Uzou 1

Whọ Sai Wo Obaro Evawere!

1, 2. Eme Ọnọma ra ọ gwọlọ nọ who wo?

OHWO nọ who you nọ ọ rẹ rọ oma oruọruọ gbalọ owhẹ. Ehwẹ nọ i no eva ze evaọ etoke emamọ emu ọriọ kugbe egbẹnyusu eghaghae ra. Omawere nọ who re ro rri emọ ra nọ e be ghọghọ zaharo kugbe. Etoke itienana yọ oke evawere evaọ uzuazọ. Rekọ rọ kẹ ahwo buobu, uzuazọ rai o wọhọ nọ a te no ẹbẹbẹ ologbo jọ no a vẹ ruọ ọfa. Otẹrọnọ ere uzuazọ ra o rọ, kru udu ga.

² O rọ oreva Ọghẹnẹ re whọ reawere evawere okrẹkri evaọ otọ eyero nọ ọ mai woma evaọ okegbe ogbunu. Onana orọnikọ ewezẹ gheghe he, keme Ọghẹnẹ ọ ghinẹ k’owhẹ usiavẹ kpohọ oghẹrẹ obaro evawere otiọye na. Usiavẹ yena họ eriariẹ.

3. Didi eriariẹ họ usiavẹ kpohọ evawere, kọ fikieme u je muomai ẹro nnọ Ọghẹnẹ ọ sae kẹ eriariẹ eyena?

³ Ma be t’ẹme kpahe oghẹrẹ obọdẹ eriariẹ jọ nọ e rro gaga viọ areghẹ ohwo-akpọ. Oyehọ “eriariẹ Ọghẹnẹ.” (Itẹ 2:5) Ole ikpe 2,000 nọ i kpemu no, okere Ebaibol jọ ọ tẹ ta nọ: “Kuwou kuwou kpobi u re wo ohwo nọ ọ bọ riẹ, rekọ Ọghẹnẹ họ ọ nọ o ru eware na kpobi.” (Ahwo Hibru 3:4) Dai roro kpahe eriariẹ nọ Ọnọ-Oru eware kpobi o wo! Ebaibol na e ta nọ Ọghẹnẹ o re kele je se edẹ isi na kpobi. Ẹvẹ oyena u gbunu te, keme egba ima-idu isi e rọ ẹko-isi mai na, yọ ekiotọ ehrugbakpọ a ta nọ eko-isi efa nọ e riẹ i bu te ẹgba ima-odu! (Olezi 147:4) Ọghẹnẹ ọ riẹ kpahe omai kpobi re, fikiere ono ọfa ọ rẹ sae kẹ emamọ iyo nọ e gba kpahe enọ obọdẹ uzuazọ?—Matiu 10:30.

4. Fikieme ma je rẹro nọ Ọghẹnẹ ọ rẹ kẹ ehrẹ nọ e rẹ kp’omai, kọ obe vẹ ma jẹ ruẹ ẹgwọlọ ọnana?

⁴ Dai roro kpahe ezae ivẹ nọ e be daoma ruẹrẹ imoto rai. Ofu o dhe ọjọ no, ọ tẹ bueva nọ ọ gbẹ ruẹrẹ omoto riẹ na ha. Ọzae avivẹ na ọ tẹ rọ odiri ruẹrẹ omoto riẹ, ọ tẹ thọ usiavẹ họ omoto na, ovao riẹ o tẹ ghariẹ nọ ẹjini na o muọ iruo họ nọ o je muhọ ẹdhẹ ẹmẹrera. Who re du lahiẹ oma ra re whọ tẹ riẹ ohwo nọ o wo obe ohrẹ no obọ ohwo nọ o ku omoto na evaọ usu ezae ivẹ na ze he. Kọ o gbẹ rọ oware areghẹ inọ Ọghẹnẹ ọ rẹ kẹ ohrẹ nọ o rẹ kp’omai evaọ uzuazọ? Wọhọ epanọ whọ rẹ sae riẹ, Ebaibol na e ta nọ oghẹrẹ obe otiọye na o riẹ—obe ohrẹ gbe ọkpọvio no obọ Ọnọma omai ze, nọ a ru ona họ re o k’omai eriariẹ Ọghẹnẹ.—2 Timoti 3:16.

5. Ẹvẹ eriariẹ nọ e rọ Ebaibol na i wuzou te?

⁵ Otẹrọnọ Ebaibol na e ta gba, dai roro kpahe efe eriariẹ nọ e rẹ jọ eva riẹ! Evaọ Itẹ 2:1-5, ọ kpakpa omai re ma gwọlọ areghẹ, re ma tọ kokodo kẹe wọhọ epanọ a rẹ tọ kẹ efe nọ a si no na—orọnikọ evaọ otọ iroro ahwo ho, rekọ evaọ Ẹme obọ Ọghẹnẹ. Ma tẹ jọ etẹe gwọlọ, ma rẹ te ruẹ “eriariẹ Ọghẹnẹ.” Nọ Ọghẹnẹ ọ riẹ kpahe umuo gbe ẹgwọlọ mai na, ọ k’omai ohrẹ nọ u re fiobọhọ k’omai yere uzuazọ udhedhẹ, evawere. (Olezi 103:14; Aizaya 48:17) Ofariẹ, eriariẹ Ọghẹnẹ e k’omai emamọ usi aghọghọ.

UZUAZỌ EBẸDẸ BẸDẸ!

6. Didi imuẹro Jesu Kristi ọ kẹ kpahe eriariẹ Ọghẹnẹ?

⁶ Ọzae nọ a jọ ikuigbe riẹ gaga na Jesu Kristi o dhesẹ abọ eriariẹ Ọghẹnẹ ọnana vevẹ. Ọ ta nọ: ‘Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.’ (Jọn 17:3) Dai roro iei—eriariẹ nọ i re su kpohọ uzuazọ ebẹdẹ bẹdẹ!

7. Didi imuẹro e riẹ inọ Ọghẹnẹ ọ gwọlọ nọ ma whu hu?

⁷ Whọ nwani ku ei họ vẹrẹ nọ uzuazọ ebẹdẹ bẹdẹ yọ ewezẹ gheghe he. Ukpoye, rri oghẹrẹ nọ a rọ ma ugboma ohwo na. A ru ona hiẹe ziezi re ọ dawo oware, re o y’ẹme, se orre, ruẹ ude, jẹ sae rọ obọ te. Eware buobu e rọ otọakpọ na nọ i re si omai urru—emu ọwewere, ile evawere evra, orre woma idodo, okegbe nọ o wo erru, ogbẹnyusu evawere! Yọ ẹvori ogbunu mai ọ rro viọ kọmputa ologbo, keme ọ rẹ lẹliẹ omai wo ovuhumuo jẹ reawere eware enana kpobi. Kọ who roro nọ Ọnọma omai ọ gwọlọ nọ ma whu re ma ku eware enana kpobi fiẹ? Kọ o gbẹ mae rọ oware iroro re ma ku ei họ inọ ọ gwọlọ nọ ma rria avọ evawere re ma jẹ reawere uzuazọ bẹdẹ bẹdẹ? Whaọ, oyena họ oware nọ eriariẹ Ọghẹnẹ e rẹ sae ru k’owhẹ.

UZUAZỌ EVAỌ APARADASE

8. Eme Ebaibol na e ta kpahe obaro ohwo-akpọ?

⁸ Oware nọ Ebaibol na e ta kpahe obaro otọakpọ na gbe ohwo-akpọ a rẹ sae gbae kugbe evaọ ẹme ọvo—Aparadase! Jesu Kristi ọ t’ẹme tei okenọ ọ ta kẹ ọzae jọ nọ o je whu nọ: ‘Who re ti lele omẹ jọ Aparadase.’ (Luk 23:43) Ababọ avro, ẹfodẹ Aparadase na o wha eyero evawere ọ ọsẹ gbe oni ọsosuọ mai, Adamu avọ Ivi, ziọ iroro ọzae ọnana. Evaọ okenọ Ọghẹnẹ ọ ma ai, a jọ gbagba jẹ rria ọgbọ nọ ọ wọhọ ogege nọ Ọnọma na o ru ona họ jẹ kọ. A ghinẹ riẹe se nọ ọgbọ Idẹn, nọ odẹ na u dhesẹ omawere.

9. Ẹvẹ o jọ re a rria evaọ Aparadase ọsosuọ na?

⁹ Ẹvẹ ọgbọ ọyena o woma te! Aparadase ọ ghinẹ jọ. Evaọ usu ire iwoma riẹ họ enọ e jẹ mọ ibi-ire awere. Epanọ Adamu avọ Ivi a be rọ kiẹ okegbe rai riwi na, da ame ọwewere riẹ, jẹ kọrọ ibi-ire no ire riẹ ze, oware ovo o rẹ so iẹe ze nọ a jẹ ruawa hayo dhozọ họ. Makọ erao dede e jọ enwoma kẹ ai hi, keme Ọghẹnẹ o fi ọzae na avọ aye riẹ họ enọ e rẹ rọ uyoyou su ai kpobi. Fiba oyena, ọzae gbe aye ọsosuọ na a wo omokpokpọ ojaja. Epanọ a y’ẹme kẹ Ọghẹnẹ te, ere obaro ebẹdẹ bẹdẹ, ọrọ evawere o rẹ jọ ọ rai. A kẹ rai iruo nọ e rẹ veva ọrọ ẹruorote uwou Aparadase ogbunu rai. Ofariẹ, Ọghẹnẹ ọ kẹ Adamu avọ Ivi ujaje na re a “vọ evaọ akpọ na re [a] woi.” Te ae gbe emọ rai a rẹ kẹre iwhru Aparadase na bẹsenọ otọakpọ na soso o ti ro zihe ruọ oria erru aghọghọ.—Emuhọ 1:28.

10. Okenọ Jesu ọ t’ẹme kpahe Aparadase, eme o wo họ iroro?

¹⁰ Evaọ okenọ Jesu ọ fodẹ Aparadase, ọ jẹ ta kẹ ọzae nọ o bi whu na re o roro kpahe oke nọ ovrẹ no thethabọ họ. Ijo, Jesu ọ jẹ t’ẹme kpahe obaro! Ọ riẹ nnọ uwou otọakpọ mai na o re ti zihe ruọ aparadase. Ọghẹnẹ ọ vẹ te rọ ere ru ẹjiroro ọsosuọ riẹ kẹ ohwo gbe otọakpọ mai na gba. (Aizaya 55:10, 11) Ẹhẹ, a re ti zihe Aparadase tha! Kọ oghẹrẹvẹ ọ te jọ? Jọ Ẹme Ọghẹnẹ, Ebaibol Ẹri na, ọ kuyo na.

UZUAZỌ EVAỌ APARADASE NỌ A ZIHE ZE

11. Evaọ Aparadase nọ a ti zihe tha na, eme ọ rẹ te via kẹ ẹyao, owho, gbe uwhu?

¹¹ Ẹyao, owho, gbe uwhu o gbẹ te jọ ofa ha. “Kẹsena aro enọ itu i veti rovie, ezọ enọ i di i veti rovie; kẹsena ọmo o veti duola wọhọ uyo, ẹrọo ọnọ o dienu ọ rẹte so ole oghọghọ.” (Aizaya 35:5, 6) “Ọghẹnẹ ọ vẹ te jọ [kugbe ahwo]. Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.”—Eviavia 21:3, 4.

12. Fikieme u je muomai ẹro nọ ethube, ozighi, gbe emuemu o gbẹ te jọ Aparadase obaro na ha?

¹² Ethube, ozighi, gbe emuemu e rẹ te vrẹ no bẹdẹ bẹdẹ. “A ti kpe iru-umuomu na kufiẹ . . . Omoke kakao, iru-umuomu e gbẹ te jọ họ . . . ọ rẹ te jọ etẹe he. Rekọ enọ e rọ oma kpotọ, e rẹ te rọ otọ na reuku.” (Olezi 37:9-11) “A re ti kpe ahwo omuomu no otọ na, gbe ahwo ẹgwae omuomu a re ti si ai no otọ na.”—Itẹ 2:22.

13. Ẹvẹ Ọghẹnẹ ọ te rọ rehọ udhedhẹ tha?

¹³ Udhedhẹ o rẹ te da akpọ na kpobi fia. “Ọye [Ọghẹnẹ] o ru akpọ na kpobi nọ ẹmo o je serihọ ri te oka akpọ; o te wiri uzei na, o te bru ehi na ibribro.” (Olezi 46:9) “Ẹrẹreokie o [reti] vihọ eva edẹ riẹ, re udhedhẹ u dhe ebuebu họ bẹsenọ ọvẹre ọ gbẹ te jọ họ.”—Olezi 72:7.

14, 15. Eme Ebaibol na e ta kpahe iwou, iruo, gbe emuore evaọ Aparadase nọ a ti zihe ze na?

¹⁴ Iwou e rẹ te jariẹ gbe iruo edẹro. “A rẹ te bọ iwou a vẹ ria ae tọ . . . A gbẹ te bọ iwou no re omọfa ọ rria e he, a gbẹ te kọ no re omọfa ọ re he. Epanọ ire e rẹ tọ te na ere ahwo mẹ a rẹte tọ re, jegbe esanọ mẹ na a rẹ te re erere iruo abọ rai krẹkri. Iruo rai i gbe ti vrẹ hẹ, hayo a gbe ti yẹ emọ nọ e rẹ rioja ha.”—Aizaya 65:21-23.

¹⁵ Emuore omokpokpọ ọ rẹ te jọ buobu. “Ibi e rẹ te vọ otọakpọ na; e te jọ ehru igbehru na kpọhọ hwẹ.” (Olezi 72:16, NW ) “Otọ o vẹ te kẹ ẹvi riẹ, Ọghẹnẹ, Ọghẹnẹ mai, ọ rẹ te ghale omai.”—Olezi 67:6.

16. Fikieme uzuazọ evaọ Aparadase o jẹ te jọ omawere?

¹⁶ Uzuazọ ebẹdẹ bẹdẹ evaọ otọakpọ aparadase ọ rẹ te jọ avọ omawere. “Ikiẹrẹe e rẹ te rehọ otọ na reuku, a vẹ jẹ rria ae bẹdẹ.” (Olezi 37:29) “Igbrẹwọ gbe etọ eyaya a rẹ te ghọghọ, e rọ idhude e rẹte ghọghọ avọ idodo.”—Aizaya 35:1.

ERIARIẸ GBE OBARO RA

17. (a) Eme u fo nọ who re ru otẹrọnọ uzuazọ evaọ Aparadase u siowhẹ urru? (b) Ẹvẹ ma rọ riẹ nọ Ọghẹnẹ ọ rẹ te rọ inwene buobu ziọ otọakpọ na?

¹⁷ Otẹrọnọ uzuazọ evaọ Aparadase u si owhẹ urru, whọ k’uvẹ re oware ovo u ru owhẹ siọ eriariẹ Ọghẹnẹ ba ewo ho. O you ahwo yọ ọ rẹ te rehọ inwene nọ a gwọlọ ze re a ru otọakpọ na fihọ aparadase. Otẹrọnọ who wo ẹgba nọ who re ro ku edada gbe ẹdhoguo-okienyẹ nọ e rọ akpọ na buobu na họ, who gbe ru ere? Kọ ma re rẹro kawo viere miọ Ọghẹnẹ? Evaọ uzẹme, Ebaibol na e ta riẹ vevẹ kpahe oke nọ Ọghẹnẹ o ti ro si eyero ọnana nọ ukpokpoma ọ vọ na no ọ vẹ te rehọ esuo okiẹrẹe, ọgbagba ro nwene iei. (Daniẹl 2:44) Rekọ Ebaibol na i ru viọ onana nọ ọ ta k’omai na kpobi. U dhesẹ k’omai epanọ ma rẹ sae rọ zọ ruọ akpọ ọkpokpọ nọ Ọghẹnẹ ọ yeyaa riẹ na.—2 Pita 3:13; 1 Jọn 2:17.

18. Eme eriariẹ Ọghẹnẹ e rẹ sai ru k’owhẹ obọnana?

¹⁸ Eriariẹ Ọghẹnẹ e rẹ sae jẹ k’owhẹ erere obọnana re. Enọ kpahe uzuazọ nọ e mae diwi nọ i re je kpokpo ohwo a kuyo rai evaọ Ebaibol na. Ọjẹrehọ ọkpọvio riẹ u re fiobọhọ k’owhẹ ku usu kugbe Ọghẹnẹ. Ẹvẹ uvẹ onana o rro te! Yọ onana o rẹ lẹliẹ owhẹ reawere udhedhẹ nọ Ọghẹnẹ ọvo ọ sae kẹ. (Ahwo Rom 15:13, 33) Nọ whọ be rehọ eriariẹ obọdẹ enana fihọ uzou na, yọ who bi ru omodawọ nọ ọ mae wuzou jẹ kẹ erere kpobi evaọ uzuazọ ra. Who ti br’enu vievie he fikinọ whọ be rehọ eriariẹ Ọghẹnẹ nọ i re su kpohọ uzuazọ ebẹdẹ bẹdẹ.

19. Didi onọ ma ti roro kpahe evaọ uzou nọ o be tha na?

¹⁹ Ma t’ẹme kpeze bru Ebaibol na no wọhọ obe nọ eriariẹ Ọghẹnẹ e rọ eva. Ghele na, ẹvẹ ma sae rọ riẹ nọ obe areghẹ ahwo ọ rọ họ, rekọ inọ oware nọ o rro viere? Ma ti roro kpahe onọ nana evaọ uzou obaro na.

Ikegbe iwowoma wọhọ enana e rẹ sae jọ era bẹdẹ bẹdẹ!

Eme who re ru hrọ re whọ sae reawere rai? Uyo na o r’oma hwa oghẹrẹ obọdẹ eriariẹ jọ.

Obe nana u re ti fiobọhọ k’owhẹ wo eriariẹ nọ i re su kpohọ uzuazọ ebẹdẹ bẹdẹ.

DAWO ERIARIẸ RA

Fikieme eriariẹ Ọghẹnẹ i je su owhẹ kpohọ evawere ebẹdẹ bẹdẹ?

Ẹvẹ uzuazọ o te jọ evaọ Aparadase otọakpọ nọ ọ be tha na?

Fikieme who je wo erere no ẹrehọ eriariẹ Ọghẹnẹ ze enẹna?