Edisoi-Oka, Ẹdẹ avọ 26 Azie
Evaọ irioke frifri, [Jesu] ọ tẹ ruọ otafe nya kpohọ oria nọ u siomano, o te muhọ ẹlẹ evaọ etẹe.—Mak 1:35.
Jesu ọ jẹ hae lẹ se Jihova ẹsikpobi, yọ ọ gwọlọ nọ ilele riẹ a rẹ rọ aro kele iei. Jesu ọ jẹ hai wo uvẹ tere he, yọ ahwo a jẹ hai no akotọ riẹ hẹ. Ghele na, ọ jẹ hai ru uvẹ fihọ nọ ọ rẹ rọ lẹ. (Mak 6:31, 45, 46) Ọ rẹ kpama ohiohiẹ gaga, o ve kpohọ oria nọ u siomano nyae lẹ. Ebaibol ọ ta kpahe oke jọ nọ Jesu ọ rọ lẹ asohẹrioke re Ọghẹnẹ o fiobọhọ kẹe, ọ vẹ sai ru oware jọ nọ u wuzou gaga. (Luk 6:12, 13) Yọ evaọ aso ẹdẹ nọ a ro mu Jesu taure a te ti kpei, ọ jẹ lẹ gaga. O ru ere keme edawọ nọ i bi ti tei e ga vi efa kpobi nọ i te rie no, yọ o roja nọ o re kru ẹrọwọ riẹ re ọ sai ru oware nọ Ọghẹnẹ o vi rie ze ti ru. (Mat. 26:39, 42, 44) Ẹvẹ ma sae rọ rehọ aro kele Jesu? Ma rẹ daoma ru uvẹ fihọ nọ ma rẹ hae rọ lẹ, o tẹ make rọnọ eware e vọ omai obọ nọ ma bi ru. O sae jọ nọ ohiohiẹ gaga ma fihọ nọ ma rẹ rọ lẹ, hayo uzou obọ owọwọ. Ma tẹ be hae lẹ, yọ ma be vuẹ Jihova nọ olẹ o were omai gaga. w23.05 3 ¶4-5
Ẹdẹ-Ọmaha, Ẹdẹ avọ 27 Azie
Ọghẹnẹ ọ rehọ ẹkwoma ẹzi ọfuafo riẹ nọ ọ kẹ omai rọ uyoyou riẹ vọ udu mai no.—Rom 5:5.
Pọl ukọ na ọ jọ oria ikere inẹnẹ na ta nọ Ọghẹnẹ ọ “rọ uyoyou riẹ vọ udu mai.” Obe jọ nọ o rẹ fa otọ eme Ebaibol o ta ẹme jọ kpahe ẹme yena. O ta nọ o wọhọ ẹsenọ uyoyou na “u kporo ẹkẹre bru omai ze.” Whọ ruẹ emamọ ẹme nọ Ebaibol o ro dhesẹ uyoyou nọ Jihova o wo kẹ enọ a rọ ẹzi wholo na? Ileleikristi nọ a rọ ẹzi wholo na a riẹ nọ Ọghẹnẹ “o you” rai. (Jud 1) Oyejabọ nọ Jọn ukọ na nọ ọ jọ usu enọ a rọ ẹzi wholo na o ro kere nọ: “Rri epanọ uyoyou nọ Ọsẹ na o dhesẹ kẹ omai o rro te, nọ a bi ro se omai emọ Ọghẹnẹ!” (1 Jọn 3:1) Kọ Ileleikristi nọ a rọ ẹzi wholo na ọvo Jihova o you? Ijo. O you omai kpobi na. Eme o mae rro nọ Jihova o ru no ro dhesẹ nọ o you omai? Oye họ, Ọmọ riẹ nọ o vi ze ti whu kẹ omai rọ ta omai no igbo. Uyoyou o rẹ gbẹ rro viere he!—Jọn 3:16; Rom 5:8. w24.01 28 ¶9-10
Ẹdoka, Ẹdẹ avọ 28 Azie
Ewegrẹ mẹ a ti kuomarẹriẹ dhẹ zihe evaọ ẹdẹ nọ me bo kẹ obufihọ. Me wo evaifihọ nana, inọ: Ọghẹnẹ ọ rrọ abọ mẹ.—Ol. 56:9.
Oria ikere okpẹdẹ inẹnẹ na u dhesẹ nọ, dede nọ a jẹ gwọlọ Devidi kpe, Devidi o je roro kpahe oware nọ Jihova o ti ru kẹe. O tẹ so ẹe ze nọ ozọ o gbẹ dae oma fia ha. Ọ riẹ nọ Jihova o ti ru nọ ẹbẹbẹ riẹ na o ti ro kuhọ ẹdẹjọ. Yọ o ti ru ei evaọ oke nọ o mai kiehọ. Ẹvẹ ọ rọ riẹ? Jihova ọ ta nọ ọye ọ te jọ ovie Izrẹl nọ Sọl o te noi no. (1 Sam. 16:1, 13) Devidi ọ riẹ nọ Jihova ọ tẹ ta ẹme, ọ rẹ seba ẹvia ha. Eme Jihova ọ ya eyaa nọ o ti ru kẹ owhẹ? Ma riẹ nọ orọnikọ o ti ru nọ ẹbẹbẹ ọvo o gbe ro te omai ha ha. Rekọ ẹbẹbẹ kpobi nọ ọ kẹ uvẹ inọ o te owhẹ, o ti kuhọ evaọ obọ akpọ ọkpokpọ na. (Aiz. 25:7-9) Jihova Ọghẹnẹ nọ ọ ma omai na o wo ẹgba nọ ọ rẹ rọ kpare ahwo nọ a whu no ze. O te je wo ẹgba nọ o re ro siwi ẹyao kpobi je kpe ahwo nọ a be wọso omai kpobi no.—1 Jọn 4:4. w24.01 6 ¶12-13