Ma rẹ ruẹ ikuigbe nana evaọ Ebe Usiuwoma ene nọ e rrọ Ikereakere Griki Ileleikristi na, nọ ahwo buobu a re se Ọvọ Ọkpokpọ na. Kọ eware yena e ginẹ via? Onọ nana u wuzou gaga. Otẹrọnọ eware yena e ginẹ via ha, kiyọ ẹrọwọ Ileleikristi ufofe, yọ ẹruore uzuazọ ebẹdẹ bẹdẹ evaọ Aparadase kiyọ iku-esia gheghe. (1 Ahwo Kọrint 15:14) Rekọ otẹrọnọ e ginẹ via, kiyọ ahwo-akpọ a wo ẹruore emamọ eware nọ e rrọ obaro tha, onọ eghale riẹ e rẹ sai te owhẹ re. Onọ na họ, Ebe Usiuwoma na yọ iku-esia gheghe manikọ eware nọ e ginẹ via?

EWARE NỌ E KẸ IMUẸRO

Wo ohẹriẹ no iku-esia, ikuigbe nọ e rrọ Ebe Usiuwoma na e rrọ gbagba. Wọhọ oriruo, whọ rẹ jọ ikuigbe na ruẹ edẹ eria sa-sa, yọ eria itieye na jọ e gbẹ riẹ rite inẹnẹ na. Ikuigbe na e ta kpahe ahwo nọ a ginẹ rria, enọ igbiku sa-sa e ta ẹme te re.—Luk 3:1, 2, 23.

Igbiku ikpe udhusoi ọsosuọ gbe ikpe udhusoi avivẹ a ta kpahe Jesu.a Oghẹrẹ nọ a jọ Ebe Usiuwoma na dhesẹ uwhu Jesu, o nwani rọwokugbe oghẹrẹ nọ ahwo Rom a jẹ hai ro kpe ahwo evaọ oke yena. Ofariẹ, ikuigbe na e rọwo kugbe eware nọ a kiẹ via jẹ rrọ gbagba, yọ e tubẹ fodẹ ethobọ ikọ Jesu jọ dede. (Matiu 26:56; Luk 22:24-26; Jọn 18:10, 11) Eware nana kpobi e kẹ imuẹro inọ ahwo nọ a kere Ebe Usiuwoma na, a jọ ahwo oruọzewọ, yọ a kere ikuigbe Jesu na gbagba.

KỌ ẸKPAROMATHA JESU GINỌ UZẸME?

Dede nọ ahwo buobu a rọwo nọ Jesu ọ ginẹ rria otọakpọ na je whu, ejọ e rẹ vravro kpahe ẹkparomatha riẹ. Makọ ikọ riẹ dede a jẹ kake rọwo ho nọ a yo nọ a kpare Jesu no uwhu ze no. (Luk 24:11) Rekọ nọ Jesu ọ romavia kẹ ae unuẹse buobu evaọ eria sa-sa no, avro kpobi o te no ai udu. Evaọ ojọ dede, ọ tubẹ romavia kẹ ahwo nọ a bu vi egba isoi (500) soso.—1 Ahwo Kọrint 15:6.

Ikọ Jesu a je whowho ẹkparomatha Jesu ududu kẹ ahwo kpobi makọ rọkẹ ahwo nọ a kpe Jesu, dede nọ a riẹ nọ a ti mu ai je kpe ai. (Iruẹru Ikọ 4:1-3, 10, 19, 20; 5:27-32) Kọ ikọ na a hae sai whowho ovuẹ ẹkparomatha na ududu ere, u gbe mu ai ẹro nọ Jesu ọ kparoma ha? Uzẹme riẹ họ, imuẹro ẹkparomatha Jesu họ oware nọ o be wọ Ileleikristi ta usiuwoma kẹ ahwo kpobi no anwọ oke Jesu ze na.

Ma rẹ jọ ikuigbe nọ e rrọ Ebe Usiuwoma na ruẹ imuẹro ivevẹ kpahe uwhu gbe ẹkparomatha Jesu. Whọ tẹ nabe romatotọ se ikuigbe nana, u ti mu owhẹ ẹro nọ eware nana e ginẹ via. Imuẹro ra e rẹ sae ga viere nọ whọ tẹ riẹ oware nọ o wha riẹ ze nọ eware yena e rọ via. Ma te jọ uzoẹme nọ o rrọ aro na ta kpahe iẹe.

Otẹrọnọ a nọ owhẹ nọ, “Kọ whọ gwọlọ rria bẹdẹ bẹdẹ?” Ẹvẹ whọ te ta? Ahwo buobu a rẹ sae ta nọ o te were ae re a rria bẹdẹ bẹdẹ, rekọ a re roro nọ o rẹ sae via ha. A rẹ ta nọ ohwo o te yeri yeri, o ve whu, ohwo ọvo nọ o ti whu hu ọ riẹ hẹ.

Rekọ ẹvẹ otẹrọnọ a ku onọ na rẹriẹ a jẹ nọ owhẹ nọ, “Kọ whọ gwọlọ whu?” Re a ginẹ ta uzẹme, ahwo buobu a te ta nọ ijo. Ẹme nọ ma gwọlọ ta na họ, ohwo ọvo ọ gwọlọ whu hu ọ tẹ make be ruẹ uye. Ebaibol na o dhesẹ nọ Ọghẹnẹ ọ ma ohwo avọ isiuru nọ ọ rẹ rọ rria bẹdẹ bẹdẹ. Ebaibol na ọ tubẹ ta nọ Ọghẹnẹ o “fi uzuazọ ibẹdẹ họ eva ohwo.”—Ọtausiuwoma Na 3:11.

Rekọ ahwo a be rria bẹdẹ bẹdẹ nẹnẹ hẹ. Eme ọ via? Kọ eme Ọghẹnẹ o ru kpahe ẹbẹbẹ nana nọ ọ rrọ otọ na? Iyo nọ Ebaibol na ọ kẹ i woma wumuo ho, yọ onana u wobọ kugbe oware nọ o wha riẹ ze nọ Jesu ọ rọ ruẹ uye je whu.

OWARE NỌ O VIA

Izou esa ọsosuọ obe Emuhọ Ebaibol na e vuẹ omai epanọ Ọghẹnẹ o ro fi uzuazọ ebẹdẹ bẹdẹ họ kẹ Adamu avọ Ivi jẹ vuẹ ae oware nọ a re ru re a sai woi. O tẹ jẹ ta kpahe epanọ a rọ ghẹmeeyo kẹ Ọghẹnẹ je ku uzuazọ ebẹdẹ bẹdẹ kufiẹ. Fikinọ ohwo ọ rẹ sai wo otoriẹ iku na lọlọhọ, ahwo jọ a re roro nọ iku isia gheghe. Wọhọ Ebe Usiuwoma na, obe Emuhọ o kẹ imuẹro inọ iku nana ginọ uzẹme.a

Kọ eme o no aghẹmeeyo Adamu na ze? Ebaibol na ọ ta nọ: “Wọhọ epanọ uzioraha o rọ ẹkwoma omọvo [Adamu] ruọ akpọ na, uwhu u je no uzioraha ze na, ere uwhu u ro te ahwo kpobi oma keme aikpobi a raha uzi no.” (Ahwo Rom 5:12) Adamu ọ rọ ẹkwoma aghẹmeeyo riẹ raha uzi Ọghẹnẹ. Ọ tẹ rọ ere ku uvẹ nọ ọ hae rọ rria bẹdẹ bẹdẹ kufiẹ je whu. Fikinọ mai yọ emọ Adamu, ma reuku uzioraha mi ei. Onana o wha riẹ ze nọ ma be rọ mọ, who, je whu na. Ẹme nana nọ Ebaibol na ọ ta kpahe oware nọ o wha riẹ ze nọ ma bi ro whu na, o rọwokugbe oware nọ egba-eriariẹ a ta inọ emọ a rẹ rọ eware sa-sa tho esẹgbini rai. Kọ eme Ọghẹnẹ o ru kpahe ẹbẹbẹ nana nọ ọ rrọ otọ na?

OWARE NỌ ỌGHẸNẸ O RU NO

Ọghẹnẹ o ru ọruẹrẹfihotọ no re ọ dẹ oware nọ Adamu o kufiẹ zihe ze, koyehọ re ọ ta emọ Adamu no igbo uzioraha gbe uwhu re a sae rria bẹdẹ bẹdẹ. Ẹvẹ Ọghẹnẹ o ro ru onana?

Ebaibol na ọ jọ obe Ahwo Rom 6:23 ta nọ, “uwhu họ osohwa uzioraha.” Onana u te dhesẹ nọ uwhu họ oware nọ u re no uzioraha ze. Nọ Adamu ọ raha uzi, o te whu. Ere ọvona re, fikinọ mai yọ erahizi, ma re whu re. Rekọ a yẹ omai fihọ igbo uzioraha orọnikọ mai họ enọ e raha uzi na ha. Fikiere Ọghẹnẹ o te vi ọmọvo riẹ ze re o whu evaọ ẹta mai. Ẹvẹ onana o sae rọ lọhọ?

Nọ orọnọ Adamu nọ ọ jọ ohwo ọgbagba ọ wha uzioraha gbe uwhu ze fiki aghẹmeeyo na, ere ọvona o gwọlọ ẹmeoyo omọfa nọ ọ rrọ gbagba re a sai siwi omai no igbo uzioraha gbe uwhu. Ebaibol na o dhesẹ i rie vevẹ inọ: “Wọhọ epanọ aghẹmeeyo ọzae ọvo o ru ahwo buobu zihe ruọ erahaizi na, ere ọvona re a te rọ ẹkwoma ẹmeoyo omọvo ru ahwo buobu kiẹrẹe.” (Ahwo Rom 5:19) “Omọvo” yena họ Jesu. Jesu o no obọ odhiwu ze, o te zihe ruọ ohwo ọgbagbab, kẹsena o te whu kẹ omai. Onana u te ru ei lọhọ nọ ma sai ro wo emamọ usu kugbe Ọghẹnẹ gbe ẹruore uzuazọ ebẹdẹ bẹdẹ.

OWARE NỌ JESU Ọ RỌ RUẸ UYE JE WHU

Fikieme o rọ gwọlọ nọ Jesu o re whu re ọ sai siwi omai no igbo uzioraha gbe uwhu? Kọ Ọghẹnẹ nọ ọ rrọ Erumeru na ọ gbẹ sai ru ei lọhọ re emọ Adamu a rria bẹdẹ bẹdẹ ababọ ohwo jọ nọ o re whu? Ababọ avro, Ọghẹnẹ o wo ogaga utioye. Rekọ o hae jọnọ o ru ere, uzi nọ o jie inọ uwhu họ osohwa uzioraha na o hai ti rugba ha. Uzi yena o rrọ oware nọ a re mu nwene fihọ oghẹrẹ nọ u je ohwo ho. O rọwokugbe oziẹ okiẹrẹe Ọghẹnẹ.—Olezi 37:28.

Ọghẹnẹ o gbe ru lele uvioziẹ riẹ hẹ, o hae te lẹliẹ ahwo wo avro sọ Ọghẹnẹ ọ sai gine ru ẹme riẹ gba evaọ eware efa. Wọhọ oriruo, kọ ahwo a gbẹ hae vro sọ Ọghẹnẹ o ti dhesẹ ababọ ọriẹwẹ evaọ oghẹrẹ nọ ọ te rọ salọ emọ Adamu nọ i ti wo uzuazọ ebẹdẹ bẹdẹ? Kọ ahwo a hai fievahọ iẹe nọ o ti ru eyaa riẹ gba? Uvioziẹ riẹ nọ o ru lele na o kẹ omai imuẹro inọ Ọghẹnẹ o re ru oware nọ u kiẹrẹe ẹsikpobi.

Ẹkwoma uwhu Jesu, Ọghẹnẹ o rovie uvẹ uzuazọ ebẹdẹ bẹdẹ fihọ evaọ Aparadase otọakpọ. Muẹrohọ ẹme nọ Jesu ọ ta evaọ obe Jọn 3:16 inọ: “Ọghẹnẹ o you akpọ na gaga o te siobọno Ọmọ ọvo riẹ, re ohwo kpobi nọ o fi ẹrọwọ họ iẹe o gbe whu hu rekọ o ve wo uzuazọ ebẹdẹ bẹdẹ.” Ọghẹnẹ ọ rọ ẹkwoma uwhu Jesu dhesẹ uvioziẹ riẹ via, maero kọ uyoyou ulogbo riẹ nọ o wo kẹ ahwo-akpọ.

Rekọ, fikieme o rọ gwọlọ nọ Jesu ọ rẹ ruẹ uye je whu uwhu odada wọhọ epanọ a dhesẹ i rie evaọ Ebe Usiuwoma na? Nọ orọnọ Jesu ọ ruẹ uye je thihakọ te urere na, u dhesẹ ẹme Ẹdhọ fihọ ọrue koikoi inọ ahwo a ti yoẹme kẹ Ọghẹnẹ hẹ, nọ a tẹ rẹriẹ ovao dhe odawọ hayo nọ a tẹ be ruẹ uye. (Job 2:4, 5) Nọ Setan o ru Adamu ohwo ọgbagba na raha uzi no, o sae lẹliẹ ohwo roro nọ ẹme Setan na ginọ uzẹme, inọ okenọ eware i te woma kẹ omai ọvo ma re ro yoẹme kẹ Ọghẹnẹ. Rekọ Jesu nọ ọ jọ ohwo ọgbagba wọhọ Adamu, o yoẹme kẹ Ọghẹnẹ dede nọ ọ ruẹ uye ogaga. (1 Ahwo Kọrint 15:45) Jesu ọ tẹ rọ ere dhesẹ nọ Adamu ọ hẹ sai yoẹme kẹ Ọghẹnẹ o hae jọnọ ọ gwọlọ ru ere. Fikinọ Jesu ọ thihakọ te urere nọ ọ rẹriẹ ovao dhe edawọ, ọ tẹ rọ ere fi emamọ oriruo họ otọ kẹ omai nọ ma rẹ rọ aro kele. (1 Pita 2:21) Ọghẹnẹ ọ rọ uzuazọ sebaewhuo hwosa kẹ Ọmọ riẹ fikinọ o yoẹme kẹe te urere.

ERERE NỌ Ọ SAI TE OWHẸ

Uwhu Jesu yọ oware nọ o ginẹ via dẹẹ. Uvẹ uzuazọ ebẹdẹ bẹdẹ u rovie fihọ no. Kọ whọ gwọlọ rria bẹdẹ bẹdẹ? Jesu ọ fodẹ oware nọ ma re ru re ma sai wo uzuazọ ebẹdẹ bẹdẹ inọ: “Re a wo uzuazọ ebẹdẹ bẹdẹ, o gwọlọ nọ a rẹ riẹ owhẹ, Ọghẹnẹ uzẹme ọvo na, gbe ọnọ who vi ze na, Jesu Kristi.”—Jọn 17:3.

Isẹri Jihova nọ i kere emagazini nana a be tuduhọ owhẹ awọ nọ, who gbe wuhrẹ kpahe Jihova nọ ọ rrọ Ọghẹnẹ uzẹme na, gbe Ọmọ riẹ, Jesu Kristi. Eva e te were Isẹri Jihova nọ e rrọ okegbe ra re a fiobọhọ kẹ owhẹ wuhrẹ kpahe Jihova avọ Jesu. Whọ te jẹ ruẹ evuẹ efa evaọ oria Itanẹte mai www.jw.org/iso.