Si Kẹle Ọghẹnẹ

Kọ Oware Jọ O rẹ Sae “Hẹriẹ Omai No Uyoyou Ọghẹnẹ”?

Ahwo Rom 8:38, 39

ONO evaọ usu mai na o rẹ were he nọ amọfa a te wo uyoyou kẹe? Evaọ uzẹme, o rẹ bọ omai ga ziezi nọ ma tẹ ruẹ nọ ahwo uviuwou gbe egbẹnyusu mai a you omai. Rekọ u yoma kẹhẹ inọ uyoyou ahwo-akpọ kẹ ohwohwo o be hae dọmu hu. Ahwo nọ ma you a sai ru oware nọ o rẹ da omai, gbabọkẹ omai, hayo tubẹ siọ omai dede. Ghele na, ohwo jọ ọ rrọ nọ uyoyou riẹ o rẹ hiẹ hẹ. A dhesẹ uyoyou nọ Jihova Ọghẹnẹ o wo kẹ ahwo nọ a be gọe eva obe Ahwo Rom 8:38, 39.

Makọ “ekpehru, hayo ekodo.” Jihova o re you idibo riẹ ghelọ uyero kpobi nọ a rrọ—oria ukpehru hayo ukpotọ nọ oware jọ u re fi ai họ kẹhẹ.

Makọ “oware ovo [jọ] eva emama na kpobi.” Ẹme Pọl nana u dhesẹ nọ makọ evaọ emama kpobi, oware ovuọvo o rrọ nọ o rẹ hẹriẹ idibo omaurokpotọ Jihova no uyoyou nọ o wo kẹ ai hi.

Wo ohẹriẹ no uyoyou ohwo-akpọ nọ o rẹ sae hiẹ hayo nwene, uyoyou nọ Ọghẹnẹ o wo kẹ ahwo nọ a rẹro suọ iẹe, o rẹ jọ bẹdẹ bẹdẹ, oware ovuọvo u re ru ei hi. Onana nọ ma vuhumu na o rẹ lẹliẹ omai si kẹle Jihova vi epaọ ọsosuọ, je ru nọ ma rẹ rọ dao ẹgba mai kpobi ruẹ nọ ma you rie zihe.