Kọ Isẹri Jihova A Whaha Ahwo Egagọ Rai Oghẹrẹ Ifimu, Ebe, Hayo Ile jọ?

Ijo. Mai Isẹri Jihova ma re fi uzi họ inọ oghẹrẹ ifimu jọ ọvo ahwo mai a re rri, oghẹrẹ ebe jọ ọvo a re se, hayo oghẹrẹ ile jọ ọvo a re kporo ho. Fikieme?

Ebaibol na ọ tuduhọ omai omomọvo awọ inọ ma wuhrẹ iroro mai hayo “ẹgba otoriẹ” mai ziezi, re ma sae hẹriẹ oware uwoma no uyoma.—Ahwo Hibru 5:14.

Ma rẹ jọ Ebaibol na ruẹ izi nọ e rẹ sae kpọ Oleleikristi nọ ọ tẹ be salọ ifimu nọ o re rri, ebe nọ o re se, gbe oghẹrẹ ile nọ ọ rẹ gaviezọ kẹ.a Evaọ kabọ kabọ uzuazọ mai, ma rẹ ‘daoma ruẹ nọ oware nọ Olori na ọ jẹrehọ ma bi ru.’—Ahwo Ẹfisọs 5:10.

Ebaibol na o wuhrẹ omai nọ enọ i wo uzou uviuwou a wo udu nọ a rẹ rọ ta oware nọ a rẹ jọ uwou rai ru, fikiere a wo udu nọ a sae rọ whaha oghẹrẹ ifimu, ebe, gbe ile jọ evaọ uwou rai. (1 Ahwo Kọrint 11:3; Ahwo Ẹfisọs 6:1-4) U te no enọ i wo uzou uviuwou no, ohwo ọvo o udu nọ ọ rẹ rọ whaha oghẹrẹ ifimu nọ ohwo re rri, ebe nọ o re se, hayo oghẹrẹ ile nọ ọ rẹ gaviezọ kẹ evaọ ukoko na ha.—Ahwo Galesha 6:5.