egagọ nọ e wọso izi Ọghẹnẹ hẹ.b Oware nana o lẹliẹ eva dha ahwo jọ evaọ ẹwho na. Fikiere evaọ ẹdẹ avọ ene Akpegbivẹ 2017, utu ahwo nọ a re ru ozighi a tẹ wọ ohọre bru Isẹri Jihova jọ nọ i kokohọ gbe amọfa nọ a jọ kugbe ai. A te le ae no ẹwho, raha eware rai, je seha kẹ ae nọ a te zihe ziọ ẹwho na, a ti kpe ai no.

Isẹri Jihova nọ e rrọ ewho nọ e kẹle e rai a te fi ae họ uwou jẹ rẹrote ae. Rekọ eme o gwọlọ nọ a re ru re a sai zihe kpohọ ẹwho rai? Oniọvo jọ nọ a re se Agustín ọ ta nọ, “Ugho nọ o jọ omai obọ o re te omai rehọ elọya ha, yọ ma wo ohwo ọvo nọ ma rẹ nọ kpahe eware ẹdhọ họ.”

Fikinọ oware nọ o via na o kpomahọ ufuoma egagọ inievo mai, uwou ogha Isẹri Jihova nọ o rrọ Central America o te ru oware jọ kpahe iẹe vẹrẹ vẹrẹ. Orọ ọsosuọ, a kake ta kẹ ahwo egọmeti nọ e rrọ ẹwho na re a kiẹ otọ ẹme na ziezi. Kẹsena Ogbẹgwae Utu Ẹruọsa ọrọ Utu Ẹruorote Iruẹru Isẹri Jihova o tẹ kẹ ae udu re ẹko-iruo eriẹ-izi evaọ oria nọ u wuzou iruẹru Isẹri Jihova o fiobọhọ kẹ ae, re a jẹ rọ odẹ inievo mai nọ e rrọ Huichol ro tu ahwo na ẹdhọ kpohọ okọto. Uwhremu na, a te tu ẹdhọ na fihọ okọto nọ o mai kpehru evaọ orẹwho Mexico nọ a re se Supreme Court of Justice of the Nation.

Evaọ okenọ a je gu ẹdhọ na, utu elọya mai nọ i no erẹwho sa-sa ze a ta nọ, wọhọ epanọ u wuzou re amọfa a rọ adhẹẹ kẹ iruemu ẹwho ahwo nọ a rrọ emotọ na, ere ọvona u fo nọ ahwo ẹwho na a rẹ rọ adhẹẹ kẹ ohwo kpobi nọ ọ rrọ ẹwho na, jẹ daoma ruẹ nọ ohwo kpobi o wo ufuoma. Ohwo-akpọ kpobi o wo udu nọ ọ rẹ rọ salọ eware jọ kẹ omariẹ ghelọ oria nọ ọ be rria kẹhẹ.

Evaọ amara Ahrẹ 8, 2020, okọto nọ o mai kpehru evaọ orẹwho na o te bruoziẹ kẹ Isẹri Jihova. Okọto na o ta nọ a kuvẹ re ahwo kpobi nọ a le no ẹwho na a zihe ze. Enẹ Agustín nọ ma fodẹ evaọ obehru na ọ ta kpahe oware nọ a ru kẹ ae na, inọ: “Oware nọ inievo na a ru kẹ omai na o were omai gaga, yọ o da omai ẹro fia. O gbẹ rrọ obufihọ inievo na ha, ma hae te sai ru oware ovo ho.”

“O Ru Eware Nana Kpobi kẹ Ahwo nọ A Bu Hu”

Inievo mai nọ e rrọ ẹwho San Juan de Ilumán evaọ orẹwho Ecuador a rẹriẹ ovao dhe oghẹrẹ ẹbẹbẹ ọvona. Ẹwho nana ọ rrọ ukiekpotọ nọ a re se Otavalo, yọ emotọ buobu a be rria ẹwho na. Evaọ ukpe 2014, nọ a wo ebe ebabọ te obọ no, a te mu Ọgwa Uvie rai họ ẹbọ. Rekọ ozerẹ ichọche jọ o te koko ahwo nọ a bu vi udhusoi họ kpohọ oria nọ a be jọ bọ Ọgwa Uvie na, a tẹ rrọ ogaga whaha iruo ebabọ na. Ahwo ẹwho na a tẹ vẹvẹ Isẹri Jihova unu nọ, a gbe du kuomagbe ru iwuhrẹ hẹ.

Ẹko-iruo eriẹ-izi evaọ uwou ogha Ecuador gbe evaọ oria nọ u wuzou iruẹru Isẹri Jihova, a te kuomagbe re a sai fiobọhọ kẹ inievo na, keme oware nọ ahwo ẹwho na a ru na o wọso ufuoma egagọ rai. Inievo mai na a tẹ rọ ẹme na kpohọ okọto. Onana o lẹliẹ ahwo ẹwho na siọ inievo mai ba ekpokpo. A tẹ jẹ kẹ ae uvẹ re a kuomagbe ru iwuhrẹ, jẹ bọ Ọgwa Uvie rai re. Rekọ re ẹbẹbẹ nana ọ gbẹ romavia evaọ obaro ho, utu elọya mai na o tẹ ta kẹ ekọto nọ i kpehru re a kuyo onọ nana nọ u wuzou gaga na: Kọ o gbahọ nọ emotọ ẹwho a rẹ rọ adhẹẹ kẹ udu nọ ohwo o wo nọ ọ rẹ rọ salọ oware nọ ọ gwọlọ ru?

Evaọ amara Ahrẹ 16, 2020, okọto nọ o mai kpehru evaọ orẹwho na nọ a re se Constitutional Court of Ecuador, o te mu ẹdhọ na họ egu. Inievo-emezae mai nọ e rrọ elọya evaọ orẹwho Ecuador, ae a dikihẹ kẹ ukoko na evaọ okenọ a je gu ẹdhọ na. Ofariẹ, inievo-emezae ene mai jọ nọ e riẹ kpahe ẹdhọ ziezi nọ e rrọ erẹwho efa, a ta ẹme evaọ oke nọ a je gu ẹdhọ na. Yọ fiki awhaha nọ a fihọ fiki ẹyao COVID-19 na, ẹkwoma ividio inievo nana a ro thuru no erẹwho sa-sa ze kugbe ahwo okọto na. Onana họ orọ ọsosuọ nọ okọto o rọ kuvẹ re elọya nọ i dikihẹ kẹ Isẹri Jihova evaọ akpọ na soso, a rọ edhere otiọna ro gu ẹdhọ.c Utu elọya nana a fodẹ izi erẹwho efa rọ kẹ imuẹro inọ, u fo ho re a whaha emotọ ẹwho eware nọ a wo udu rai, fikinọ a be rria ẹwho nọ a jẹ rrọ emotọ.

Inievo mai nọ e rrọ ukiekpotọ Otavalo na a be rọ ọwhọ hẹrẹ okenọ okọto okpehru na u ti bruoziẹ ẹdhọ na. Rekọ ri bọo oke yena, obọ nọ a fihọ kẹ ae no na o da rai ẹro gaga. Oniọvo jọ nọ a re se César nọ ọ rrọ ọkpako evaọ ukoko Ilumán Quichua, ọ ta nọ: “Jihova ọvo, ọ rẹ sae rọ ukoko riẹ ru eware nana kpobi kẹ ahwo nọ a bu hu.”

Elọya nọ i dikihẹ kẹ inievo na evaọ ẹdhọ na aikpobi Isẹri Jihova, yọ eva e were rai gaga inọ a sai fiobọhọ evaọ ẹdhọ na dede nọ a mi ugho ho. Ghele na, re a tu ẹdhọ kpohọ okọto, ruẹrẹ oma kpahe kẹ ẹdhọ na, je gu ẹdhọ na, o rẹ rehọ oke gbe ugho. Elọya sa-sa mai gbe inievo-emezae mai efa a raha euwa nọ i bu vi egba esa gbe udhone (380) nọ a jẹ ruẹrẹ oma kpahe kẹ ẹdhọ na, yọ a rehọ euwa egba ivẹ gbe udhuvẹ (240) rọ fa ebe nọ a je ro gu ẹdhọ na. Enwenọ elọya udhuvẹ nọ e rrọ eria sa-sa evaọ akpọ na a raha euwa buobu kẹ ẹdhọ na. Rekọ ẹvẹ ma ro wo ugho nọ ma ro gu ẹdhọ inievo mai nana re a sai wo ufuoma egagọ? Ma sai ru onana ẹkwoma idhere sa-sa nọ who bi ro ru unevaze evaọ donate.jw.org. Ma yere owhẹ rọkẹ unevaze ra.