Ẹmeọta Kugbe Omọfa Kpahe Ebaibol Kọ Ahwo Owoma Kpobi A ti Kpohọ Odhiwu?

O RẸ were Isẹri Jihova re a rọ Ebaibol na jiroro kugbe ahwo. Kọ who wo ugogo onọ jọ kpahe Ebaibol na nọ o be kẹ owhẹ idhọvẹ? Kọ o te were owhẹ re whọ gbẹ riẹ kpahe eware nọ Isẹri Jihova a rọwo hayo oware nọ o soriẹ ze nọ a bi ro dhesẹ eware nọ a rọwo no Ebaibol ze evaọ edhere otiọye? O tẹ rrọ ere, ta ẹme na kẹ omọvo Isẹri Jihova kpobi nọ whọ nyaku. O te were iẹe re ọ rọ ẹme na jiroro kugbe owhẹ.

Eme nọ e rrọ obotọ na yọ eme nọ o sae jọnọ omọvo Isẹri Jihova jọ o lele ohwo jọ ta kpahe Ebaibol na. Ma rehọ iẹe nọ omọvo Isẹri Jihova jọ nọ a re se Jemis ọ nyaze uwou ọzae nọ a re se Fẹstọs, ti lele iei rọ Ebaibol na jiroro.

Eme Ahwo nọ A ti Kpohọ Odhiwu A te Jọ Obei Ru?

Jemis: Nọ who te roro kpahe obaro na, kọ who roro nọ eware i ti woma ẹdẹjọ hayo yoma vrẹ enẹ, manikọ e te jọ epọvo na?

Fẹstọs: Me roro nọ i ti woma ẹdẹjọ. Mẹ be hẹrẹ okenọ me ti kpohọ odhiwu nyae jọ kugbe Olori na.

Jemis: Oyena u woma kẹhẹ. Ebaibol na ọ ta ẹme buobu kpahe oghẹrẹ nọ odhiwu ọ rrọ, gbe inọ uvẹ-ọghọ o rrọ re a kpohọ obei. Kọ whọ sai roro kpahe oware nọ ahwo nọ a ti kpohọ odhiwu a te jọ obei ru?

Fẹstọs: Ma te jọ kugbe Ọghẹnẹ jẹ kpẹwẹ iẹe bẹdẹ bẹdẹ.

Jemis: Oyena ginọ emamọ irẹro. Rekọ dede nọ Ebaibol na o ta nọ uvẹ-ọghọ o rrọ re a kpohọ odhiwu, o ta re inọ ahwo nọ a ti kpohọ odhiwu a ti ru obọdẹ iruo jọ.

Fẹstọs: Didi iruo?

Jemis: Oye họ onọ a fodẹ evaọ obe Eviavia 5:10 na. Owọ Ebaibol yena o ta nọ: “Who ru rai họ uvie gbe izerẹ kẹ Ọghẹnẹ mai, yọ a rẹ te jọ ivie, je su otọakpọ na.” (Eviavia 5:10, NW) Kọ who muẹrohọ nọ etenẹ na o ta kpahe iruo nọ enọ i ti kpohọ odhiwu a ti ru?

Fẹstọs: Oria na o ta nọ a rẹ te jọ ivie, je su otọakpọ na.

Jemis: Onana yọ emamọ oware, ogbẹrọ ere?

Amono Ahwo Yena A re Ti Su?

Jemis: Whọ tẹ rọwo nọ enọ i ti kpohọ odhiwu a te jọ ivie, kọ u gbe wo ahwo nọ a re ti su? Whọ riẹ nọ a tẹ ta ẹme kpahe isuẹsu, u dhesẹ nọ u wo ahwo nọ e rrọ otọ isuẹsu na, ogbẹrọ ere?

Fẹstọs: Me bi wo otoriẹ ẹme na ẹmẹrera.

Jemis: Fikiere, onọ jọ nọ u fo nọ whọ rẹ nọ họ, Amono ahwo yena a re ti su?

Fẹstọs: Me roro nọ ma ti su ahwo nọ e gbẹ rrọ akpọ na, enọ i ti kpohọ odhiwu rekiyọ a ri whu hu na.

Jemis: Oyena o hai woma o hae jọnọ ahwo owoma kpobi a re kpohọ odhiwu. Rekọ rri ẹme na no ofẹ ọfa ze. Kọ o sai jọnọ ahwo owoma jọ a ti kpohọ odhiwu hu?

Fẹstọs: Mẹ re ruẹ Ileleikristi nọ e rọwo oware utioye he.

Jemis: Mẹ nọ onọ na fiki oware nọ ma se ku evaọ Olezi 37:29. Iviena, se oria nana ze.

Fẹstọs: U woma. O ta nọ: “Ikiẹrẹe e rẹ te rehọ otọ na reuku, a vẹ jẹ ria ae bẹdẹ.”

Jemis: Whẹ kobiruo. Kọ who muẹrohọ oria nọ ahwo owoma buobu a te rria?

Fẹstọs: Oria na o ta nọ a te rria otọ na, koyehọ otọakpọ na.

Jemis: Whọ ta gba, yọ orọnọ evaọ ubroke jọ ọvo ho. Muẹrohọ nọ oria na o ta haro nọ: “A vẹ jẹ ria ae bẹdẹ.”

Fẹstọs: O sae jọnọ u bi dhesẹ nọ ahwo owoma a te kare akpọ na ha. Nọ ma te whu je kpohọ obọ odhiwu no, ahwo owoma efa nọ a yẹ, a vẹ rehọ ẹta mai.

Jemis: Ahwo buobu a sae ginẹ fotọ oria Ebaibol yena ere. Kọ whọ riẹ sọ oria Ebaibol nana u wo otofa nọ u wo ohẹriẹ no oyena? Kọ o sae jọnọ o be ta nọ ahwo owoma a te rria otọakpọ na bẹdẹ bẹdẹ?

Fẹstọs: Ẹme ra na o ri vẹ omẹ ẹro ho.

Aparadase Otọakpọ Evaọ Obaro

Jemis: Whaọ, roro kpahe oware nọ oria ọfa evaọ Ebaibol na o ta kpahe epanọ uzuazọ o te jọ evaọ otọakpọ. Joma se obe Eviavia 21:4. Oria na o ta kpahe ahwo nọ a te jọ uzuazọ evaọ oke yena, inọ: “Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.” Kọ oyena ogbẹrọ oware nọ who re rẹro riẹ?

Fẹstọs: Ee. Rekọ me roro nọ oyena o be ta kpahe epanọ uzuazọ o te jọ evaọ obọ odhiwu.

Jemis: Ginọ uzẹme nọ enọ i ti kpohọ odhiwu a ti wo ọkpọ eghale evona. Rekọ wariẹ rri owọ Ebaibol na. Eme o ta nọ o rẹ te via kẹ uwhu?

Fẹstọs: O ta nọ, “uwhu o gbẹte jọ ofa ha.”

Jemis: Nwanọ ere. Whaọ, mẹ riẹ nọ re whọ rọwo nọ oware jọ o gbẹ te jọ ofa ha, u dhesẹ nọ oware na o rẹ jariẹ tao.

Fẹstọs: Ginọ ere.

Jemis: Rekọ ma ri yo nọ ohwo jọ o whu evaọ obọ odhiwu ẹdọvo ho, manikọ ere he? Obọ otọakpọ obonẹ ọvo ahwo a bi jo whu.

Fẹstọs: Humm. Me ti roro kpahe ẹme nana.

Jemis: Whọ ruẹ, Ebaibol na ọ ta nọ ahwo owoma jọ a ti kpohọ odhiwu rekọ efa buobu e te rria otọakpọ na bẹdẹ bẹdẹ. U mu omẹ ẹro nọ who yo eme Jesu nana no ẹdẹjọ, inọ: “Ahwo nọ a te rọ oma kpotọ eva e were ae, keme arẹ te ria akpọ na.”—Matiu 5:5.

Fẹstọs: Ẹhẹ, a se oria nana unuẹse buobu no evaọ obọ ichọche mai.

Jemis: Otẹrọnọ ahwo nọ e romakpotọ a te rria akpọ na, kọ oyena u gbe dhesẹ nọ ahwo a te jọ otọakpọ na? Ahwo nọ a te rria otọakpọ na a te reawere eghale nọ a jọ obe Eviavia fodẹ na. A te ruẹ nọ otọakpọ na kpobi u ti nwene, keme Ọghẹnẹ ọ te raha oware uyoma kpobi no, makọ uwhu dede.

Fẹstọs: Me wo otoriẹ ẹme ra na, rekọ oria ọvo hayo ivẹ nọ ma jọ Ebaibol se na e vọ omẹ eva ha.

Jemis: Ginọ ere. Evaọ uzẹme, eria efa buobu e rrọ Ebaibol na nọ e ta kpahe epanọ uzuazọ o te jọ evaọ otọakpọ na evaọ obaro. Otẹrọnọ whọ sae gbẹ kẹ omẹ omoke jọ, mẹ sai dhesẹ ojọ evaọ usu eria Ebaibol nọ e mae were omẹ kẹ owhẹ.

Fẹstọs: Ẹhẹ, omoke jọ o gbẹ riẹ.

“Iru-Umuomu E Gbẹ te Jọ Họ”

Jemis: Ma kaki se Olezi avọ 37 owọ avọ 29 no. Joma zihe kpohọ olezi yena. Ma ti se owọ avọ 10 gbe 11. Iviena, se eria yena ze.

Fẹstọs: U woma. O ta nọ: “Omoke kakao, iru-umuomu e gbẹ te jọ họ; dede nọ wha bi ri oria riẹ ziezi na, ọ rẹ te jọ etẹe he. Rekọ enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ.”

Jemis: Whẹ kobiruo. Wọhọ epanọ owọ avọ 11 o ta na, oria vẹ “enọ e rọ oma kpotọ,” hayo ahwo owoma na a te rria?

Fẹstọs: O ta nọ a te “rọ otọ na reuku.” Rekọ me roro nọ oria nana o be ta kpahe oke mai nana, keme ahwo owoma a be rria otọakpọ na enẹna.

Jemis: Ginọ uzẹme. Rekọ muẹrohọ nọ owọ Ebaibol yena o ta nọ ahwo owoma a ti wo “omofọwẹ.” Kọ omofọwẹ hayo udhedhẹ o ginẹ rrọ akpọ na nẹnẹ?

Fẹstọs: Ijo, o riẹ hẹ.

Jemis: Kọ ẹvẹ who roro nọ eyaa yena i ti ro rugba? Ma rehọ iẹe nọ who wo uwou obọra. Ahwo jọ nọ whọ haya uwou kẹ a rrọ wowoma; a be rẹrote uwou na, jẹ be riẹ yerikugbe erivẹ rai. Eva e rẹ were owhẹ inọ whọ haya uwou kẹ ae. Rekọ amọfa nọ whọ haya abọjọ uwou na kẹ a rrọ yoyoma; a be rẹrote uwou na ha, yọ a bi ru akpọ bẹ erivẹ rai. Kọ otẹrọnọ ahwo nana a gbẹ be rọwo siobọno uruemu uyoma rai hi, eme who ti ru?

Fẹstọs: Me re le ai no uwou mẹ.

Jemis: Nwanọ ere Ọghẹnẹ o bi ti ru ahwo oyoma nọ e rrọ akpọ na. Wariẹ rri owọ avọ 10. O ta nọ: “Iru-umuomu e gbẹ te jọ họ.” Oyena u dhesẹ nọ Ọghẹnẹ o re ti le hayo si ahwo nọ e be wha ethube se amọfa evaọ akpọ na no. Kẹsena, ahwo owoma a vẹ te reawere udhedhẹ evaọ otọakpọ na. U mu omẹ ẹro nọ uwuhrẹ kpahe ahwo owoma nọ a te rria otọakpọ bẹdẹ bẹdẹ, o dina wo ohẹriẹ no oware nọ a wuhrẹ owhẹ evaọ okenọ u kpemu.

Fẹstọs: Ginọ ere. Me ri ti yo oware utiona evaọ obọ ichọche mẹ hẹ.

Jemis: Yọ wọhọ epanọ whọ ta no vẹre na, u te he re ma se oria ọvo hayo ivẹ evaọ Ebaibol na kpahe ẹme nana. O gwọlọ nọ ma rẹ kiẹ oware nọ Ebaibol na soso o ta riwi kpahe epanọ uzuazọ o te jọ kẹ ahwo owoma evaọ obaro. Rekọ wọhọ epanọ eria Ebaibol nọ ma se nẹnẹ e ta na, kọ who roro nọ o te lọhọ re ahwo owoma jọ a kpohọ odhiwu, re efa buobu a rria otọakpọ na bẹdẹ bẹdẹ?

Fẹstọs: U mu omẹ ẹro ho. Rekọ, me te roro kpahe eria Ebaibol nọ who se na, o wọhọ nọ ere o rrọ. Me ti gbe roro kpahe iẹe viere.

Jemis: Nọ who bi roro kpahe ẹme nana viere na, ẹsejọhọ enọ efa jọ e te ziọ owhẹ iroro. Wọhọ oriruo, kọ ẹvẹ kpahe ahwo owoma nọ a rria no taure a te ti yẹ omai? Kọ aikpobi a kpohọ odhiwu? Otẹrọnọ a kpohọ odhiwu hu, kọ diẹse a rrọ enẹna?

Fẹstọs: Me ti roro kpahe enọ yena.

Jemis: Mẹ sai fi obọ họ kẹ owhẹ ru eware ivẹ jọ. Orọ ọsosuọ, jome kere umutho eria Ebaibol jọ nọ e ta kpahe ẹme nana kẹ owhẹ.a Orọ avivẹ, o te were omẹ re me zihe ze, re me lele owhẹ ta ẹme kpahe eria Ebaibol eyena nọ who te se je roro kpahe ai no. Kọ o te were owhẹ ere?

Fẹstọs: Ee, u woma ere. Whẹ kobiruo.

[Oruvẹ-obotọ]