Kọ Ọghẹnẹ Ọ Be Daezọ Mai?

KỌ AWAỌRUỌ ọgaga fiki ebẹbẹ uviuwou, ẹyao, iruo, hayo ewha-iruo egbẹgbẹdẹ efa ọ n’owhẹ yaotọ? O rrọ ere kẹ ahwo buobu. Kọ ono ẹdhoguo-okienyẹ, ethube, gbe ozighi i bi kpomahọ nẹnẹ hẹ? Evaọ uzẹme, o nwane wọhọ epanọ Ebaibol e ta: “Enama na soso i bi dimẹ eva ọyawọ usuovo na rifi enẹna.” (Ahwo Rom 8:22) Agbẹta nọ ahwo buobu a be rọ nọ nnọ: ‘Kọ Ọghẹnẹ ọ be daezọ? Kọ ọ te dhogbo bru omai ze?’

Solomọn ovie owareghẹ na ọ ta kẹ Ọghẹnẹ evaọ olẹ nọ: “Whẹ ọvo, ọ riẹ iroro emọ ahwo.” Solomọn o wo evaifihọ inọ orọnikọ Ọghẹnẹ ọ riẹ omai ọvo ho rekọ ọ be jẹ daezọ mai wọhọ omomọvo. Ọ yare Ọghẹnẹ re o “yo no obọ odhiwu ze” jẹ k’uyo kẹ elẹ ọnọ ọ be dhozọ Ọghẹnẹ kpobi, ọnọ ọ be ta “uye riẹ jegbe uweri riẹ” kẹ Ọghẹnẹ.—2 Iruẹru-Ivie 6:29, 30.

Jihova Ọghẹnẹ ọ gbẹ be daezọ mai nẹnẹ, o te je zizie omai re ma bo sei evaọ olẹ. (Olezi 50:15) Ọ yeyaa inọ ọ te k’uyo uvi elẹ nọ e rọwo kugbe oreva riẹ. (Olezi 55:16, 22; Luk 11:5-13; 2 Ahwo Kọrint 4:7) Ẹhẹ, Jihova ọ rẹ gaviezọ kẹ “eghẹrẹ elẹ kpobi te oghẹrẹ ayare kpobi nọ ohwo jọ o ru, hayo ahwo [riẹ] kpobi.” Fikiere, ma te fi eva họ Ọghẹnẹ, lẹ kẹ obufihọ riẹ, je si kẹle iẹe, ma te ruẹ ẹruọsa oyoyou gbe uketha riẹ. (Itẹ 3:5, 6) Jemis ọnọ o kere Ebaibol na ọ ta nọ: “Bigba Ọghẹnẹ o re ti bigba owhẹ.”—Jemis 4:8.