Eme Me re Ru Otẹrọnọ A be Hae Gwọlọ Ọmọ Mẹ Ẹme?

Nọ ọmọzae ra ọ tẹ vuẹ owhẹ nọ a be hae gwọlọ iẹe ẹme evaọ obọ isukulu, eme who re ru? Kọ whọ rẹ ta nọ jọ a jọ obọ isukulu fa ọmọ nọ ọ be hae gwọlọ iẹe ẹme na? Hayo kọ who ti wuhrẹ ọmọzae ra epanọ o re ro ru ọgwọlọ-ẹme na kele? Taure whọ tẹ te jiroro oware nọ who re ru, joma ta kpahe eware jọ nọ i kiekpahe ẹme-ọgwọlọ.a

• Eme u fo nọ mẹ rẹ riẹ kpahe ẹme-ọgwọlọ?

• Ẹvẹ mẹ sai ro fiobọhọ?

Eme u fo nọ mẹ rẹ riẹ kpahe ẹme-ọgwọlọ?

Eme họ ẹme-ọgwọlọ? Ẹme-ọgwọlọ nọ ma be jọ etenẹ ta kpahe na u dhesẹ epanọ a re keke aro fihọ ta hayo ru oware nọ o rẹ da omọfa ẹsikpobi. Fikiere, orọnikọ a tẹ nwane la omọfa eka hayo ru oware nọ o kẹ riẹ uye họ ẹme-ọgwọlọ nọ ma be ta kpahe na ha.

Oware nọ u ro wuzou re ma riẹ oware nọ ẹme-ọgwọlọ ọ rrọ: Ahwo jọ a rẹ ta nọ ẹme-ọgwọlọ họ oware kpobi nọ omọfa o ru nọ o kẹ ohwo uye, te emeware esese dede. Rekọ otẹrọnọ omoware kpobi nọ a ru ọmọ ra whọ be hai dhomahọ ro ru ẹme, yọ who bi wuhrẹ ọmọ ra inọ o te ohwo nọ ọ rẹ sai ku ẹbẹbẹ họ họ. Whaọ, o roja gaga re o wuhrẹ epanọ o re ro ku ebẹbẹ họ keme u ti fiobọhọ kẹe enẹna gbe okenọ ọ tẹ kpako no.

Ehri-uzi Ebaibol: “Whọ kaki mu ofu hu.”—Ọtausiuwoma Na 7:9.

Ẹme na họ: Dede nọ u wo ebẹbẹ jọ nọ o gwọlọ nọ who re dhomahọ, u wo efa nọ o gwọlọ nọ whọ rẹ kẹ ọmọ ra uvẹ re o wuhrẹ epanọ o re ro yerikugbe amọfa.​—Ahwo Kọlọsi 3:13.

Kọ eme who re ru otẹrọnọ ọmọ ra ọ ta kẹ owhẹ nọ a be hae gwọlọ iẹe ẹme kẹse kẹse?

Ẹvẹ mẹ sai ro fiobọhọ?

• Romatotọ gaviezọ kẹ ọmọ ra. Daoma riẹ (1) oware nọ o be via na gbe (2) oware nọ a be rọ gwọlọ iẹe ẹme. Daoma riẹ otọ ẹme na ziezi re whọ tẹ jowọ. Nọ omara nọ, ‘Kọ unu omọvo me bi ro bruoziẹ na?’ Re whọ riẹ ẹme na totọ, o sae gwọlọ nọ whọ ta ẹme kugbe iticha ọmọ ra hayo ọsẹgboni ọmọ ọdekọ na.

  Ehri-uzi Ebaibol: “Ohwo ọ tẹ be kpahe fihọ ẹme taure o te ti yo oware nọ o ginẹ via, yọ ugheghẹ gbe oware omovuọ.”—Itẹ 18:13.

• Otẹrọnọ a be ginẹ gwọlọ ọmọ ra ẹme, fiobọhọ kẹe vuhumu nọ oware nọ ọ ta hayo ru o rẹ sai ru eware lọhọ hayo yoma viere. Wọhọ oriruo, Ebaibol na ọ ta nọ: “Uyo uwowolẹ u re hrẹ ofu kpotọ, rekọ ẹme ọgaga ọ rẹ kpare ofu.” (Itẹ 15:1) Uzẹme na họ, orukele o rẹ wha uye ze, u re ru ẹme-ọgwọlọ na ga viere.

  Ehri-uzi Ebaibol: “Wha rehọ eyoma hwosa eyoma ha hayo rọ ekela hwosa ekela ha.”—1 Pita 3:9.

• Ru ei vẹ kẹ ọmọ ra inọ o gbe ru kele he, orọnikọ ọyẹlẹ ọ rrọ họ. Ukpoye, u dhesẹ nọ o wo ẹgba keme ọ kuvẹ hẹ re uruemu ọgwọlọ-ẹme na o lẹliẹe ru oware nọ ọ gwọlọ ru hu. Enẹ o re ro fi ọgwọlọ-ẹme na kparobọ, ababọ ọgwọlọ-ẹme nọ ọyomariẹ o re zihe ro.

  Onana o roja gaga maero nọ a tẹ be gwọlọ ọmọ ra ẹme evaọ itanẹte. O te bi kere eme evedha vi se enọ i bi vi iwou itieye sei, onana u re tube ru ai ruabọhọ ẹme-ọgwọlọ na, hayo ru nọ ọmọ na omariẹ o re ro zihe ruọ ọgwọlọ-ẹme. Fikiere, o rẹ mai woma nọ a gbẹ kpọ ọgwọlọ-ẹme na unu hu. Ẹsibuobu, onana u re ru nọ ọgwọlọ-ẹme na ọ rẹ rọ seba, ọmọ ra ọ vẹ rọ ere ku ẹbẹbẹ na họ.

  Ehri-uzi Ebaibol: “Nọ ire e gbẹ riẹ hẹ, erae i re fu no.”—Itẹ 26:20.

• Evaọ ẹsejọ, ọmọ ra ọ sae kẹnoma kẹ ahwo hayo eria nọ a sae jọ gwọlọ iẹe ẹme. Wọhọ oriruo, ọ tẹ riẹ oria nọ oghẹrẹ ohwo jọ hayo utu ahwo jọ a rẹ sae jọ, ọ sae nya edhere ọfa.

  Ehri-uzi Ebaibol: “Ohwo nọ o wo areghẹ ọ rẹ ruẹ oware enwoma, o ve siomano, rekọ ogbori ọ rẹ nyaruọ ẹe, ọ vẹ reoja oware nọ u re noi ze.”—Itẹ 22:3.

DAO ONANA: Fiobọhọ kẹ ọmọ ra roro kpahe eware sa-sa nọ ọ rẹ sai ru, gbe abọ owoma avọ abọ oyoma rai. Wọhọ oriruo:

• Eme ọ rẹ sae via nọ ọ gbẹ kpọ ọgwọlọ-ẹme na unu hu?

• Kọ ẹvẹ o rẹ jọ nọ ọ tẹ gbaudu ta kẹ ọgwọlọ-ẹme na nọ jọ ọ seba?

• Kọ eme ọ rẹ via nọ ọ tẹ vuẹ iticha riẹ kpahe ọgwọlọ-ẹme na?

• Kọ ọgwọlọ-ẹme na ọ sae seba, nọ ọ tẹ whẹtiẹ iẹe họ oma hayo ta emiehwẹ kẹe?

Te ọgwọlọ-ẹme na o bi ru onana evaọ itanẹte hayo ovao-dhe-ovao, iyero ivẹ e rẹ jọ epọvo na ha. Fikiere, whẹ avọ ọmọ ra wha jiroro oware nọ wha re ru nọ u fo uyero na. Tuduhọ iẹe awọ inọ whọ rrọ kugbei evaọ etoke ẹbẹbẹ na.

Ehri-uzi Ebaibol: “Emamọ ogbẹnyusu o re dhesẹ uyoyou ẹsikpobi ọ tẹ jẹ rrọ oniọvo nọ a yẹ fiki oke idhọvẹ.”—Itẹ 17:17.