5. Ẹvẹ ma rọ riẹ nọ Jihova o wo ọdawẹ?

⁵ Kọ Jihova o wo iroro ọdawẹ otiọye na? Avro ọ riẹ hẹ. Wọhọ oriruo, ma se kpahe uye-oruẹ ahwo Izrẹl riẹ nọ: “Uye rai kpobi o [da] riẹ.” (Aizaya 63:9) Orọnikọ Jihova ọ jẹ ruẹ idhọvẹ rai ọvo ho; o jẹ dae kẹ ahwo na. Jihova ọvo ọ rehọ unu obọ riẹ fodẹ oghẹrẹ nọ o da riẹ te kẹ ahwo riẹ, onọ a kere fihọ Zekaraya 2:8: “Ọnọ rehọ obọ te owhẹ ọ rehọ obọ te ọmọ-ẹro mẹ.”a Ọtota jọ ọ ta kpahe owọ Ebaibol ọnana nọ: “Ẹro na yọ oware jọ nọ o jọ ugboma ohwo mae hẹhẹ jẹ ghare; yọ ọmọ-ẹro na—oware nọ o rẹ lẹliẹ omai ruẹ elo odhiwu na—họ oware nọ o mae ghare, jẹ mai wuzou evaọ ẹro na. Oware ofa nọ u re dhesẹ ẹruọsa nọ Jihova o wo kẹ ahwo nọ o you vi onana o riẹ hẹ.”