Re a wuhrẹ Ebaibol na o rẹ kẹ erere gaga. Rekọ o rẹ sae jọ bẹbẹ ẹsejọ. O sae tubẹ jọ owhẹ oma ẹsejọ nọ whọ siọ ewuhrẹ na ba. Fikieme u ro wuzou re whọ gbẹ daoma wuhrẹ Ebaibol na? Eme ọ rẹ sai fiobọhọ kẹ owhẹ ru ere ghelọ ebẹbẹ?

1. Fikieme u ro woma re a wuhrẹ Ebaibol na?

“Ẹme Ọghẹnẹ ọ rrọ uzuazọ, o te je wo ẹgba.” (Ahwo Hibru 4:12) Ebaibol na o woma gaga keme u dhesẹ iroro Ọghẹnẹ via gbe oghẹrẹ nọ ọ rehọ owhẹ. U re fiobọhọ kẹ owhẹ wo eriariẹ, uvi areghẹ gbe ẹruore. Rekọ maero na, Ebaibol na o re fiobọhọ kẹ owhẹ jọ ogbẹnyusu Jihova. Who te bi wuhrẹ Ebaibol na, o rẹ sai ru uzuazọ ra woma nọ whọ tẹ kẹe uvẹ na.

2. Fikieme u ro wuzou re whọ riẹ epanọ Ebaibol na o woma te?

Uzẹme sa-sa nọ e rrọ Ebaibol na e wọhọ eware aghae. Oyejabọ nọ Ebaibol ọ rọ ta kẹ omai nọ “dẹ uzẹme, whọ zẹe vievie he.” (Itẹ 23:23) Nọ ma tẹ be kareghẹhọ epanọ uzẹme Ebaibol na o woma te, ma te daoma gbe wuhrẹ makọ evaọ okenọ oware jọ o tẹ be gwọlọ whaha omai.​—Se Itẹ 2:4, 5.

3. Ẹvẹ Jihova ọ sai ro fiobọhọ kẹ owhẹ gbe wuhrẹ?

Jihova nọ ọ rrọ Ọmemama erumeru na, gbe ogbẹnyusu ra na, ọ gwọlọ fiobọhọ kẹ owhẹ wuhrẹ kpahe ọyomariẹ. Ọ rẹ sae kẹ owhẹ “isiuru na gbe ogaga nọ [who] re ro ru ere.” (Se Ahwo Filipai 2:13.) Fikiere nọ whọ tẹ gwọlọ obufihọ re ewuhrẹ na ọ ruọ owhẹ oma ziezi, hayo re who fi eware nọ who bi wuhrẹ na họ iruo, ọ rẹ sai fiobọhọ kẹ owhẹ. Ọ sae jẹ kẹ owhẹ ẹgba nọ whọ rẹ rọ dadamu kẹ ọwọsuọ. Thakpe lẹ sei ẹsikpobi re o fiobọhọ kẹ owhẹ gbe wuhrẹ.​—1 Ahwo Tẹsalonika 5:17.

GBE WUHRẸ EWARE EFA

4. Se uwuhrẹ Ebaibol ra gboja

Ẹsejọ eware e rẹ sae vọ omai abọ te epanọ o rẹ rọ wọhọ nọ ma wo oke nọ ma re ro wuhrẹ Ebaibol na ha. Eme ọ rẹ sai fiobọhọ? Se Ahwo Filipai 1:10, kẹsena wha vẹ ta ẹme kpahe enọ nana:

• Eware jọ vẹ who roro nọ eye họ “eware nọ e mae roja” evaọ uzuazọ?

• Eme whọ rẹ sai ru re who se uwuhrẹ Ebaibol ra gboja?

1. Whọ tẹ whẹ ẹkpẹ fihọ ubokiti, whọ jẹ be daoma fi itho họ eva riẹ, itho na e rẹ gbae he

2. Rekọ whọ tẹ kaki fi itho na họ iẹe, who je ku ẹkpẹ na fihọ iẹe, ẹkpẹ na buobu ọ rẹ ruẹe eva. Epọvo na re, whọ tẹ rọ “eware nọ e mae roja” karo evaọ uzuazọ ra, whọ te sai ru ai je tube ru eware efa jọ kugbe dede

Ebaibol na nọ ma re wuhrẹ, u re ru omai riẹ Ọghẹnẹ jẹ gọe ziezi. Se Matiu 5:3, kẹsena wha vẹ ta ẹme kpahe onọ nana:

• Irere vẹ ma re wo nọ ma te se Ebaibol nọ ma re wuhrẹ gboja?

5. Ruabọhọ uwuhrẹ na ghelọ ọwọsuọ

IVIDIO: Oghale U No Rie Ze Fikinọ Ọ Seba Ha (5:22)

6. Rẹroso Jihova re o fiobọhọ kẹ owhẹ

IVIDIO: Jihova O re Fiobọhọ kẹ Omai Nwene (3:56)

EME WHO WUHRẸ NO?

O make rọnọ ẹsikpobi o rẹ lọhọ họ, Ebaibol na nọ who re wuhrẹ o sai ru owhẹ reawere uzuazọ bẹdẹ bẹdẹ. Rẹroso Jihova ẹsikpobi, ọ te ghale owhẹ.

Ọkiẹkpemu

• Fikieme iwuhrẹ Ebaibol na e rọ rrọ ghaghae kẹ owhẹ?

• Ẹvẹ whọ sai ro “vuhu eware nọ e mae roja”?

• Fikieme whọ rẹ rọ lẹ se Jihova re o fiobọhọ kẹ owhẹ ruabọhọ uwuhrẹ Ebaibol ra?

KIẸ KPAHE EFA

Se kpahe eware ene jọ nọ i fiobọhọ kẹ ahwo buobu rehọ oke rai ruiruo avọ areghẹ no.

“Epanọ Whọ Sae rọ Rehọ Oke Ra Ruiruo avọ Areghẹ” (Awake!, Ava 2014)

Rri oghẹrẹ nọ Jihova o ro fiobọhọ kẹ aye jọ nọ ọzae riẹ ọ jẹ wọso evaọ okenọ o je wuhrẹ Ebaibol na.

Jihova Ọ rẹ Kẹ Omai Ẹgba Yerikugbe Ebẹbẹ Mai (5:05)

Rri epanọ ithihakọ aye ọzae nana u ro fiobọhọ kẹe kurẹriẹ.

Mẹ Kiẹ Uzẹme na Riwi (6:30)

Ẹsejọ ahwo a rẹ ta nọ Isẹri Jihova a re fi ohẹriẹ họ iviuwou. Kọ uzẹme o rrọ?

“Kọ Isẹri Jihova A rẹ Wha Ohẹriẹ Fihọ Iviuwou Manikọ A rẹ Bọ Ae Ga?” (Uzoẹme nọ o rrọ itanẹte)

Mai kpobi ma rẹ jiroro. Iroro buobu nọ ma rẹ jẹ na e sai kpomahọ omai gbe usu mai kugbe Jihova wowoma hayo yoyoma. Wọhọ oriruo, ma rẹ jiroro oria nọ ma rẹ rria, okọ hayo iruo nọ ma re ru re ma kuọ omamai, gbe sọ ma rẹ rọo hayo ma rẹ rọo ho. Ma tẹ jẹ emamọ iroro, ma sai wo evawere je ru eva were Jihova.

1. Ẹvẹ Ebaibol na ọ sai ro fiobọhọ kẹ owhẹ jẹ emamọ iroro?

Taure whọ tẹ te jiroro, lẹ se Jihova re o fiobọhọ kẹ owhẹ, whọ vẹ jẹ romatotọ se Ebaibol na re whọ riẹ oware nọ Jihova ọ ta kpahe ẹme na. (Se Itẹ 2:3-6.) U wo eware jọ nọ Jihova ọ jọ kẹ uzi oware nọ a re ru vevẹ. Whọ tẹ salọ nọ who re koko uzi yena, kiyọ emamọ iroro whọ jẹ na.

Kọ otẹrọnọ Ebaibol na ọ ta oware ọvo gbiae kpahe ẹme na ha? Jihova ọ rẹ kpọ owhẹ ghele fihọ “edhere nọ u fo nọ whọ rẹ nya.” (Aizaya 48:17) Evaọ oghẹrẹ vẹ? Ehrẹ buobu e rrọ Ebaibol na nọ e sae kpọ owhẹ. Ehrẹ nana i re dhesẹ oghẹrẹ nọ Ọghẹnẹ o rri eware sa-sa. Evaọ ẹsibuobu, nọ ma te se iku jọ nọ e rrọ Ebaibol na, ma rẹ riẹ oghẹrẹ nọ Ọghẹnẹ o rri oware jọ. Nọ ma tẹ riẹ oghẹrẹ nọ Jihova o rri oware jọ, ma sae jiroro nọ e rẹ were iẹe.

2. Eme u fo nọ who re roro kpahe taure whọ tẹ te jiroro jọ?

Ebaibol na ọ ta nọ: “Ọnọ o wo orimuo o re rri otọ mu re ọ tẹ te jowọ.” (Itẹ 14:15) Onana u dhesẹ nọ taure ma tẹ te jiroro, ma rẹ romatotọ roro ziezi. Whọ rẹ hae nọ omara nọ: ‘Didi ohrẹ Ebaibol na ọ kẹ kpahe ẹme nana? Ovẹ o te lẹliẹ udu tẹ omẹ otọ? Ẹvẹ iroro nọ mẹ jẹ i ti kpomahọ amọfa? Maero na, kọ u ti ru eva were Jihova?’—Iziewariẹ 32:29.

Jihova o wo udu nọ ọ rẹ rọ ta oware nọ u woma gbe onọ u yoma kẹ omai. Ma tẹ riẹ izi gbe ehrẹ nọ ọ kẹ, ma jẹ gbaemu nọ ma re lele ai, ma re wo emamọ obruoziẹ-iroro. Obruoziẹ-iroro na yọ oware nọ o rẹ jọ obeva mai vuẹ omai sọ oware u woma hayo u yoma. (Ahwo Rom 2:14, 15) Ma te wuhrẹ obruoziẹ-iroro mai ziezi, u re fiobọhọ kẹ omai jẹ emamọ iroro.

GBE WUHRẸ EWARE EFA

3. Jọ Ebaibol na ọ kpọ owhẹ

IVIDIO: Jọ Ehri-izi Ebaibol E Kpọ Owhẹ (5:54)

• Obọdẹ okẹ vẹ Jihova ọ kẹ omai?

• Fikieme Jihova ọ rọ kẹ omai uvẹ nọ ma sae rọ jiroro kẹ omamai?

• Eme Jihova ọ kẹ omai nọ o rẹ sai fiobọhọ kẹ omai jẹ emamọ iroro?

Re whọ ruẹ oriruo ohrẹ jọ nọ Ebaibol na ọ kẹ, se Ahwo Ẹfisọs 5:15, 16. Kẹsena wha vẹ ta ẹme kpahe epanọ whọ sae rọ “rehọ oke [ra] ruiruo evaọ edhere nọ ọ mai woma” re . . .

• who se Ebaibol na kẹse kẹse.

• whọ jọ emamọ ọzae, aye, ọsẹ, oni, hayo ọmọ.

• whọ hai kpohọ iwuhrẹ ukoko.

4. Wuhrẹ obruoziẹ-iroro ra re u fiobọhọ kẹ owhẹ jẹ emamọ iroro

IVIDIO: “Sẹro Emamọ Obruoziẹ-Iroro” (5:13)

• Evaọ ividio na, eme oniọvo-ọmọtẹ na o ru re o wuhrẹ obruoziẹ-iroro riẹ jẹ jiroro nọ e rẹ were Jihova?

Fikieme u gbe ro fo ho re ma ta kẹ amọfa nọ a jiroro nọ u fo nọ mai ọvo ma rẹ jẹ? Se Ahwo Hibru 5:14, kẹsena wha vẹ ta ẹme kpahe enọ nana:

• O tẹ make wọhọ nọ o mae lọhọ re ma ta kẹ amọfa re a jiroro kẹ omai, eme u fo nọ ma re vuhumu kẹ omamai?

• Eme ma wo nọ o sai fiobọhọ kẹ owhẹ wuhrẹ obruoziẹ-iroro ra, whọ vẹ jẹ emamọ iroro?

5. Rọ adhẹẹ kẹ obruoziẹ-iroro amọfa

Ahwo a sai wo ọvuọ iroro riẹ evaọ oware jọ. Ẹvẹ ma sai ro dhesẹ nọ ma be rọ adhẹẹ kẹ obruoziẹ-iroro amọfa? Joma ta kpahe iriruo ivẹ jọ:

Oriruo 1: U wo oniọvo-ọmọtẹ jọ nọ isiaro gbe eware nọ a re ro wholo ovao e rẹ were gaga, rekọ ọ tẹ kwa kpohọ ukoko jọ nọ eware nana e rẹ jọ were inievo-emetẹ na buobu hu.

Se Ahwo Rom 15:1 gbe 1 Ahwo Kọrint 10:23, 24, kẹsena wha vẹ ta ẹme kpahe enọ nana:

• Wọhọ epanọ eria Ebaibol nana e ta na, didi iroro oniọvo-ọmọtẹ na ọ sae jẹ? Kọ eme who ti ru otẹrọnọ whọ rrọ kugbe ohwo nọ obruoziẹ-iroro riẹ o kuvẹ nọ o ru oware jọ họ?

Oriruo avọ 2: U wo oniọvo-ọmọzae jọ nọ ọ riẹ nọ re ohwo ọ da umutho udi ogaga o thọ họ, rekọ ọ jiroro nọ ọ rẹ da vievie he. A te zizie iei kpohọ amarozaha jọ nọ inievo na a be jọ da idi egaga.

Se Ọtausiuwoma Na 7:16 gbe Ahwo Rom 14:1, 10, kẹsena wha vẹ ta ẹme kpahe enọ nana:

• Wọhọ epanọ eria Ebaibol nana e ta na, didi iroro oniọvo-ọmọzae na ọ sae jẹ? Kọ eme who ti ru otẹrọnọ whọ ruẹ omọfa nọ o bi ru oware nọ obruoziẹ-iroro ra o rọwo kẹ owhẹ hẹ?

Eme o re fiobọhọ kẹ owhẹ jẹ emamọ iroro?

1. Lẹ se Jihova re o fiobọhọ kẹ owhẹ jiroro oware nọ who re ru.—Jemis 1:5.

2. Ru ekiakiẹ evaọ Ebaibol na gbe ebe ukoko na re whọ gwọlọ ehrẹ nọ e sai fiobọhọ kẹ owhẹ. Whọ sae jẹ nọ Ileleikristi nọ i kri no nọ e be gọ Ọghẹnẹ ziezi.

3. Roro kpahe oghẹrẹ nọ iroro nọ whọ jẹ i ti kpomahọ owhẹ omara gbe amọfa.

EME WHO WUHRẸ NO?

Ma rẹ jẹ emamọ iroro nọ ma tẹ riẹ oghẹrẹ nọ Jihova o rri oware jọ, gbe sọ oware nọ ma gwọlọ ru u ti fiobọhọ kẹ amọfa hayo o te wha uye se ae.

Ọkiẹkpemu

• Ẹvẹ whọ sae rọ jiroro nọ e rẹ were Jihova?

• Ẹvẹ whọ sai ro wuhrẹ obruoziẹ-iroro ra?

• Eme whọ sai ru ro dhesẹ nọ whọ be rọ adhẹẹ kẹ obruoziẹ-iroro amọfa?

KIẸ KPAHE EFA

Ẹvẹ whọ sae rọ jiroro nọ i re ru owhẹ wo emamọ usu kugbe Ọghẹnẹ?

“Jẹ Iroro Nọ E Rẹ Wha Orro Se Ọghẹnẹ” (Uwou-Eroro Na, Ane 15, 2011)

Gbe wuhrẹ kpahe epanọ Jihova ọ rẹ rọ kẹ omai ohrẹ.

Jihova Ọ be Kpọ Ahwo Riẹ (9:50)

Rri eware jọ nọ i fiobọhọ kẹ ọzae jọ sae jiroro jọ nọ e jọ bẹbẹ.

Jihova Ọvo Ọrẹ Kẹ Oware Nọ Omai Woma (5:46)

Gbe wuhrẹ kpahe epanọ whọ sai ro ru Jihova eva were makọ evaọ oware nọ ọ jọ kẹ uzi ọvo ho.

“Kọ Ẹsikpobi O Gwọlọ nọ Ọghẹnẹ O re Jie Uzi Taure Ma te Ru Oware nọ O rẹ Were iẹe?” (Uwou-Eroro Na, Akpegbivẹ 1, 2003)