“Me reti siwi ae, me ve ti dhesẹ ubu udhedhẹ gbe uzẹme kẹ ae.”—JERIMAYA 33:6, NW.

3. Evaọ orugba eme Jihova ẹkwoma Jerimaya, eviavia ikuigbe vẹ i wuhrẹ Izrẹl uwuhrẹ avivẹ nọ o roja kpahe udhedhẹ?

³ Taure Jerusalem o te kie, dede, Jihova o rovie no nọ ọye ọ rẹ te rọ uvi udhedhẹ se Izrẹl, orọnikọ Ijipti hi. Ọ yeyaa ẹkwoma Jerimaya nọ: “Me reti siwi ae, me ve ti dhesẹ ubu udhedhẹ gbe uzẹme kẹ ae. Me reti zihe eghale Juda gbe erọ Izrẹl kẹ ae, mẹ vẹte wariẹ ae bọ wọhọ epanọ e jọ.” (Jerimaya 33:6, 7, NW ) Eyaa Jihova i muhọ erugba evaọ 539 B.C.E. okenọ a fi Babilọn kparobọ a jẹ rọ uvẹ kẹ emọ Izrẹl nọ e jọ igbo re a kpo. (2 Iruẹru-Ivie 36:22, 23) Evaọ abọ urere 537 B.C.E., emọ Izrẹl jọ a te ru Ehaa Iwou-Udhu evaọ ẹkuotọ Izrẹl oke ọsosuọ evaọ etoke ikpe 70! Nọ ehaa na o vrẹ no, a te mu etẹmpol Jihova họ ẹwariẹ bọ. Ẹvẹ oma o jarai kpahe onana? Okerefihotọ na o ta nọ: “Ahwo na kpobi a te do edo ologbo, nọ a je jiri ỌNOWO na fiki otọhotọ uwou ỌNOWO na nọ a fihọ no.”—Ẹzra 3:11.